Bhɛɛwo ˗blɛɛsü ˗nu ˈö mɛn ꞊vadhɛ ˗wa ꞊draan ˗a do ˈnën ˗tɔ Dëmɛn ˗bha ˗bhɛɛwo. Bhɛɛwo ˈö bhë ˗yö pë ˈö mɛn ˗nu ˗wa ˗dhɛ ꞊shiöŋ Nuvo Tɛsitaman ˗a ˈgü. ˗Kɔ ˈö bhɛɛwo ˈö bhë ˗a zü ˗yö dɔ ˗a ˈka, yö ꞊nɛn: «Yi Dë ˗Zlan ˈi ˗ya ˗sü ˈka dhang˗ ˗nu ˈgü, i ˈtɔ ˈö ˈˈslʋ̈ʋ̈slʋ̈ bha ˗yö bhɔ.» (Matiö 6:9) ˈˈKɛɛ «Jehovah» ɛɛnˈˈ «Yahweh» ˈö ˗kë ˗Zlan ˈtɔ ˈka ꞊Glee˗ ˗wo ˈgü bhë, mɛn ˈyaa ˗kpan ˗a ˗bha Nuvo Tɛsitaman ˗nu ˈwo ˗an ꞊dhiëëta ꞊Glee˗ ˗wo ˈgü bhë ˗an ˈgü. ꞊Sua ˗zlan ˗nu ˈwo ˗kë ꞊dhɛ Zösö, Ɛɛmɛsö waa Atemisö ˗nu ˈdhö bhë, ˗an ˈtɔ ˗nu ˗wo Nuvo Tɛsitaman ˗nu ˈwo bhë ˗an ˈgü. ˗Dhɛ ˈö ˈˈdhʋ̈, ˗a ˗dhɛ ˈyaa˗ ˗bha kö ˗Zlan ꞊dede ˈtɔ ˗yö kë ˗an ˈgü ˗ee?—Këwɔn ˗nu 14:12; 19:35; 2 Timote 3:16.

 Biblö ꞊dhiëëtamɛn ˗nu ˈwo ˗an ˗dhɛ Lancelot Shadwell waa Frederic Parker bhë, ˗an ˗bhaa ˈka ˗Zlan ˈtɔ dua ˗mü kö ˗yö kë ˈzü Nuvo Tɛsitaman ˈgü. ˈMën ˗kë ˈyi˗ pö kö ˗yö «kë ˈzü»? Yi˗ ˗pö ˈˈdhʋ̈ ˈyö ˗tɔ ꞊dhɛ ˗wa ˗pö ꞊dhɛ ˗Zlan ˈtɔ ˗kun ˗a ˈgü zii ˗be ˈö mɛn ˗nu ˗wa bho˗ ˈgü. ˈMën ˗kë ˈö ˈwo˗ pö ˈˈdhʋ̈?

 ˗A ˗wɔn ˗kun Shadwell waa Parker ˗an ˈˈɲaan ꞊dhɛ ˗Zlan ˗Wo ˈˈpian ˗dhɛ ˈö ˈwo˗ ˗bɛn zë zii ˗be Eblö ˗wo ˈgü ˈö mɛn ˗nu ˗wa ˗dhɛ Ansiɛn Tɛsitaman bhë, ˗Zlan ˈtɔ ꞊dede ˗kun ˗a ˈgü ˗gɛnɲan ˈka ˈˈgblü ꞊va. ˗A ˗wɔn ˈgü ˗wo wo ˗de dhɛɛˈˈ ˗kpɔ ˈö ˈwo˗ pö, ˈmën ˗kë ˈö Nuvo Tɛsitaman ˈˈdhɛga ˗nu ˈö ˈwo ˗an ˗gɔ bhë ˗Zlan ˈtɔ ˗todhʋ̈sü ˈyaa ˗an ˈgü. a ꞊Ya ˈgo mü ˈzü Shadwell ˗ya ˈsuan˗ ˗bho ꞊dhɛ ˗wo ˈbhaa ˗nu ˈö˗ do ˗yö kë ꞊dhɛ «Zoova ˗bha ˈˈkiö» ˈdhö, ˈö go Ansiɛn Tɛsitaman ˈgü bhë, ˗wa kë Nuvo Tɛsitaman ˈˈdhɛga zii ˗nu ˈgü, mɛn ˗nu ˗wo ˗an ˗bho mü Nuvo Tɛsitaman ˈwo˗ ˗bɛn zë Glɛkö ˗wo ˈgü bhë ˗an ˈgü ˈyö ˈwo Kyʹri·os ˈö˗ ˗gɛn ˗kë «Dëmɛn» ˈka bhë, ˗a ˗ya ˗a ˈˈgblʋʋ ˈgü.—2 Rois 1:3, 15; Këwɔn ˗nu 12:23.

 ˈˈSanni Shadwell waa Parker ˗wo wo ˗bha Nuvo Tɛsitaman ˈwo˗ ꞊dhiëëta ꞊Glee˗ ˗wo ˈgü ˗a yö ˈˈkpɛnŋ ˗ʒianwo, kö Biblö ꞊dhiëëtamɛn ˈˈwɛɛ ˈbha ˗nu ˗wa ˗Zlan ˈtɔ ˗ya ˈsaadhö ˗an ˗bha Nuvo Tɛsitamɛn ˈwo˗ ꞊dhiëëta ꞊Glee˗ ˗wo ˈgü bhë, ˗an ˈgü. ˈˈKɛɛ ˈyaa kun ˗dhɛ ꞊vadhɛ ˈgü. b ˗Dhɛ ˈö Parker ˗yö A Literal Translation of the New Testament yö ˈˈkpɛnŋ kö ˗kwɛ 1863 ˈyii ˗wo ꞊köŋ bhë, kö ꞊Glee˗ ˗nu ˗bha Biblö ꞊dhiëëtamɛn ˈbha ˗bha ˈyii ˗Zlan ˈtɔ ˗ya ˗a ˈˈgblʋʋ ˈgü ꞊köŋ Nuvo Tɛsitaman ˈwo˗ yö ˈˈkpɛnŋ ˗an ˈgü. ˈMën ˈkwa˗ dɔ ˈö ˗gban Lancelot Shadwell waa Frederic Parker ˗an ˗bha?

 Lancelot Shadwell (˗kwɛ 1808-1861) ˗yö ˗kun zakanmɛn ˈka. ˗Wo ˗kun ˗a dë ˗dhɛ ˗ni ˈgü Lancelot Shadwell. Angletɛmɛn ˗nu ˗bha ˈˈsɛgɔdhiʋ̈mɛn ˗ya ˈgo mü, ˗a dë ˈnën kun dɔ ˗ni ˈgü mü. Lancelot Shadwell ˗kun Angletɛmɛn ˗nu ˗bha ˗zlanwo do ˈgü. ˈKö ˗kë ꞊dhɛ ˗a ˗bhaa ˈgü ˗Zlan ˗yö ö ˈkoodhö ˗yaaga, ˗Zlan ˈtɔ ꞊bhlëë ˗kun ˗a ˗gɔ. ˗Kɔ ˈö kun ˗a ˗wɔn blɛɛˈˈ ˗ni ˈgü ˗a ˈka ˈyö ˈtɔ˗ «ZOOVA ˈtɔ ꞊bhlëësü.» ˗Yö «Zoova» ˈtɔ ˗ya ˗gɛnɲan ˈka 28 The Gospels of Matthew, and of Mark ˈö ꞊dhiëëta bhë ˗a ˈgü, ˈyö˗ ˗ya ˗gɛnɲan ˈka 465 ˗a ˗zoto ˗a ˈˈpiʋ̈ ˗wɔn ˗nu ˈwo kun ˗an ˈgü bhë, ˗an ˈgü.

 ˗A ˈbha ꞊ya ˗kë kö Shadwell ˗yö ˈwɔn ˈö ˗gban ˗Zlan ˈtɔ ˗bha ˗a ˗draan ꞊dhɛ ˈö ˗kpan ˗a ˗bha Ansiɛn Tɛsitaman ˈö kun Eblö ˗wo ˈgü bhë, ˗a ˈgü. ˗Ya ˗pö ꞊dhɛ mɛn ˗nu ˈwo Kyʹri·os ˗ya ˗Zlan ˈtɔ ˈˈgblʋʋ ˈgü Ansiɛn Tɛsitaman ˈwo˗ ꞊dhiëëta Glɛkö ˗wo ˈgü ˗a ˈgü bhë, «ˈwaa kun Biblö ꞊dhiëëtamɛn kpɛnŋdhö ˗nu ˈka.»

 Shadwell ˗bhaa ˈö˗ ꞊dhiëëta ˗a ˈgü, ˗dhɛ ˗blɛɛsü ˈwo ˗kpan «Zoova» ˈtɔ ˗bha ˈmü ˈyö ˗tɔ Matiö 1:20. ˗A ˗bha ˗zoto ˗a ˈˈpiʋ̈ ˗wɔn ˈö ˗gban Biblö ˈˈɲan ˈö bhë ˗a ˗bha ˗ya ˗pö: «˗Wo kpö [Kyʹri·os] ˈö Biblö ˈˈɲan yö waa ˈˈwɛɛ ˈbha ˗nu ˈgü N.T. [Nuvo Tɛsitaman] ˈgü bhë ˈnën ˈtɔ˗ ZOOVA, ˗Zlan ˈtɔ ꞊dede: ˈyö ˗a ˗dhɛa ˗bha ꞊dedewo kö ˈtɔ ˈö bhë ˗yö kë ˈzü ꞊Glee˗ ˗wo ˗bhaa ˈö bhë ˗a ˈgü.» ˗Ya ˗pö ˈzü: «Kwa dua ˗mü kö ˈkwa˗ kë ˈˈdhʋ̈ ˗Zlan ꞊bhlëë ˗wɔn ˈgü. ˗Yö ö ˗de ˗zɔn ˈö˗ pö ˗wa ˗dhɛ ZOOVA: ˗a ˈwɔn ˈgü ˈkwa˗ ˗wɔn blɛɛˈˈ ˗ni ˈgü ˗yö ˗dho kë ˗së ꞊dedewo kö ˈkwa ˈtɔ bhë ˗a pö.» ˗Yö ˗dho ˈˈdhiʋ̈ ˈö˗ pö: «ˈWaa ˗kpan ZOOVA ˈtɔ ˗bha ꞊plɛ ꞊plɛ Biblö « Version du Roi Jacques » ˈgü. [...] ˗Zlan ˈtɔ ꞊dede ˈˈgblʋʋ ˈgü, Dëmɛn ꞊nën ˈkwa ˗kpan ˗a ˗bha mü.» Shadwell ˗ya ˗pö: ˗Ya kë ˗Zlan ˈtɔ ˈˈgblʋʋ ˈgü, «Dëmɛn [...] ˈyaa ˗wo kpö ˗së ˈka» ˈyö ˈtɔ˗ ˗wo yö ꞊dede ˗a ˗dhɛ «Dëmɛn» ö ˗gɔ ˈkɔɔ ɛɛnˈˈ ˈˈsɛ ˈgü.

 Shadwell ˗yö Matiö ˗bha ˈsëëdhɛ ˗be ˈö˗ ꞊dhiëëta bhë ˗a yö ˈˈkpɛnŋ ˗kwɛ 1859 ˈka, ˈyö˗ ˗bha Matiö waa Makö ˗nu ˗bha ˈsëëdhɛ ˗lokwëësü ˗yö yö ˈˈkpɛnŋ ˗kwɛ 1861 ˈka. ˈˈKɛɛ yö ˈö kun ˗a kë ˗ni ˈgü ˗yö ˗duannu. ˗A ˈgü ˗yö ꞊shiö ˗kwɛ 1861 Zanvie 11 ˈka kö ˗a ˗kwɛ ˗ya kë 52. ˈKö ˗kë ˈˈdhʋ̈ yö ˈö˗ ˗kë bhë, ˈyii˗ kë ˈˈwɛɛwɛ.

 Matiö ˗bha ˈsëëdhɛ ˗be ˈö Shadwell ˗ya ꞊dhiëëta bhë ˗a ˗dhɔ ˗yö ˗da ꞊nɔɔnmɛn do ˈbha ˈö kun Lɔndrö bhë, ˗a ˈgü. ˗A ꞊nɔɔnmɛn ˈö ˈˈdhʋ̈ ˈyö ˈtɔ˗ Frederick Parker (˗Kwɛ 1804-1888). ˗Yö ˗ya Nuvo Tɛsitaman ˗dhiëetasü ˗bha kö˗ ˗kwɛ ˗yö 20. Parker ˗zë ˈyaa kun ˈdhaŋ bho ˗ni ˈgü ˗a ˈˈdhiʋ̈ ꞊dhɛ ˗Zlan ˗yö ö ˈkoodhö ˗yaaga ꞊dhɛ Shadwell ˈdhö. ˗Ya ˗bɛnzë ˈö˗ pö: «Kö ˗Zlan Gbö dhɔɔbhaasü ˗bha ˈkɔdhi ˗todhʋ̈sü [...] ˈˈwɩ gagade ˗bha [...] kö ˗wo Zoova ˈö˗ ˈˈpii ˈdhö ˈˈgbɩɩ˗ ˗a ˗dhɔkë bhë, ˈaa ˗yö kë!» Parker ˗bhaa ˈgü Nuvo Tɛsitaman ˈsëëdhɛ ˗nu ˈö ˈwo Kyʹri·os ˗ya Dëmɛn ˗Zlan waa Dëmɛn Yesu ˗an ˈˈgblʋʋ ˈgü bhë, ˗wa ˗kë ˈyö ˈmɛn ˈyaa ˗an ꞊gban ꞊plɛ ˗bhokoo yö. ˗A ˗wɔn ˈgü, ˗dhɛ ˈö˗ yö ˗dhɛ ˈbha ˗nu ˈgü ꞊dhɛ Shadwell ˗yö «Zoova» ˗ya Kyʹri·os ˈˈgblʋʋ ˈgü bhë, ˗a ˗wɔn ˗ya ˗kun.

 Parker ˗yö ˈwɔn ˗nu ˈwo bhë ˗an ˈgüman ˗kɔ ˗kë ꞊dhɛ? ˗Yö Glɛkö ˗wo ˗draan. ˈYö ˗kɔ ˈö Glɛkömɛn ˗nu ˗wo ˈwɔn ꞊blɛɛ ˗a ˈka, ˗a ˈsëëdhɛ ˗be waa˗ ˈsëëdhɛ ˈˈpɛn ꞊va yö ˗kë. ˗Yö ˗dho ˈö ˗kë ˈpö Anglo-Biblical Institute ˈgümɛn do ˈka. ˗Dhɛ ˈö bhë, ˗a ˗bha yö ˈnën kun ˈwɔn ˗nu ˈwo ˗gban Biblö ˗be ˈsëëdhɛ zii ˗nu ˗bha ˗an ˈˈpiʋ̈ ˈpɔn ˗sü kö ˗wo Biblö ˗tiaandhö ˗nu ꞊dhiëëta ꞊Glee˗ ˗wo ˈgü. Parker ˗yö ˗ya ˗a ˗bha Nuvo Tɛsitaman ˗blɛɛsü ˈö˗ ꞊dhiëëta bhë, ˗a ˈˈpian waa˗ ˗be ꞊vadhɛ yö ˈˈkpɛnŋ ˗sü ˗bha ˗kwɛ 1842 ˈka. c

 Dhɛɛˈˈ ˗nu ˈö ˈwo yö Parker ˗yö ˗an ˗kpɔ ˗a ˗kwɛ ˈnënbha ˗ya ʒiö: «˗Dhɛ ˗mɛɛn ˈgü ˈö Kyʹri·os ˗yö ˗gban Dëmɛn Yesu ˗bha, ˈyö ˗dhɛ ˗mɛɛn ˈgü ˈö ˗gban ˗a ˈka Dëmɛn ˗Zlan ˗bha? ˈMën ˗kë ˈö Kyʹri·os ˗ya ˗kɔ ˈö ˗bɛ mɛn ˈtɔ ˗bha ˈö ˈyaa ˗bɛ mɛn ˗zë ˈtɔ ˈka ˗wo ˗bha?»

 ˗Dhɛ ˈö Parker ˗yö ˗kpan Matio ˗bha ˈsëëdhɛ ˗be waa˗ ˗zoto ˗a ˈˈpiʋ̈ ˗wɔn ˈö ˗gban Kyʹri·os ˗bha, ˈö Shadwell ˗ya ꞊dhiëëta ˗kwɛ 1859 ˈka bhë ˗an ˗bha, ˗yö ˗ga ˗a ˈgü ꞊dedewo ꞊dhɛ ˈˈtʋ̈ŋ ˈbhaa ˗nu ˈka Kyʹri·os «꞊dhiëëta ˗kɔ dua ˗mü kö ˗yö kë Zoova ˈka.» ˗A ˗wɔn ˈgü Nuvo Tɛsitaman ˈö˗ ꞊dhiëëta bhë, ˗yö ˗nu ˈzü ˈö ˗dhɛga ˗a ˈgü ˈö «Zoova» ˗ya ˗dhɛ ˈö˗ ˗bhaa ˈgü ˗a dua ˈdhö ˗mü kö ˗yö kë mü, ɛɛnˈˈ ˈö Glɛkö pö ˗kɔ ˗ya ˗zɔn ꞊dhɛ ˗a dua ˗mü kö ˗yö kë mü bhë, ˗a ˗dhɛ ˈgü. ˗Ya ˗kë ˈö Parker ˗bha A Literal Translation of the New Testament ˗be ˗dhɛ ˈö yö ˈˈkpɛnŋ ˗kwɛ 1863 ˈka bhë ˈö ˗Zlan ˈtɔ ˗yö ˗kë ˗a ˈgü ˗gɛnɲan ˈka 187. ˗Yö ˗kë ꞊dhɛ Biblö ˈˈpian ˗dhɛ ˈö ˈwo˗ ˗bɛnzë Glɛkö ˗wo ˈgü, ˗a ˗dhɛ ˗nu ˈwo ˗an yö ˈˈkpɛnŋ ꞊Glee˗ ˗wo ˈgü bhë, ˗a ˗blɛɛsü ˈö ˗Zlan ˈtɔ ˈdhö kun ˗a ˈgü ʒiaan ꞊gban ˈka, yö ˈnën bhë. d

 Parker ˗yö A Collation of an English Version of the New Testament . . . With the Authorized English Version yö ˈˈkpɛnŋ ˈpö ˗kwɛ 1864 ˈka. ˗Yö Nuvo Tɛsitaman ꞊plɛ ˗nu ˈwo bhë ˗an ˗nënŋ ˈkwëë˗ kö ˗a ˗bhaa ˈö˗ ꞊dhiëëta waa˗ do ˗sü bhë, ˈö ˗an ˗bhokopiʋ̈dhɛ ˗zɔn. e

 Parker ˗yö ö ˗kɔ ˗yɛ Biblö ˈˈɲan ˈbhaa ˗nu ˗bha Authorized Version ˈgü kö ˗ya ˗zɔn ꞊dhɛ ˗yö ˗së kö ˗Zlan ˈtɔ kë ˈzü Nuvo Tɛsitaman ˈgü. ˗A ˗bha Biblö ˈˈɲan ˗nu ˈwo bhë, ˗a do ˈnën ˗tɔ Wlɔmö 10:13. ˗Yö pö ˗sü ˈka˗ ˈgü ꞊dhɛ: «Mɛn ˈˈpɛpɛ ˈö ˈwo dho Dëmɛn ˈtɔ pö, ˗wo ˗dho dha.» Parker ˗yö dhɛɛˈˈ ˗kɔ ˈö˗ pö: «De ˈö ꞊mɔɔn˗ ˗bha ˈö˗ pö ꞊dhɛ Authorized English Version Biblö ˈˈɲan ˗nu ˈwo bhë ˗wo ˗gban Zoova ꞊nën˗ ˗bha, ˈö ˈwaa ˗gban ˗A Gbö Yesu Klito kwa Dëmɛn, [...] ɛɛnˈˈ ˗an ꞊gban ꞊plɛ ˗bha?»

 Parker ˗yö ˈwëëga ꞊va ꞊dede ˗bho kö ˗a ˗bha ˈsëëdhɛ ˈˈpɛn waa ˈsëëdhɛ ˈˈwɛɛ ˗nu ˈö ˗an ˗bɛn zë bhë ˗wo yö ˈˈkpɛnŋ kö mɛn ˗nu ˗wo ˗an dɔ. ˗Kwɛ dosɛnŋ ˈgü ˗yö ˗an ˗gɔ ˈˈsɛ ˈgü ˈwëëga 800 ˈö ʒiö ꞊dɛɛ ˈwëëga ˈˈmliɲɔn 86 ˗ta bhë ꞊nën ˗da ˗a ˈgü. ꞊Ya ˈgo mü ˈzü ˈsëëdhɛ ˗nu ˈö ˗an ˗bɛn zë bhë, ˗yö ˗a ˗be ꞊va ˗bɔ ˗a dɔmɛn ˗nu waa ˗zlanwokɔdhi ˗gɔdhiʋ̈mɛn ˈˈgblʋ̈gblʋ̈ ˗nu ˗dhɛ kö ˗wa ˗ga.

 ꞊Klaŋ ˈˈgblʋ̈gblʋ̈ ˈbhaa ˗nu ˗wo ˈˈyɩɩ ˗to ˈsëëdhɛ ˗nu ˈö ˗an ˗bɛn zë waa Nuvo Tɛsitaman ˈö˗ ꞊dhiëëta bhë ˗an ˗bha. Nuvo Tɛsitaman bhë, ˈwii ˗a ꞊va ˈˈgan. ˈˈYɩɩ ˈwo˗ to ˗a ˗bha bhë, ˗yö ꞊bhlëë ˗bho yö ˈö waa Shadwell waa mɛn ˈˈwɛɛ ˈbhaa ˗nu ˈwo˗ ˗kë, ˈö ˗kë ˗Zlan ˈtɔ ꞊dede ˗ya ꞊Glee˗ ˗nu ˗bha Nuvo Tɛsitaman ˈgü ˗sü ˈka bhë, ˗a ˗bha.

 Minitö ˗kɔŋ do video ˈö yö, ˗a ˗ga ˗sü ˗dhɔ ˗dho ü kë ˈpö: Expositions au musée de Warwick : « La Bible et le nom divin.