SAAN 500 ni kɔ ka kɔn Yezu woloni ɲɛ, kira Daniyɛli ye ɲɛnamaya kɛ. O bɛɛ n’a ta, Jehova ye kunnafoni dɔw di a ma minw tun bena mɔgɔw dɛmɛ u k’a lɔn tuma min na Yezu tun bena mɔ hakili senu la ka kɛ Masiya ye, o kɔrɔ Krista. A fɔra Daniyɛli ye ko: ‘I k’a lɔn k’a jɛya ko kabini Jerusalɛm dugu sigili ni a jɔli ko fɔra fo ka taa se Kuntigi Munnen ka waati ma, o na  kɛ lɔgɔkun wolonwula ni lɔgɔkun biwɔɔrɔ ni fila ye.’—Daniyɛli 9:25, ABM.

O la, wagati dɔ tun bena tɛmɛ sanni Masiya ka na. Walisa ka se ka Masiya natuma lɔn, fɔɔ an k’o wagati daminɛ tuma lɔn fɔlɔ. Ka kɛɲɛ ni kiraya kuma ye, o wagati be daminɛ “kabini Jerusalɛm dugu sigili ni a jɔli ko fɔra.” O fɔra tuma juman le? Ka kɛɲɛ ni Bibulu sɛbɛbaga Neemi ka fɔta ye, “masacɛ Aritasɛrisɛsi ka masaya san mugannan na,” cii dira ko Jerusalɛm dugu lamini kogow ka lɔ kokura (Neemi 2:1, 5-8). Tariki sɛbɛbagaw be seereya kɛ ko Aritasɛrisɛsi ka masaya saan fɔlɔ dafara saan  474 kɔnɔ Krista tile ɲɛ. O kama, a ka masaya saan 20nan be bɛn saan 455 ma Krista tile ɲɛ. Daniyɛli ka kiraya kuma min ɲɛsinna Masiya ma, an b’a lɔn sisan ko o daminɛna saan 455 la Krista tile ɲɛ.

Wagati min tun bena tɛmɛ sanni “Kuntigi Munnen” ka na, Daniyɛli tun y’a yira ko o tun bena kɛ ‘lɔgɔkun wolonwula ni lɔgɔkun biwɔɔrɔ ni fila’ ye, o kɔrɔ, lɔgɔkun 69. O be bɛn wagati joli ma? Bibulu bayɛlɛmabaga caaman b’a fɔ ko o tɛ tile wolonwula lɔgɔkun ye nka lɔgɔkun kelen-kelen bɛɛ be jati saan wolonwula ye. Galen, Yahutuw tun ka teli ka wagati jati o cogo la. Ɲɛyirali fɛ, saan wolonwulanan o saan wolonwulanan tun ye lafiɲɛsan ye u fɛ (Ekizɔdi 23:10, 11). O kama, kira Daniyɛli ye lɔgɔkun 69 minw kofɔ, u be bɛn saan 7 sigiyɔrɔman 69 ma, o kɔrɔ, saan 483.

A tɔɔ tora ka jatili kɛ sisan. N’an y’o saan 483 jatili daminɛ saan 455 la Krista tile ɲɛ, an be taga bɛn saan 29 ma Krista tile la. O saan tigitigi lo la Yezu batizera ani a kɛra Masiya ye! * (Luka 3:1, 2, 21, 22). O Bibulu kiraya kuma dafara cogo kabakoman na dɛ! Tiɲɛn tɛ?