KALANSEN 4
Yezu Krista ye jɔn lo ye
1. Yezu ka ɲɛnamaya daminɛna cogo di?
Yezu ka jogo jumanw tun b’a to mɔgɔw tɛ siran ka gwɛrɛ a la?—MATIYO 11:29; MARIKI 10:13-16.
Yezu ni adamaden tɔɔw tɛ kelen ye. Ale tun ye mɛlɛkɛ ye sankolo la ka sɔrɔ ka na wolo dugukolo kan (Zan 8:23). A tun ye Ala ka danfɛn fɔlɔ ye ani Ala tɛmɛna ale lo fɛ ka fɛɛn tɔɔw bɛɛ dan. Jehova ye Yezu kelenpe lo dan n’a yɛrɛ bolo ye. O kama a bɛnnin lo ka weele ko Ala Dencɛ “kelenpe bangelen.” (Zan 1:14, NW ). Yezu tun ye Ala ka kuma lasebaga ye. O kama, a be weele fana ko “Kuma.”—Talenw 8:22, 23, 30; Kɔlɔsikaw 1:15, 16 kalan.
2. Mun na Yezu nana dugukolo kan?
Ala y’a Dencɛ ci ka na dugukolo kan. A y’a niin ta sankolo la k’a don npogotigi Mariyama wolonugu la, o min tun ye Yahutu ye. O cogo la, Yezu facɛ ma kɛ adamaden ye (Luka 1:30-35). Yezu nana dugukolo kan kuun saba lo kama: 1) K’an dɛmɛ ka tiɲɛn lɔn Ala koo la, 2) k’a yira cogo min na mɔgɔ be se ka Ala sago kɛ hali ni gwɛlɛyaw b’a kan, ani 3) k’a niin dafanin di ka kɛ mɔgɔw “kunmabɔ sara” ye.—Matiyo 20:28 kalan.
3. Mun na an mako be kunmabɔsara la?
Kunmabɔsara ye wari daa dɔ ye min be sara walisa ka saya jalaki bɔ mɔgɔ dɔ kan (Ɛkisɔdi 21:29, 30). Ala ma adamadenw dan walisa u ka kɔrɔ ani ka sa. An b’o lɔn cogo di? Ala y’a fɔ cɛɛ fɔlɔ Adama ye ko n’a ye jurumu kɛ, a bena sa. O la, ni Adama tun ma jurumu kɛ, a tun tɛna sa abada (Zɛnɛsi 2:16, 17; 5:5). Bibulu b’a ɲɛfɔ ko jurumu “donna” duniɲa na Adama kosɔn. O cogo la, Adama ye jurumu lase a bɔnsɔnw bɛɛ ma. O jurumu lo nana ni saya ye an kan. Saya jalaki min be an kan Adama kosɔn, an mako be kunmabɔsara la walisa k’o bɔ an kan.—Ɔrɔmukaw 5:12; 6:23 (ABM) kalan.
Jɔn lo tun be se ka kunmabɔsara di walisa k’an hɔɔrɔnya ka bɔ saya bolo? N’an sara, an be an yɛrɛ ka jurumuw lo sara. Adamaden dafabali si tɛ se k’a mɔgɔɲɔgɔnw ka jurumuw juru sara.—Zaburuw 49:8-10 kalan.
4. Mun na Yezu sara?
Yezu tun tɛ komi anw. A tun ye mɔgɔ dafanin ye, a ma jurumu si kɛ ka ye. O kama, a ma sa a yɛrɛ ka jurumuw kosɔn. Nka a sara mɔgɔw ka jurumuw lo kosɔn. Ala ye adamadenw kanu haali, fɔɔ a y’a Dencɛ ci ka na sa anw kosɔn. Yezu fana y’a yira ko a b’an kanu sabu a ye mɛnni kɛ a Faa fɛ ani a sɔnna k’a niin di an ka jurumuw kosɔn.—Zan 3:16; Ɔrɔmukaw 5:18, 19 kalan.
Videwo nin filɛ: Mun na Yezu sara?
5. Yezu be mun lo kɛra bi bi nin na?
Ka Yezu to dugukolo kan, a ye banabagatɔw kɛnɛya, ka suuw lakunu, ani ka mɔgɔw bɔ u ka tɔɔrɔ koow la. O cogo la, a y’a yira a bena na min kɛ adamadenw ye, minw bɛɛ be mɛnni kɛ Ala fɛ (Matiyo 15:30, 31; Zan 5:28). Yezu sara, nka Ala y’a lakunu k’a kɛ mɛlɛkɛ barikaman ye (1 Piyɛri 3:18, ABM ). O kɔ, Yezu sigira Ala kini fɛ ka kɔnɔni kɛ fɔɔ Jehova k’a sigi Masaya la dugukolo kuru bɛɛ kun na (Eburuw 10:12, 13). Sisan, Yezu be masaya la sankolo la, ani a ka kalandenw b’o kibaro diiman fɔra mɔgɔw ye duniɲa bɛɛ kɔnɔ.—Daniyɛli 7:13, 14; Matiyo 24:14 (ABM) kalan.
Yanni dɔɔni, Yezu bena tɔɔrɔ koow bɛɛ ban ani ka mɔgɔ juguw halaki a ka masaya barika la. Mɔgɔ minw bɛɛ be limaniya Yezu la ani u be mɛnni kɛ a fɛ, olu bena ɲɛnamaya kɛ alijɛnɛ kɔnɔ dugukolo kan.—Zaburuw 37:9-11 kalan.
