Ala tɔgɔ senuman be Jehova Seerew ka Masaya Boon kelen kelen bɛɛ kan. O kama, an b’a jati ko nɛɛma lo an fɛ ka Masaya Boon saniya ani k’a ladon ka ɲɛ. O fana ye an ka batoli senuman fanba dɔ ye. Bɛɛ be se k’a seen don o baara la.

Lajɛn bannin kɔ, a ɲini k’i seen don a saniyali koo la. Lajɛn kelen kelen bɛɛ bannin kɔ, a ka di balimaw ye ka Masaya Boon saniya dɔɔni ani k’a ladon. Siɲɛ kelen lɔgɔkun kɔnɔ, u b’a saniya bɛrɛbɛrɛ. Baara tigitigi minw ka kan ka kɛ k’a saniya, olu sɛbɛra ka bila. Diinan mɔgɔkɔrɔ wala kɔrɔsigi ciden dɔ lo b’a saniyako ɲɛminɛ ka kɛɲɛ n’o baara kɛtaw ye. Balimaw b’u yɛrɛ di ka baara dɔw kɛ, i n’a fɔ: ka boon filan, k’a jɔsi, ka gwangwan bɔ, ka ɲɛgɛnw ko ani ka fura don u la, ka finɛtiriw ni dugalenw jɔsi, ka ɲamaɲamaw bɔ ka taga u fili, ka boon kɛnɛmala filan wala ka zaradɛn ladon. Saan kɔnɔ, u be loon kelen ɲɔgɔn latigɛ ka taga a saniya mɛnɛmɛnɛ. N’an b’an deenw niin don o baara dɔw la, an b’u degi u ka bonya la an ka batolikɛyɔrɔ kan.—Waajulikɛla 4:17.

Dɛmɛ don k’a yɔrɔ tiɲɛninw lalaga. Saan o saan, an be Masaya Boon kɔnɔna n’a kɛnɛmala sɛgɛsɛgɛ koɲuman. O b’an dɛmɛ k’a yɔrɔ tiɲɛninw lalaga walisa a ka to cogoya ɲuman na. O la, a lalagari musakaw tɛna na caya gwansan kɔfɛ (2 Tilew Kibaru 24:13; 34:10). Ni Masaya Boon saniyanin lo ani a ladonnin lo ka ɲɛ, o be danbe la an ka Ala batoyɔrɔ kan. N’an b’an niin don o baara la, o b’a yira ko an be Jehova kanu kosɔbɛ ani ko an ka batolikɛyɔrɔ koo ka di an ye haali! (Zaburuw 122:1). O fana be kɛ tɔgɔ ɲuman ye an fɛ an sigida la.—2 Korɛntikaw 6:3.

• Mun na an man kan k’an mako bɔ an ka batolikɛyɔrɔ la?

• Labɛn jumanw lo kɛra walisa Masaya Boon saniyanin ka to?