Tinda m’boko mo̱ngo̱ ma mako̱m
Nje ye njo̱m
Di pandi te̱ etum na bato di be̱nedino̱ mo̱nge̱le̱ ma bobe, di mabata nde be̱ ndando. Ye pe̱ te̱ ná mako̱m masu me nde bato be ka biso̱ buka te̱, je ná jo̱nge̱le̱ ná mbad’asu ńa dutea, ńa senga na ńa bola mambo nde ńe mpete̱.
Bete̱sedi ba Bibe̱l
“Bińo̱ pe̱ tele̱ milema mańu na bwē.”—2 KORINTO 6:13.
Nika ńe nde ná nje e? Owan “mulema” masu mwe nde nje di to̱ndino̱ na nje di masengano̱. Di to̱ndi te̱ bato be ka biso̱ buka te̱, mulema masu mu makakame̱. Ná nika e si po̱ye̱ biso̱, jangame̱n be̱ be̱be̱ o be̱ mako̱m na bato be diwengisan na biso̱.
Ne̱ni tinda la m’boko masu ma mako̱m di mongwane̱no̱
Joko te̱ o bia bane̱ bwam di mabotea so̱ṅtane̱ ońola nje ba si mabolano̱ mambo ka biso̱. Nika di masiseano̱ babo̱ be̱be̱, nika pe̱ nde di madimbeano̱ ná be diwengisan na biso̱. Di mabenga so̱ to̱ndo̱ babo̱, na we̱le̱ biso̱me̱ne̱ o epol’abu.
Jombwe eyembilan a Nazaré. A ta a be̱ne̱ mo̱nge̱le̱ ma ndando ońola bato ba mawe̱ o bekombo bepe̱pe̱. A lango nje yongwane̱ mo̱, mo̱ ná: “Na jaino̱ na babo̱ di bola pe̱ ebolo mwemba, na so̱i ná be diwengisan jita na nje e ta e kwalabe̱ ońol’abu. O timbi te̱ diko̱m na bato ba tumba dipe̱pe̱, o maso̱ṅtane̱ ná babo̱ be̱se̱ ba titi ńai po̱, o mabenga pe̱ to̱ndo̱ na bola mō̱ ńabu te̱ edube.”
Nje weno̱ ná o bola
Wasa ne̱ni kwala na bato ba ekombo epe̱pe̱, ba tumba dipe̱pe̱, to̱ bena ba be̱n eyem’a bwambo ye diwengisan na yo̱ngo̱. We ná o
-
Baise̱ babo̱ ná ba langweye wa ba nja beno̱.
-
Bele̱ babo̱ o da mwemba na wa.
-
Lambe̱ye̱ babo̱ toi ná o so̱ nje ye babo̱ mweńa o longe̱.
O keki te̱ o so̱ṅtane̱ mambo ba kusino̱ o longe̱, o mabia ońola nje beno̱ ka ne̱ni beno̱. Nik’e mabola ná o bate to̱ndo̱ babo̱ na bato ba tumba labu.
