MONGO ma se̱le̱ ma lee̱ pat’a mitakisan ma ngińa mi mabole̱ ná longe̱ le̱ne̱ne̱ ndutu jita. We te̱ lembe̱ mitakisan, we ná o baise̱ wame̱ne̱ nga ye njo̱m o be̱ longe̱ na nga moto a mombwea wa. Be̱ mbaki ná Loba a mombwea ndut’ango̱. We mo̱ tiki.

Mutiled’a kalat’a Myenge 86 a kwali ná a lakisan Loba: “Na mabele̱ wa o buńa ba ndutu, ebanja o masengane̱ mba.” (Myenge 86:7) Nde we ná o baise̱ wame̱ne̱ ná ‘Ne̱ni Loba a masengane̱no̱ mba “o buńa ba ndutu”e?’

To̱ e be̱ nde ná Loba a si me̱nde̱ bo̱le̱ mitakisan mo̱ngo̱ dibokime̱ne̱, Eyal’ao Bibe̱l e mabola wa mbaki ná e ná a bola wa musango ma teten o jongwane̱ wa o lembe̱: “Lo si no̱ngo̱ mutaka ońola to̱ lambo, nde o mambo me̱se̱ ese̱le̱ ná mpuli mańu mu biane̱ oboso ba Loba tongwea na muka na beso̱so̱medi na bola la masoma. Nde musango ma Loba mwena mu buki dibie̱ le̱se̱ mu me̱nde̱ kombe̱ milema mańu na mo̱nge̱le̱ mańu o Kristo Yesu.” (Filipi 4:6, 7) Son ombwea ne̱ni ben bepasi ba Bibe̱l be mabupe̱ be mabolano̱ mbaki ná Loba a mombwea biso̱ na mbale̱.

“To̱ [injanga] iwo̱ i si dimbabe̱le̱ oboso ba Loba. . . . Lo buki jita la lonjanga.”​—Lukas 12:6, 7.

DUTEA TE̱: Lono̱n losadisadi ka lonjanga le ná lo s’e̱ne̱ne̱ mweńa ońola jita la bato, nde Loba a mombwea mo̱. Loba a me̱ne̱ injanga te̱; iwo̱ te̱ ye nde ewekedi ye mo̱ tiki. Bato ba benama be tiki buka lonjanga o miso̱ ma Loba. Bato ba benama nde be bewekedi be buki be̱se̱ o wase. Ba wekabe̱ o “bowan” ba Loba, be pe̱ ná ba sa na lee̱ bede̱mo bao ba betańsedi.​—Bebotedi 1:26, 27.

“A Yehova, wa o mawasa mba, o bi pe̱ mba. . . . O mapomane̱ so̱ jo̱nge̱le̱ lam . . . Keka mba, o so̱ mo̱nge̱le̱ mam!”​—Myenge 139:1, 2, 23.

DUTEA TE̱: Loba a bi wa bwambwam. A bi besengedi bo̱ngo̱ na mitaka mo̱ngo̱ me̱se̱. To̱ e be̱ nde ná bane̱ ba titi ná ba so̱ṅtane̱ mitakisan mo̱ngo̱ na ndut’ango̱, Loba a mombwea wa, a mapula pe̱ jongwane̱ wa. Ońola nika so̱, ye njo̱m ná o be̱ longe̱.

“A Yehova, senga muka mam, ese̱le̱ musea mam mu po̱ oboso bo̱ngo̱. . . . Le̱ke̱ toi lo̱ngo̱ na mba o buńa na meyane̱no̱ wa; wamse̱ jalabe̱ mba. . . . A sengan muka ma nukelabe̱.”​—Myenge 102:2, 3, 18.

DUTEA TE̱: Ye nde biana botea ponda bato ba benama ba botedino̱ o taka, Yehova a maki miso̱di me̱se̱ ba komno̱. (Myenge 56:9) Miso̱di mo̱ngo̱ pe̱ me oten. Loba a mo̱nge̱le̱ mitakisan na miso̱di mo̱ngo̱ me̱se̱.

“O si soa, ebanja mba nde ne Loba lo̱ngo̱, na membe̱ wa, na mongwane̱ pe̱ wa . . . Mba nde ne Yehova, Loba lo̱ngo̱ . . . nu makwalane̱ pe̱ wa na: O si bwa bo̱ngo̱, na mongwane̱ wa.”​—Yesaya 41:10, 13.

DUTEA TE̱: Loba a le̱le̱m o jongwane̱ wa. O kwedi te̱, a me̱nde̱ te̱se̱ wa.

“Ebanja ninka nde Loba a to̱ndino̱ wase ná a boli mpo̱m mao ma Muna, ná to̱ nja nu dube̱ mo̱ a si mańama, nde a mabe̱ne̱ longe̱ la bwindea.”​—Yohane 3:16.

DUTEA TE̱: We Loba tiki o dikala lena a bolino̱ Mun’ao Yesu, ka jabea ońol’ango̱. Di jabea di mabola wa dipita la be̱ne̱ longe̱ la bonam, di be̱n pe̱ janda, o bwindea. *