BATO ba muwaso ba so̱i o Babilon ńa kwaṅ lodun la briki bipabe̱, bena ba tano̱ ba bolane̱ o longa mu mundi. Bupisane̱ mot’a muwaso Robert Koldewey, yi ńai a briki i ta nde i po̱ngo̱be̱ o miyo̱ ma ta “ombusa mundi, owe̱ni o tano̱ o be̱ne̱ weya ńa bwam na bebongo jita ba wusano̱ bolane̱ ońola wea.”

Bamuwaso ba so̱i mboṅ i malee̱ ná banedi ba Babilon ba ta pe̱ ba bolane̱ ma miyo̱ ońola mambo ma konjo. Paul-Alain Beaulieu ńe mulēdi o Universite ńa Toronto, a kwali ná: “Jita la betiledi ba Babilon be malee̱ ná kiṅe̱ e ta be̱ e bola o̱da ná bato bena ba si sengane̱ mo̱ to̱ ba lou maloba, ba pimbabe̱ o diyo̱ la wea.” K’eyembilan, betiledi bō̱ ba pond’a kiṅe̱ Nebukadnesar be makwala ná: “Bumbise̱ babo̱, dise̱ babo̱, bumba babo̱, . . . o diyo̱ la wea . . . bola ná itutu abu i ńo̱nge, bwa babo̱ na wea.”

Nik’e mo̱nge̱le̱ balange̱ Bibe̱l myango mi tilabe̱ o kalat’a Daniel bepasi 3. Di malanga oten ná kiṅe̱ Nebukadnesar a ta a po̱ngo̱ njimbid’a gol ńasam o sanj’a Dura, ombusa mundi ma Babilon. Ponda beso̱mbe̱ ba Bonahebe̱r belalo be mabelabe̱ ná Sadrak, Mesak na Abednego be bangino̱ jowe̱ ni njimbidi, Nebukadnesar oń na malinga na mo̱ a bola doi ná ba bate bota wea o diyo̱ “ngedi samba buka ne̱ni e tano̱ e pula,” ba “pimbe babo̱ o diyo̱ la wea.” Ange̱l a ngińa po̱ e sungi babo̱ ná ba si wo̱.​—Dan. 3:1-6, 19-28.

Briki be so̱be̱ o Babilon pe̱ be malee̱ ná Bibe̱l ńe te̱ite̱i. Jita la be briki be be̱n matila ma masese̱ kiṅe̱. K’eyembilan, matila mō̱ ma makwala ná: “Nebukadnesar, kiṅ’a Babilon . . . Bolongi bwena mba, kiṅe̱ ninde̱ne̱ na longino̱ . . . Mbot’am ńaneye oten o bwindea.” Ma matila me bowan jita na nje e tilabe̱ o Daniel 4:30, wuma Nebukadnesar a masese̱no̱ ná: “Seto̱ nin nde ńe Babilon ninde̱ne̱ na longino̱ ka boja ba kiṅe̱ na ngiń’a ngum am, ońol’edub’a jasame̱ lam e?”