Mbo̱lo̱n ebolo ńe ná e wanea moto mitakisan ma mo̱ni, nde ńe pe̱ ná e wana mitakisan o ndabo a mbia, ndut’a mulema na tabilane̱ pe̱ moto. Man malea mena ma se̱medi o bete̱sedi ba Bibe̱l be si matombe̱ ponda me ná mongwane̱ wa o lembe̱.

•   Langwea bane̱ ne̱ni o masengano̱.

   Nje Bibe̱l e makwalano̱: “Diko̱m la mbale̱ di malee̱le̱ ndolo ponda te̱.”—Minia 17:17.

   Moto a bo̱lo̱ne̱ te̱ ebol’ao, nika ńe ná e wanea mo̱ ndut’a mulema, malinga to̱ tabilane̱ mo̱, to̱ mo̱me̱ne̱ bola ná o̱nge̱le̱ ná a si tongwe̱le̱. O langwedi te̱ belongi bo̱ngo̱ ba mbia to̱ mako̱m ne̱ni o masengano̱, be ná ba wanea wa jongwane̱. Be pe̱ ná ba bola wa malea me ná mongwane̱ wa o so̱ ebolo epe̱pe̱.

•   O si bwa ndutu buka dime̱ne̱.

   Nje Bibe̱l e makwalano̱: ‘Lo si no̱ngo̱ mutaka ońola buńa ba kie̱le̱; ebanja buńa ba kie̱le̱ bo me̱nde̱ no̱ngo̱ mutaka ońol’ao mo̱me̱ne̱.’—Mateo 6:34.

   Bibe̱l e mome̱le̱ biso̱ ná di be̱ ye̱ne̱. (Minia 21:5) Nde e mome̱le̱ pe̱ biso̱ ná di si no̱ngo̱ mutaka buka dime̱ne̱ ońola kie̱le̱ ni maye̱. Ponda iwo̱ di yo̱ki no̱ngo̱ mutaka buka dime̱ne̱ ońola mambo mena ma si mapo̱ to̱ buńa. Ye bwam ná di be̱ mususu o nje jeno̱ ná di bola tatan.

   Bibe̱l e mabola malea ma bwam mape̱pe̱ ma mongwane̱ o wamse̱ ndut’a mulema. Langa mulopo m’ekwali “Ne̱ni lembe̱ mutaka” ná o bate so̱ṅtane̱.

•   Wutise̱ mabusise̱ mo̱ngo̱.

   Nje Bibe̱l e makwalano̱: “Noko . . . tute̱ na take.”—Filipi 4:12.

   Ko̱lo̱ngo̱ne̱ bete̱medi bo̱ngo̱ ba peńa. Nika e mapula nde kwala ná, ná mo̱ni mwena o be̱nno̱ mu dongame̱n wa, wangame̱n wutise̱ mabusise̱ mo̱ngo̱ ná o si busise̱ buka nje yena o be̱nno̱. No̱ngo̱ jangame̱ye̱ ná o si no̱ngo̱ beto̱m be si mapule̱.—Minia 22:7.

   Mulopo m’ekwali “Niponda bekusedi bo̱ngo̱ be wutono̱” mu be̱n malea mape̱pe̱ ma me̱nde̱ jongwane̱ wa o bola ná mabusise̱ mo̱ngo̱ ma be̱ bupisane̱ bekusedi bo̱ngo̱.

•   Bolane̱ pond’ango̱ bwam.

   Nje Bibe̱l e makwalano̱: “Dangwa na dibie̱ . . . , bolane̱ ponda bwam.”—Kolose 4:5.

   To̱ná o si be̱nno̱ pe̱ ponda ni te̱se̱be̱ ońol’ebol’a musawedi, bolane̱ te̱ nde ponda bwam. Bola la nika di me̱nde̱ jongwane̱ wa o we̱le̱ o̱da o longe̱ lo̱ngo̱, na be̱ne̱ye̱ pe̱ wame̱ne̱ edube.

•   Emea tukw’ebolo.

   Nje Bibe̱l e makwalano̱: “Ntu na ntu mu mawana muse̱ṅ.”—Minia 14:23.

   Be̱ be̱be̱ o bola ebolo ye diwengisan na yena o tano̱ o bola kwaṅ. O si ye̱use̱ ebolo to̱ ewo̱ ońolana ye eye̱me̱ki, to̱ ońolana musawedi mao mu salo kobisan na nje yena o tano̱ o kusa kwaṅ.

•   Be̱ titimbe̱.

   Nje Bibe̱l e makwalano̱: “Myase̱le̱ mbolako ango̱ idiba, o s’ese̱le̱ pe̱ to̱ dia lo̱ngo̱ di wumse̱ ebiamu. Ebanja o si bi ni ni me̱nde̱ tongwe̱.”—Mulangwedi 11:6.

   O si bo̱bo̱! Langwea be̱se̱ ná we o wasa ebolo. Langwea belongi bo̱ngo̱ ba mbia, beko̱lo̱ngo̱n, mako̱m m’ebolo ma kwaṅ, na myoyo ma mboa na nika. Wase̱le̱ mibia ma myoyo mi makuseye̱ bato bebolo, na ma myoyo ma bebolo mo̱me̱ne̱ o internet, ńuspepa, radio na nika. O si dimbea ná e me̱nde̱ pula ná o lome mapapa o miyo jita na kwala pe̱ na basango ba bebolo jita denge̱ o makusa ebolo.