Moto ńe titimbe̱ a mala oboso to̱ mambo ma bobe ma ko̱ye̱ nde mo̱. Di si mayabane̱ y’ede̱mo, na ponda nde di mabe̱ne̱no̱ mo̱. Ka ne̱ni te̱ muna a titino̱ ná okwa o dangwa esibe̱ ko̱ mbe̱i ponda iwo̱, nika pe̱ nde a titino̱ ná a tongwe̱le̱ o longe̱ esibe̱ kusa mitakisan ponda iwo̱.

Bana bō̱ ba mabo̱bo̱ ke̱ ba si tongwe̱le̱ o bola lambo, ke̱ ba kusi mitakisan to̱ ke̱ ba sai babo̱. Bape̱pe̱ ba si mapo̱ngo̱ pe̱ miwe̱n to̱ mō̱. Nde bana bangame̱n so̱ṅtane̱ ná:

• Di titi ná di tongwe̱le̱ nje ye̱se̱ di mabolano̱.​—Yakobo 3:2.

• Mō̱ ńasu te̱ e ná a so̱be̱ o bete̱medi ba ndutu.​—Mulangwedi 9:11.

• Misan me mweńa jita yete̱na di mapula o ńaka.​—Minia 9:9.

Be̱ la titimbe̱ di me̱nde̱ jongwane̱ mun’ango̱ o lembe̱ mitakisan ma longe̱ na mbaki.

Mun’ango̱ a po̱ngi te̱ diwuse̱.

BETE̱SEDI BA BIBE̱L: “Nute̱m na sim a mako̱ ngedi samba, nde a mate̱me̱ pe̱te̱.”​—Minia 24:16.

Ongwane̱ mun’ango̱ o bia me̱ne̱ nate̱na o njika dikala bete̱medi bō̱ beno̱ bobe to̱ ke̱m. K’eyembilan, nje a me̱nde̱no̱ bola yete̱na a kwedi kekise̱ o esukulu e? Nika ńe ná e bo̱bise̱ mo̱, na mo̱ o̱nge̱le̱ ná a titi ná a bola to̱ lambo bwam.

Ná wokwe̱le̱ mun’ango̱ titimbe̱, ongwane̱ mo̱ o bia nje bola ná a tongwe̱le̱ ngedi nipe̱pe̱. Na nika, a me̱nde̱ keka buka be bete̱medi, nika ńeka pe̱ mo̱ o be̱ne̱ mo̱nge̱le̱ ma bobe.

O mulemlem ma ponda, o si po̱ngulane̱ mambo o epol’a mun’ango̱. Ongwane̱ nde mo̱ o so̱ mwano ma te̱se̱ mambo na mo̱me̱ne̱. We ná o baise̱ mo̱ myuedi ka min: “Nje weno̱ ná o bola ná o we̱le̱ so̱ṅtane̱ nje bińo̱ lokono̱ o klasi e?”

Mitakisan mi po̱i te̱.

BETE̱SEDI BA BIBE̱L: “Lo si [bi] nje e me̱nde̱ be̱ kie̱le̱.”​—Yakobo 4:14.

Di si bi ne̱ni kie̱le̱ e me̱nde̱no̱ be̱. Moto ńe m’bwaṅ we̱nge̱ e ná a ko̱ tue kie̱le̱; nu pe̱ nu jai bwam  we̱nge̱ e ná a ko̱ diboa kie̱le̱. Bibe̱l e makwala ná: “Bowe̱n ba mīla bo si mawa o makwasi, to̱ bebukedi ba bila o ngińa, . . . ebanja ponda na muyo̱mbo̱ ma mambo nde ba be̱n me̱se̱.”​—Mulangwedi 9:11.

Nika weno̱ muyedi, o be̱n bwam o bola nje ye̱se̱ ye o ngud’ango̱ ná o tate mun’ango̱ na mbeu a ńolo. Nde, mbale̱ ńe nde ná o titi ná o tata mun’ango̱ na mambo ma bobe me̱se̱.

Ye mbale̱ ná mun’ango̱ a si po̱i mimbu ma bia nje ye bo̱lo̱ne̱ l’ebolo to̱ ko̱ la tue. Nde we ná wongwane̱ mo̱ o bia lembe̱ mitakisan mipe̱pe̱, k’eyembilan yete̱na a wan myambo na diko̱m lao diwo̱ to̱ yete̱na elong’a mbia ewo̱ e wedi. *

Mun’ango̱ a kusi te̱ misan.

BETE̱SEDI BA BIBE̱L: “Senga malea . . . ná o tate be̱ dibie̱ ombusa ponda.”​—Minia 19:20.

Moto a sai te̱ mun’ango̱ jombwea mambo mō̱, a titi o pula bwese̱ mo̱ ndutu, e nde o jongwane̱ mo̱ o po̱ngulane̱ nje e si male̱.

Wokwe̱le̱ te̱ mun’ango̱ o bia kasa malea, bińo̱ babane̱ lo matombwane̱. Sango a bana mō̱ nu belabe̱ ná John a kwali ná: “Bana ba s’oko te̱ o po̱ngulane̱ mawuse̱ mabu, ba si me̱nde̱ be̱ dibie̱. Ba me̱nde̱ nde be̱ne̱ mitakisan mo̱ na mo̱ o longe̱ labu, nde e pula pe̱ ná bayedi babu nde ba tike jongwane̱ babo̱. Nik’e matakise̱ longe̱ la bayedi na la bana.”

Ne̱ni weno̱ ná wongwane̱ mun’ango̱ o kasa beko̱kisedi e? Mun’ango̱ a ko̱kisabe̱ te̱, e be̱ o esukulu to̱ o epolo epe̱pe̱, o si kwala ná nika e si ta e te̱nge̱ne̱. O diwengisan, baise̱ mo̱ myuedi ka min:

• “Ońola nje o ko̱kisabe̱no̱ e?”

• “Ne̱ni weno̱ ná o po̱ngulane̱ mambo e?”

• “Ngedi nipe̱pe̱, nje o me̱nde̱no̱ bola ke̱ we o bete̱medi ka ben e?”

O si dimbea ná malea to̱ beko̱kisedi mun’ango̱ a makusano̱, ba mende̱ pe̱ jongwane̱ mo̱ o bokoka bao.