DON ye Jehova Seere dɔ ye Kanada. Mɔgɔ minw be si siradaw la, a y’a seko kɛ k’u waaju. Don y’a fɔ u dɔ koo la ko: “Peter tun be si sirada la sabu sibon t’a fɛ. N’ ma deli k’a ɲɔgɔn mɔgɔ nɔgɔnin ye. A koo tun man di mɔgɔw ye ani a tun tɛ sɔn mɔgɔw ka gwɛrɛ a la. Mɔgɔ caaman tun b’a fɛ k’a dɛmɛ, nka a banna o bɛɛ la.” Saan 14 ni kɔ kɔnɔ, Don muɲuna o cɛɛ kɔrɔ ani a y’a ɲini k’a dɛmɛ.

Loon dɔ, Peter ye Don ɲininga ko: “Mun na i b’i yɛrɛ sɛgɛnna ten? Mɔgɔw bɛɛ be n’ ye ka n’ to yen. Mun na ele b’i janto ne la?” Don ye vɛrise saba kalan walisa ka Peter dusukun sɔrɔ. A fɔlɔ, a ye Peter ɲininga n’a b’a lɔn ko tɔgɔ be Ala la. O kɔ, a y’a ɲini a fɛ a ka Zaburuw 83:19 kalan Bibulu kɔnɔ. A filanan, a y’a to Peter ye Ɔrɔmukaw 10:13, 14 kalan walisa k’a yira a la fɛɛn min kama ale b’a janto a la. O vɛrise ko: “Mɔgɔ o mɔgɔ mana Matigi [Jehova] tɔgɔ wele, o tigi bena kisi.” A laban, Don ye Matiyo 9:36 kalan ani a y’a fɔ Peter ye ko a k’a kalan a yɛrɛ ma. O vɛrise b’a fɔ ko: ‘Ni [Yezu] ye jama ye, u hinɛ be don a la, bari u sigɛnnin tun lo, u dusu kasinin tun lo fana. U tun be i ko sagaw, dɛndɛbaga te minw na.’ O kɔ, Peter ɲɛji jigira ani a ye Don ɲininga ko: “Yala ne y’o saga dɔ ye wa?”

Peter y’a daminɛ ka yɛlɛmaniw kɛ. A kora, k’a bonbosi tigɛ ka ɲɛ ani ka fani ɲumanw don. Balimacɛ Don lo tun y’o faniw di a ma. Peter tora k’a yɛrɛ saniya ani k’a yɛrɛ ladon.

Peter tun b’a dusukunnakow lakali sɛbɛ dɔ kɔnɔ. Dusukasikow lo tun fanin b’o sɛbɛ daminɛyɔrɔw la. Nka, a ye min sɛbɛ kɔsa la, o tun be dan na. A y’a sɛbɛ yɔrɔ dɔ la ko: “N’ ye Ala tɔgɔ lɔn bi. Sisan, ni n’ be delili kɛ, n’ be Jehova lo deli. A diyara n’ ye kosɔbɛ ka Ala tɔgɔ lɔn. Don y’a fɔ ko Jehova be se ka kɛ n’ teri sɔbɛ ye. A y’a fɔ fana ko tuma o  tuma ni n’ ye fɛɛn o fɛɛn deli Jehova fɛ, a be n’ lamɛn.”

Peter ka kuma labanw ɲɛsinna a dɔgɔ n’a kɔrɔ lo ma. A y’a sɛbɛ ko:

“N’ fari man di n’ na bi. N’ sii man jan tugun sabu n’ kɔrɔla. Hali ni n’ sara bi, n’ lanin b’a la ko n’ bena n’ tericɛ [Don] ye tugun alijɛnɛ kɔnɔ. N’aw be sɛbɛ nin kalanna, o kɔrɔ ko n’ sara. Nka n’ sutara loon na, n’aw ye ce cɛɛ dɔ ye min ni mɔgɔ tɔɔw tɛ kelen ye, a’ ye kuma a fɛ ani a’ ye sabari ka gafe dennin bulaman nin kalan. * A fɔra o gafe kɔnɔ ko loon dɔ, n’ bena n’ tericɛ ye alijɛnɛ kɔnɔ. N’ lanin b’o la ni n’ dusukun bɛɛ ye. Aw balimacɛ kanulen, Peter.”

Peter sutaranin kɔ, a kɔrɔmuso Ummi y’a fɔ ko: “A saan fila ye nin ye, Peter y’a kaan bɔ n’ ma. Kabi saan caaman, n’ siɲɛ fɔlɔ lo k’a ye ko a dusu tun ka di. A yɛrɛ ye yɛlɛmisɛnw kɛ.” Ummi y’a fɔ Don ye ko: “Ne bena o gafe kalan sabu fɛɛn min be se ka n’ balimacɛ dusukun sɔrɔ, o ye fɛɛn kabakoman ye.” Ummi sɔnna fana ka baro kɛ ni Jehova Seere dɔ ye an ka gafe kura nin kɔnɔ: Kalan tigitigi juman be Bibulu kɔnɔ?

An fana kana dan mɔgɔ ɲɛnayeli ma. An ka ɲi ka mɔgɔ sifa bɛɛ kanu sɔbɛ la ani ka muɲu u kɔrɔ (1 Tim. 2:3, 4). N’an y’o kɛ, n’a sɔrɔ an bena se ka mɔgɔ dɔw dɛmɛ u ka yɛlɛmaniw kɛ i ko Peter. Ale tun filɛ man di, nka a dusukun tun ka ɲi. Ala be mɔgɔ “dusu le filɛ.” An be se ka la a la ko Jehova bena mɔgɔ kɔnɔgwɛw dɛmɛ ka ɲɛtaga kɛ Alako ta fan fɛ.—1 Sam. 16:7; Zan 6:44.