Te Yɔɔdɔba ane te Yɔɔpɔgeba te naŋ nɔŋ:

Nɔmmo te naŋ taa ko Naaŋmen neŋ noba la maŋ vɛŋ teŋ ‘gaa a tenne zaa poore a te soŋ noba ka ba wa leɛ Yezu potuuribo a korɔ ba suobu meŋ.’ (Mat. 28:​19, 20; Mak. 12:​28-31) Nɔmmo meŋɛ taaɛ kpeɛ̃o yaga. Ka teneeŋ taa nɔmmo meŋɛ, te na baŋ tɔ la “noba na zaa naŋ boɔrɔ nyɔvore naŋ ba taa baaraa” na sukyie.—Tom. 13:48.

Saŋa kaŋa naŋ pare, te da maŋ de la te teɛroŋ eŋ lɛ teŋ na baŋ nyɔge yelbie mine eŋ te teɛroŋ poɔŋ a mannaa korɔ noba, ane sori teŋ na baŋ tu kyɛ derɛ gama korɔ noba a naaŋ moɔloo poɔŋ. Kyɛ, pampana ŋa, aseŋ ka te maŋ moɔ̃ niŋe a boɔrɔ soe teŋ na baŋ tu ka te neŋ noba dire dama. Ka te neŋ nobaŋ dire dama a kyaara yelzuri naŋ pɛlɛ ba poɔ, lɛ na wuliŋ ka te nɔnɔ baŋ. Lɛ wuleeŋ ka aseŋ ka te maŋ leɛrɛ te dama diibu soe, a kyɛ maŋ teɛrɛ noba yelfɛree ane ba yelboɔree yɛlɛ. Sobuo ka a gambile ŋa na toɔ̃ soŋ te ka te e lɛ?

A gambile ŋa taaɛ zannoo 12. A zannoo kaŋa zaa maŋ wuli teŋ gyogo kaŋa naŋ na baŋ soŋ te ka te wulo noba nɔmmo, a kyɛ soŋ ba ka ba wa leɛ Yezu potuuribo. A zannoo kaŋa zaa maŋ taaɛ Baabole poɔ yɛlɛ naŋ wuli lɛ Yezu, bee a dɛndɛŋ Kristabie kaŋa naŋ wuli ana gyogo na a naaŋ moɔloo poɔŋ. A gane ŋa na soŋ teŋ ka te maŋ boɔrɔ soe teŋ na baŋ tu kyɛ wulo noba nɔmmo, a ta maŋ nyɔgrɔ yɛlɛ eŋnɛ te teɛroŋ poɔŋ a mannaa korɔ noba a naaŋ moɔloo poɔŋ. Yelmeŋɛ la, a fɛrɛɛŋ ka te taa a gyogri ŋa zaa a naaŋ moɔloo poɔŋ. A gane ŋa na mannɛɛ gyogri naŋ na baŋ soŋ te ka te neŋ noba piili dama diibu, saŋa na teŋ leɛ gaa ba zie, ane saŋa na teŋ wa wulo noba a Baabole.

Saŋa na hoŋ zanna a gane na, maŋ teɛrɛ lɛ hoŋ na baŋ e a wulo a gyogri ŋa saŋa na hoŋ moɔlɔ a duorisoŋ korɔ noba naŋ be ho gbandige poɔŋ na. Mɔɔrɔ ka ho taa nɔmmo naŋ e zuluŋ ko Jehoova ane noba. Lɛ zaa te naŋ baŋ yɛlɛ aseŋ, kyɛ nɔmmo te naŋ taa ko noba la maŋ vɛŋ teŋ toɔ̃ soŋ ba baŋ wa leɛ Yezu potuuribo.

Te de la apoɔsori na te naŋ taa ka te ne yɛ laŋ tonɔ Jehoova toma na tegroŋ yaga zaa. (Zef. 3:9) Jehoova na ko yɛŋ maaloo yaga saŋa na yɛ naŋ moɔ̃ niŋe a nɔnɔ noba, a kyɛ sonnɔ ba ka ba wa leɛ Yezu potuuribo na!