Jehoova maalɛɛ a teŋgane ko dɔba ane pɔgeba zaa. A teŋgane ŋa la te yiri. Azuŋ, Naaŋmen da ba maale Adama neŋ Hawaa ka ba dɔge biiri a vɛŋ ka sazu pa. Bonso Naaŋmen da maalɛɛ malekere aŋ be sazuŋ. (Joob 38:4, 7) Kyɛ Naaŋmen da mãã la o meŋɛ a maale zie kaŋa naŋ veɛlɛ yaga zaa a teŋɛzuŋ baŋ boɔlɔ ka Eedin gaadin, a pãã maale a dɛndɛŋ dɔɔ na a de o eŋ beŋ ka o kpeɛrɛ be. (Munpiilee 2:15-17) Jehoova da ko la o neŋ o biiri na oŋ na dɔge nendaare kaŋa na apoɔsori ka ba zeŋ a teŋɛzuŋ a wono noɔ̃ tegitegilɛ.​—Kanne Yieme 37:29; 115:16.

 A piilee saŋa na, a Eedin gaadin yoŋ la da e paradiisi. A dɛndɛŋ nensaaleba na da seŋ ka ba dɔge biiri a paale a teŋɛzu zaa. Wagre naŋ gɛrɛ poɔŋ na, ba biiri na meŋ na iriŋ a te maale a teŋɛzu ziiri mine ka be meŋ leɛ paradiisi. Lɛ baŋ da na e lɛɛŋ a te ta saŋa na a teŋgane zaa naŋ na leɛ paradiisi. (Munpiilee 1:28) Ba daaŋ koŋ sãã a teŋgane ŋa zaa. A teŋgane ŋa na eɛ nensaaleba yiri tegitegilɛ.​—Kanne Yieme 104:5.

 Kaa a vidio, Bonso Ka Naaŋmen Maale A Teŋgane?

 Adama neŋ Hawaa da zagrɛɛ Naaŋmen noɔre, azuŋ, Jehoova da kare baŋ baŋ yi a Eedin gaadin poɔŋ. Neɛzaa da ba lɛ kaara a Eedin gaadin na naŋ da e paradiisi na zu, azuŋ be da sããŋɛɛŋ a bɔre. A lɛ puoriŋ neŋfaare maaleŋ sããnɛɛ a teŋgane.​—Joob 9:24.​—Kanne Munpiilee 3:23, 24.

 Jehoova barɛɛ poboɔbo na oŋ da taa ko nensaaleba na bee? Ai! Ona la Kpeɛ̃o Zaa Daana. O poboɔbo na daaŋ koŋ sãã zaa. (Aizeeya 45:18) O na leɛ maalɛɛ nensaaleba ka ba waa ŋa lɛ na oŋ da boɔrɔ a munpiilee saŋa na.​—Kanne Yieme 37:11, 34.

 Saŋa na Yezu naŋ na wa dire naaloŋ a kaara a teŋɛzu na, o na maalɛɛ a teŋgane zaa ka o leɛ Paradiisi. A yi zɔɔre na baŋ boɔlɔ Hammagedon na poɔŋ, Yezu na de la Naaŋmen  malekere na weɛ ka ba wa sãã noba na zaa naŋ ba sagra Naaŋmen nɔɛ na. Beŋ la ka Yezu na nyɔge Setaana a pɔgoo yuomo turi. Ba koŋ sãã Naaŋmen noba yɛŋ a zɔɔre poɔŋ, bonso Yezu na wulo baŋ sori a go ba meŋ. Ba na nyɛɛ nyɔvore naŋ ba taa baaraa Paradiisi poɔŋ a teŋɛ ŋa zuŋ.​—Kanne Yel-iriwulaa 20:1-3; 21:3, 4.

 Bo saŋa ka Naaŋmen na vɛŋ ka yelfaare zaa baare a teŋɛzuŋ? Yezu da wulee “yeli” naŋ na wuli ka a donɛɛ baaroo peɛlɛɛŋ. Yɛlɛ na zaa naŋ erɛ pampana na vɛŋɛɛŋ aŋ e kpeɛŋaa ko nensaaleba ka ba zeŋ a teŋɛzuŋ. A yɛlɛ ŋa zaa eɛ sieree naŋ wulo ka “a teŋɛ baaroo saŋa taɛ la.”​—Kanne Matio 24:3, 7-14, 21, 22.

 Saŋa na Yezu naŋ na be sazuŋ a dire o yuoŋ turi naaloŋ a kaara a teŋgane na, o na iree dɔgɛɛ zaa bare. (Aizeeya 9:6, 7; 11:9) Yezu la te Naa, kyɛ o na lɛ toŋɛɛ Ŋmenpuore Wedeɛrɛ toma meŋ. O na toŋɛɛ a Ŋmenpuore Wedeɛrɛ toma a iri faaloŋ na zaa naŋ be noba naŋ nɔŋ Naaŋmen eŋɛŋ na bare. Azuŋ, Naaŋmen na tu la Yezu eŋɛŋ a iri baaloŋ, nyaammo, ane kũũ bare.​—Kanne Aizeeya 25:8; 33:24.

 Noba naŋ sagra Naaŋmen nɔɛ la na zeŋ a nendaare kaŋa Paradiisi na poɔŋ. (1 Gyɔɔn 2:17) Yezu da toŋɛɛ o potuuribo ka ba te bɔ noba naŋ sigri ba menne, a wuli ba lɛ baŋ na toɔ̃ erɛ yɛlɛ Naaŋmen naŋ boɔrɔ. Zenɛ ŋa, Jehoova sonnɛɛ noba turituri yaga naŋ taa teɛretɔ ka ba zeŋ Paradiisi poɔŋ a teŋɛ ŋa zuŋ nendaare kaŋa. (Zefanaiya 2:3) A yi Jehoova Sieree Deme Lammoziiri naŋ, ba maŋ de la wuluu naŋ na baŋ soŋ te ka te e ser-sonne, saamine naŋ soma, pɔg-sonne ane mamine naŋ soma a korɔ te. Bibiiri ane ba dɔgreba maŋ laŋ puoree Naaŋmen, a lɛ zanne baŋ lɛ baŋ na toɔ̃ e a nyɛ tɔnɔ yaga zaa yi a duorisoŋ poɔŋ.​—Kanne Maika 4:1-4.