˗Bhö ü ˗zota ˈwɔn ˈö yö, ˗a ˈgü: ˗Dhɛ ˈö Vanesa ˗yö ˗wo ˈwlaan˗ ˗ta, ˗a minitö ˈyii ˗mɔɔn 10 ˗bha kö ˗ya ˈto ꞊ya ö dɔmɛn ˈbha ˗wo man.

˗Dhɛ ˈö Vanesa ꞊slëë ö ˗zü, ˈyö ˗kpan Zesika ˗bha kö yɔ ˗sandhe ꞊plɛ ˈö ˈgo ˗an ˈˈpʋ ˗dɛɛ ˈka, ˗wa ꞊kwɛɛ˗. ˈYö Zesika ˗yö yɔ ˗sandhe do ˗zɔn Vanesa ˈka, ˈö˗ pö ˗a ˗dhɛ: “˗Bhö ˗a ˈnën ˈbha mü ˈsa, ˈbhaa ˈnën pë ˈˈtɩtɩ ˈka ˈzü.”

Vanesa ˈyaa˗ ˈˈpiʋ̈ kö ˈö˗ mü, ˈˈkɛɛ Zesika ˗yö ˗a ˈˈtɔŋdhe ˈka. ˈYaa˗ ˈˈpiʋ̈ ˈpö kö ˗yö ö yö yaa. ꞊Ya ˈgo mü ˈzü, Zesika ˗yö ˈnëndhiëŋ ˗tiaandhö do ˈka. ˈÖ ꞊ya kë ꞊dhɛ Zesika ˗zë ˗yö yɔ ˗mü, kö yɔ mü ˗sü ˈyaa ˈwɔn yaa ˈka. Vanesa ˗ya ˗pö ˈö ˗de ˗dhɛ ꞊dhɛ we ˗sandhe do ˈˈkpaan mü ˗sü ˗mü. ˈYaa ꞊dhɛ ˈtaa˗ ˈˈkpɛɛ mü ˗sü ˈdhö.

Ü ˗kë Vanesa ꞊duɛ ˈgü ˗be, ˗mën ˈü ˗dho ˗a kë?

꞊Ya kë ꞊dhɛ ˈü˗ ˈˈpiʋ̈ ˈü ʒian ˗së ˈsü ˈwɔn suu yö ˗a ˈgü, ü dua ˗mü kö mɛn suu ˈü˗ ˈka, ˈü˗ dɔ ˗së ˈka. Ü ˗de dɔ ˗sü ˗yö ˗gban pë ˗nu ˈü ü ˗zoyö ˗an ˗dhɛ, ˗an dɔ ˗sü ˗bha. ˗An dɔ ˗sü ˗dho ü ˗takun kö ˈü ˈˈdhiʋ̈sü ü ˗de ˈka, ˈyö ˈbhaa ü ˗zoyö mɛn ˈbha ˗dhɛ kö ˗yö ˈˈdhiʋ̈sü ü ˈka.—1 Kodhɛngtö 9:26, 27.

Ü ˗dho ꞊faan suu bhë˗ ꞊slɔɔ ˈˈmɛn? ˗Kɔ ˈü ˗dho ꞊faan bhë, ˗a ꞊slɔɔ ˗a ˈka, ˗a zübho ˗kɔ ˗së ˈnën ˈtɔ˗ dhɛɛˈˈ ˗nu ˈkwa ˗dho ˗an yö bhë, ˗an ˗yɔ bɔ ˗sü.

Pë ˗nu ˈü ˗mɔɔn ˗an kë ˗sü ˗bha waa ü ˗bha ˈˈklʋʋsë ˗nu, ˈbha ˗an dɔ, ü ˗zo ˗dho ˗gban.

˗A ˈWƆNZUAN ˈÖ BIBLÖ ˈGÜ: Bɔmɛn Pɔdhö ˗ya ˗pö: “ˈKö ˈzü n ˈˈdhi ˗zë ˈyii ˈˈkan plɛɛˈˈ dhö ꞊dhɛ˗ ˗nu ˈdhö, ˈˈkɛɛ ˈwɔn ˈkö ˗gban ˗Zlan ˗wɔn ˗bha a˗ ˗dɔ.” (2 Kodhɛngtö 11:6) ˈWɔn ˈö ˗gban ˗Zlan ˗bha, ˗a dɔ ˈö Pɔdhö ˗ya wo ˗së ˈka bhë, ˗ya ˗takun kö ˗yö ˗gban ˗a ˗wɔn yaa ꞊blɛɛ ˗mɛn ˗nu ˗gɔ. ˗Yö ˈti ö ꞊kwaa ˗a ˗dhiaŋ yaa ˈö mɛn ˗nu ˗wa zë ˗a ˗zü, kö ˗ya ˈgü ga.—2 Kodhɛngtö 10:10; 11:5.

˗BHÖ Ü ˗DE ˗GA: Pë do ˈbha ˈü ˈˈgbɩɩ˗ ˗a ˈgü, ˗bhö ˗a ˗bɛn zë ˈshia˗ yö.

Ü ˗bha ˈˈklʋʋsë ˗tiaandhö ꞊dede ˈü˗ dɔ, ˗bhö ˗a ˗bhokoo kë. (˗A ˈwɔnzuan ꞊nɛn: Mɛnbhɩɩdhe ˗wɔn ˗yö ü ˗gɔ ˈˈgbɩɩ˗ ˗ee? Ü ˈˈgblü ˗yö ˗së ˗ee? ˗Zoyö ˗a ˗dhɛ ˗mɛn ˗mü ü ˈka ˗ee? Ü ˈˈlɛlɛ ꞊bhlëë ˗ya ˗ee?)

꞊Yɔɔˈ bhüʋ̈ˈˈ ˗yö ˈˈgbɩɩ˗ ˈˈkɛɛ ˗a ˗yökodhiʋ̈dhɛ ˗yö ꞊mɔɔn˗ ˗bha kö ˗yö ˈˈkan ˈˈvaandhö. ˗Kɔ do bhë˗ ˈka ˈpö, ꞊ya kë ꞊dhɛ ˈkwa kwa ꞊kwaa kwa ˗bha ˈtëëtëdhɛ ˗nu ˗zü kö ˗wo ˈˈdhiʋ̈sü kwa ˈka, kwa ˈˈta ˗kɔ ꞊mɔɔn˗ ˗bha kö ˗yö ˈgo ˈˈgblʋʋ ˈˈvaandhö.

˗A ˈWƆNZUAN ˈÖ BIBLÖ ˈGÜ: ˗Yö kun Pɔdhö ˈˈɲaan ꞊dhɛ ö ˈtëëtë. ˗Ya ˗pö ꞊dhɛ: “ˈSa ˈma ˈyaanu kö ˈa n ˗zʋ ˈgɔn, ˗Zlan ˗bha ˈtɔng˗ ˈˈdhia ˗zë ˗yö n ˈgü ꞊tɔn, ˈˈkɛɛ ˗a ˗kɔ ˈmɛ? ˈTɔng˗ ˈˈwɛɛ ˈdhɛ ˈö n kwi ꞊wlöö bha ꞊në ˈko zë˗ ˈdhɛ ˈö n zuëˈˈ ˈˈpiʋ̈ bha˗ ˈka, ˈyö n ˗kë ˈwɔnyaa ˈö ꞊ya ˈkɔ dɔ n kwi ˈgü bha˗ ˗bha ꞊dhuëng ˈka.” —Wlɔmö 7:22, 23.

˗BHÖ Ü ˗DE ˗GA: N ˈtëëtëdhɛ ˗mɛɛn ˈö n dua ˈdhö ˗mü kö ˈa ˈto ˗a ˈˈgbɩɩ˗ ˈka, ˗a ˗ta?

Ü ꞊mɔɔn˗ ˗bha ˈü ˗da gɔ ˈgü, ˈü˗ pö ˗a ˗blümɛn ˗dhɛ ꞊dhɛ ˗ya ˗blü ˗dhɛ do ˈgü kö ˗yö ˈto ˗dhɛ do bhë, ˗a ˈgü kö ˗a ˈˈwɛyi ˗yö ɲën ˗ee? ˗Abin, ˗yö ˗dho kë ˈˈwɛyi ˈˈshiʋ̈sü ˈka.Ü ˈti ˈdho ꞊mɔɔn ˗a saabhosü ˗bha.

˗Gleŋ ˈö go ˗a ˈgü ˈnën ˗tɔ ꞊dhɛ pë ˗nu ˈkwa˗ ˈˈpiʋ̈ ˈkwa ˗an kë, ˗an dɔ ˗sü ˗yö ʒian ˗zɔn kwa ˗dhɛ ˈö ˈwo kwa ˗takun kö ˈkwa ˈdho ˈˈdhiʋ̈ kwa ˗bha ˗tosɛta ˈgü.

˗A ˈWƆNZUAN ˈÖ BIBLÖ ˈGÜ: Pɔdhö ˗ya ˗pö: “˗A ˗kë ˈˈdhʋ̈ ˗sü bha˗ ˈgü, ˈö ꞊dhɛ ˗bɛang ˈdhö kö ma ˗zë n ˗bha ˈa˗ ˈsü sië bha ˈmaa˗ ˈsü n ˗gɔ ˈˈpiʋ̈ ˈkaa ˈdho˗ ˈka.” (1 Kodhɛngtö 9:26.) Pɔdhö ˈyii ˗tosɛta kë ˈö ˗gɔa, ˈˈkɛɛ pë ˗nu ˈö gun˗ ˈˈpiʋ̈ kö ˗yö ˗an kë bhë, ˗yö ˈˈɲaannu ˈö ö ˗zota ˗an ˈgü.—Fidhipö 3:12-14.

˗BHÖ Ü ˗DE ˗GA: Pë ˗yaaga ˈü˗ ˈˈpiʋ̈ kö ˈü ˗an kë ˗kwɛ ˈö nu ˗ni ˈgü yö ˗a ˈgü, ˗bhö ˗an ˗bɛn zë ˈshia˗ yö.

꞊Ya kë ꞊dhɛ ˈbhaa ü ˗zoyö pë ˈbha ˗dhɛ, ü ˈti ˈdho ꞊mɔɔn˗ ˗bha kö ˈü ˗da ˈwɔn ˈbha kë ˗sü ˗ʒian ˗ta. Ü ˗dho kë ꞊dhɛ ˈˈguudë ˈdhö ü ˈˈtɛɛbɔ ˗nu ˈˈpiʋ̈. ˈYö, ü ˗bha ˗bhɔ ˈˈguudë ˗bha ˗sü ˗dho ˗a ˗zɔn ꞊dhɛ ˈbhaa ˈü ˗de dɔ.

ˈˈKɛɛ ꞊ya ke ꞊dhɛ ü ü ˗zoyö pë ˈbha ˗dhɛ, pë ˈˈʋʋ ˗pë ˈö mɛn ˈˈwɛɛ ˗nu ˗dho ˗a kë, ˈyi ˈdho ü ˈˈta ˗kɔ bho ˈˈgblʋʋ ˗toŋtoŋdhö.

˗A ˈWƆNZUAN ˈÖ BIBLÖ ˈGÜ: ˗Dhɛ ˈö ˗zlanwodhiʋ̈lomɛn Daniɛ kun wlüünën ˈka, “˗ya ˗ya ö zuʋ̈ˈˈ ˈˈpiʋ̈” ꞊dhɛ ˈkö ˗kë ꞊dhɛ ö ˗kë ö ˗mɛn ˗nu ˈka ꞊gblɛɛn, ö ˗dho ˈto ˗klü ˗sü ˈka ˗Zlan ˗bha. (Daniel 1:8) Pë ˈö˗ ˗ya ö zuʋ̈ˈˈ ˈˈpiʋ̈ bhë, ˗ya ˗takun ˈö to ö ˗wo ˗ta. Daniɛ ˗yö ˗tosɛta ˗kë ö ˗bha ˗zoyödhe ˗ta.

˗BHÖ Ü ˗DE ˗GA: ˗Mën ˈü ü ˗zoyö ˗a ˗dhɛ? ˗A ˈwɔnzuan ꞊nɛn: Ü ü ˗zoyö ꞊dhɛ ˗Zlan ˗yö ˗dhö ˗ee? ꞊Ya kë ꞊dhɛ ü ˗bhaa ˈka ˗yö ˗dhö, ˗mën ˈö ˗kë ˈü˗ pö ˈˈdhʋ̈?

ˈÜ ˗bhaa ˈka ˗Zlan ˗bha ˈtɔŋ˗ ˗nu ˗ya ꞊bhlëë ˈgü ˗sü ˗yö ˗së ˗ee? ˗Mën ˈö ˗kë ˈü˗ pö ꞊ii?

˗Mën ˈü˗ ˈˈpiʋ̈ ˈü bhɔ ˗a ˗bha? Ü˗ ˈˈpiʋ̈ ˈü bhɔ ˈˈdhɛ ˈˈkpɛɛ ˈö ˈˈtɛɛ ˈnën ˈbha ˗ya ʒiö kö ˗ya ˈto ꞊ya ˗pö ɛɛnˈˈ ˈˈdhü ˈö ˈˈtɛɛ ˈˈgbɩɩ˗ ˈyaa ꞊mɔɔn˗ ˗bha kö ˗ya ˗pö ˈnën ˗bha ˗ee? ꞊Ya kë ꞊dhɛ ˈbha ü ˗de dɔ ˗së ˈka, ü ˗dho bhɔ ˈˈdhü bhë, ˗a ˗bha. ꞊Ya ˈgo mü, dhɛɛˈˈ ˈö ˗kë: Mɛn suu ˗mɛɛn ˈa˗ ˈka? ˈka bhë, ü ˗dho ꞊mɔɔn ˗a ˗yɔ bɔ ˗sü ˗bha.