Ońola nje di be̱nno̱ ńo̱ng’a Janea la Loba e?
O bebotedi ba myango ma mbel’a moto, Muweked’asu nu be̱n dina ná Yehova, nde a ta mpo̱m ma Mwanedi. A ta anea na ndolo. A po̱ngi mōnda ma Eden ka wum’a boja ya mpesa ońola bato ba benama. A bola pe̱ babo̱ da njoasoa. O mbat’a nika, a boli pe̱ bato ba benama ebolo yena ba wusano̱ bwane̱ muńe̱nge̱. (Bebotedi 1:28, 29; 2:8, 15) Mbel’a moto e wusa so̱ be̱ musango yete̱na e tika be̱ owas’a bediedi ba ndolo ba Loba.
Bato ba benama baboso ba bangi Loba ka Mwaned’abu
Bibe̱l e makwala ná ange̱l a pamo po̱, ni timbi belabe̱ ná Satan Diabolo, e te̱nge̱ne̱ bwam bwena Loba a be̱nno̱ o die̱le̱. E ta nde e pula kwala ná, ná bato ba benama ba be̱ bonam, ba s’angame̱n be̱ owas’a bediedi ba Loba. Bobe bwe nde ná Adam na Eva ba dube̱ mu mpoṅ ma Satan, na babo̱ ba kwe̱me̱ Loba.—Bebotedi 3:1-6; Bebīsedi 12:9.
Adam na Eva ba bo̱lo̱ne̱ Paradisi ńabu, na dipita la be̱ longe̱ na be̱ne̱ ja la bwam o bwindea, ońolana ba bangi Loba ka Mwaned’abu. (Bebotedi 3:17-19) Bedomsedi babu be tapi pe̱ bana bena ba yaino̱ ombusa ponda. Bibe̱l e makwala ná, ońolana Adam a boli bobe, ‘bobe bo po̱i o wase . . . Kwedi pe̱ ońola bobe.’ (Roma 5:12) Lambo la bobe dipe̱pe̱ nika e wanno̱ le nde ná: “Mō̱ a manea nune̱ o sebea mo̱ mbeu a ńolo.” (Mulangwedi 8:9) Nik’e mapula nde o kwala ná etum te̱ bato ba benama ba madie̱le̱no̱ babo̱me̱ne̱, mitakisan mi me̱nde̱ te̱ nde o be̱.
BEBOTEDI BA BYANEDI BA MOT’A BENAMA
Nimrod a te̱nge̱ne̱ Yehova
Mwanedi ńaboso Bibe̱l e makwaleano̱ e nde Nimrod. A te̱nge̱ne̱ byanedi ba Yehova. Botea o mińa ma Nimrod, bato bena ba ta ba be̱ne̱ doi, ba bolane̱ ngiń’abu o banda bato bape̱pe̱. Ye we̱nge̱ lambo ka 3 000 la mbu Kiṅe̱ Salomo a tilino̱ ben byala: “Na mba ne̱ne̱ . . . miso̱di ma ba ba matusabe̱ mi ta myo̱ndo̱, nde mulo̱kedi a si ta ońol’abu. Ne̱n mabadan ma bato ba njo.”—Mulangwedi 4:1.
Nika pe̱ nde yeno̱ we̱nge̱. O mbu 2009, kalati po̱ ńa Bekombo be lati e kwali ná njo̱m po̱ ni mabole̱ ná mambo ma be̱ bobe we̱nge̱ ńe nde mbad’a die̱le̱ ńa bobe.
YĀ SO̱ PONDA!
Wase e be̱n ńo̱ng’a janea la bwam na badiedi ba bwam. Nika pe̱ nde Muweked’asu a kakane̱no̱!
To̱ mbad’a die̱le̱ ńa mot’a benama ni peti bwam e si tongwe̱le̱ o bo̱le̱ mitakisan ma mbel’a moto
Loba a te̱se̱ Janea lena di me̱nde̱ timbane̱ manea ma bato me̱se̱, nde mo̱me̱ne̱ “di tingame̱ po̱ko̱po̱ko̱.” (Daniel 2:44) Ońola di janea nde bato jita ba makane̱no̱. (Mateo 6:9, 10) Nde seto̱ mo̱me̱ne̱ Loba nde a me̱nde̱ janeye̱. A po̱si nde moto nu ta o nin wase o be̱ Mwanedi. Nja so̱ Loba a po̱sino̱ e?
