1. Jurumukɛla min nimisara, Jehova b’o tigi hakili sigi cogo di?

 JEHOVA ye an Danbaga, sariya Sigibaga ani an ka Kititigɛla ye. Nka, an sankolola Faa kanutigi lo fana (Zab. 100:3; Ezayi 33:22). N’an y’a hakɛ ta ani an nimisara sɔbɛ la, see b’a ye ka yafa an ma ani a yɛrɛ b’a fɛ k’o lo kɛ (Zab. 86:5). Jehova tɛmɛna kira Ezayi fɛ k’an hakili sigi ni kanuya ye ko: “Hali n’aw ka kojuguw wulenna i ko joli, u bena gwɛ i ko kɔɔri.”—Ezayi 1:18.

2. N’an b’a fɛ ka jɛnɲɔgɔnya hɛɛrɛman kɛ ni tɔɔw ye, an ka ɲi ka mun lo kɛ?

² An bɛɛ be kuma dɔw fɔ ani an be koo dɔw kɛ ka don tɔɔw gasi la sabu an ye dafabaliw ye (Zaki 3:2). Nka, o kɔrɔ tɛ ko an tɛ se ka jɛnɲɔgɔnya teriman kɛ ni tɔɔw ye. An be se k’o kɛ n’an y’a degi ka yafa u ma (Talenw 17:9; 19:11; Mat. 18:21, 22). N’an donna ɲɔgɔn gasi la koo den-denninw na, Jehova b’a fɛ an ka yafa ɲɔgɔn ma (Kɔlɔs. 3:13). Kuun bɛrɛ b’an fɛ k’o kɛ. Jehova yɛrɛ labɛnnin lo ka yafa an ma “tiɲɛ na.”—Ezayi 55:7.

3. An bena mun lo lajɛ barokun nin na?

³ Barokun nin na, an bena a filɛ cogo min na adamaden dafabaliw be se ka Jehova ladegi u kɛtɔ ka yafa. An ka ɲi ka jurumuko jumanw lo fɔ diinan mɔgɔkɔrɔw ye? Mun na Jehova b’a fɛ an ka yafa tɔɔw ma? Ani balima  minw tɔɔrɔla kosɔbɛ tɔɔw ka jurumuw kosɔn, an be kalan juman lo sɔrɔ u ka koo la?

4. a) Ni Jehova sagokɛla dɔ ye jurumuba kɛ, a ka ɲi ka mun lo kɛ? b) Diinan mɔgɔkɔrɔw ka kunkanbaara ye juman ye n’u be ɲɔgɔnye kɛra ni kojugukɛla dɔ ye?

⁴ Ni kerecɛn dɔ ye jurumuba dɔ kɛ, an ka ɲi k’o fɔ diinan mɔgɔkɔrɔw ye. Misali la, o jurumuba dɔw kofɔra 1 Korɛntikaw 6:9, 10 kɔnɔ. Jurumuba ye kojuguba dɔ ye mɔgɔ be min kɛ ka Ala ka sariya tiɲɛ. Ni kerecɛn y’o jurumu ɲɔgɔn kɛ, a ka ɲi ka Jehova deli walisa a ka yafa a ma. A ka ɲi k’o fɔ kafo ka diinan mɔgɔkɔrɔw ye fana (Zab. 32:5; Zaki 5:14). Diinan mɔgɔkɔrɔw ka kunkanbaara ye mun lo ye o koo la? Tiɲɛn lo ko see be Jehova dɔrɔn lo ye ka jurumuw yafa pewu pewu. A b’o kɛ a kɛtɔ ka basigi kunmabɔ saraka kan. * Nka Jehova ye kunkanbaara dɔ kalifa diinan mɔgɔkɔrɔw ma. Olu lo be basigi Bibulu kan walisa k’a latigɛ ni jurumukɛla be se ka to wala n’a ka ɲi ka gwɛn ka bɔ kafo kɔnɔ (1 Kor. 5:12). Walisa ka se k’o kɛ, u bena u jija ka ɲiningali nunu jaabili sɔrɔ: A tigi tugura le k’o jurumu kɛ wa? A tigi ye koo jugu min kɛ, yala a y’a ɲini k’o dogo wa? A y’o jurumu kɛ siɲɛ caaman ani wagatijan kɔnɔ wa? Min yɛrɛ kɔrɔtanin lo, yala a tigi b’a yira a ka kɛwalew fɛ ko a nimisara sɔbɛ la wa? Daliluw be yen minw b’a yira ko Jehova yafara a ma wa?—Kɛw. 3:19.

5. Nafa juman lo be diinan mɔgɔkɔrɔw ka baara la?

⁵ Ni diinan mɔgɔkɔrɔw be kojugukɛla ka koo lajɛra n’a ye, desizɔn min tara sankolo la, u ka laɲinita ye k’o ɲɔgɔn ta (Mat. 18:18). O koo be kafo nafa cogo di? O be kafo latanga sabu jurumukɛla min nimisanin tɛ, ale be gwɛn ka bɔ kafo kɔnɔ. O la, a tɛna bɔnɛ lase Jehova sagokɛla tɔɔw ma minw koo ka gwɛlɛ Jehova ma (1 Kor. 5:6, 7, 11-13; Titi 3:10, 11). O be se ka jurumukɛla dɛmɛ fana a ka nimisa ani ka Jehova ka yafali sɔrɔ (Luka 5:32). Jurumukɛla min nimisanin lo, diinan mɔgɔkɔrɔw be delili kɛ a ye ani u b’a ɲini Jehova fɛ a k’o tigi dɛmɛ ka jɛnɲɔgɔnya ɲuman kɛ n’a ye tugun.—Zaki 5:15.

6. Ni jurumukɛla dɔ gwɛnna ka bɔ kafo kɔnɔ, yala Jehova bele be se ka yafa o tigi ma wa? A ɲɛfɔ.

⁶ Ni diinan mɔgɔkɔrɔw ye ɲɔgɔnye kɛ ni jurumukɛla dɔ ye ani u y’a ye ko a nimisanin tɛ do? O koo ɲɔgɔn na, u b’a tigi gwɛn ka bɔ kafo kɔnɔ. N’a ye jamana ka sariya tiɲɛ, diinan mɔgɔkɔrɔw tɛna a latanga a ka kɛwale juguw nɔfɛkow ma. Mɔgɔ o mɔgɔ ye jamana ka sariya tiɲɛ, a nimisara wo, a ma nimisa wo, Jehova ye sira di faamanw ma u ka kiti tigɛ o tigi kan ani k’a ɲangi (Ɔrɔm. 13:4). Nka n’a tigi sɔnna a ma kɔfɛ ko a ye jurumu kɛ, n’a nimisara sɔbɛ la ani k’a miiricogo n’a ka kɛwalew yɛlɛma, Jehova labɛnnin lo ka yafa a ma (Luka 15:17-24). Jehova be yafa a ma hali n’a ka jurumuw tun ka jugu kojugu.—2 Til. Kib. 33:9, 12, 13; 1 Tim. 1:15.

7. Ka yafa mɔgɔ dɔ ma min donna an gasi la, o kɔrɔ ko di?

⁷ An dusu k’a di k’a lɔn ko an lo t’a latigɛ ni Jehova ka ɲi ka yafa wala n’a man ɲi ka yafa jurumukɛla dɔ ma. Nka, koo dɔw be yen an lo ka ɲi k’o latigɛ. O  ye mun lo ye? Tuma dɔw la, mɔgɔ dɔ be se k’an hakɛ ta fɔɔ ka juguya ani o kɔ a be yafa deli an fɛ. Nka tuma dɔw la fana, n’a sɔrɔ a tigi tɛ yafa deli an fɛ. Hali o koo ɲɔgɔn na, an be se k’a latigɛ ka yafa a tigi ma. O kɔrɔ ko an tɛ dimi mara a kɔrɔ. Tiɲɛn lo ko an ka ɲi ka jijali kɛ o koo la ani o be wagati ta sanko n’a tigi donna an gasi la fɔɔ ka juguya. A tun fɔra saan 1994, sɛtanburukalo tile 15nan ka Kɔrɔsili Sangaso kɔnɔ ko: “N’i yafara jurumukɛla dɔ ma, o kɔrɔ tɛ ko i be i ɲɛɛ tugura a tigi ka jurumu kan. Kerecɛn min be yafa, a be koow to Jehova bolo ani a lanin b’a la ko Jehova bena o koow ɲɛnabɔ cogo bɛnnin na. Ale lo ye duniɲa kuru bɛɛ ka Kititigɛla tilennin ye ani a bena kiti tigɛ wagati bɛnnin na.” Mun na Jehova b’an jija an ka yafa ani ka kitikow to ale bolo?

8. Mun na n’an be yafa, o b’a yira ko an be Jehova waleɲuman lɔn a ka makari kosɔn?

⁸ N’an be yafa, o b’a yira ko an be Jehova waleɲuman lɔn a ka makari kosɔn. Yezu ka ntalen dɔ la, a ye Jehova suma ni kuntigi dɔ ye, min yafara a ka baaraden dɔ ka juru kɔ. O baaraden tun tɛ se k’o juru sara sabu a tun ka ca kojugu. Nka, o baaradenw ma yafa a baaradenɲɔgɔn dɔ ma, min ka juru tun ma se ale ta ma hali dɔɔni yɛrɛ (Mat. 18:23-35). An be kalan juman lo sɔrɔ o ntalen na? Jehova be makari an na kosɔbɛ. N’an b’a waleɲuman lɔn o kosɔn, o bena an lasun ka yafa tɔɔw ma (Zab. 103:9). A saan caaman ye nin ye, Kɔrɔsili Sangaso tun y’o ɲɛfɔ ko: “Ala yafara an ma ani a makarila an na Krista barika la. An mana yafa tɔɔw ma cogo o cogo, o tɛ se Ala ta ma abada.”

9. Jehova be makari jɔnw lo la? (Matiyo 6:14, 15).

⁹ N’an be makari tɔɔw la, Jehova bena makari an na. Minw be makari tɔɔw la, Jehova be makari olu lo la (Mat. 5:7; Zaki 2:13). Yezu y’o yira ka gwɛ tuma min na a tun b’a ka kalandenw degira delili kɛcogo la (Matiyo 6:14, 15 kalan). An b’o kalan ɲɔgɔn lo sɔrɔ Jehova ka kumaw na, a ye minw fɔ a sagokɛla Zɔbu ye. Elifazi, Bilidadi ani Sofari ye kuma juguw fɔ Ala sagokɛla kantigi Zɔbu ma ani k’a dusu kasi kosɔbɛ. Jehova y’a fɔ ko Zɔbu ka delili kɛ u ye. O delili kɛnin kɔ le, Jehova ye Zɔbu duga.—Zɔbu 42:8-10.

10. N’an be dimi mara, mun na o be bɔnɛ lase an yɛrɛ lo ma? (Efɛzikaw 4:31, 32).

¹⁰ N’an be dimi mara, o be bɔnɛ lase an yɛrɛ lo ma. Ka dimi mara, o be i n’a fɔ ka doni gwiliman ɲun. Jehova b’a fɛ an k’an mabɔ o doni na walisa ka lafiya sɔrɔ (Efɛzikaw 4:31, 32 kalan). A b’an jija ko ‘an ka dimi dabila, an dusu kana bɔ.’ (Zab. 37:8). N’an b’o ladili sira tagama, o b’an nafa. N’an be dimi mara, o be se k’an ka kɛnɛyako nagasi ani k’an hakili ɲagami (Talenw 14:30). N’an ye pɔsɔni min, o be koo jugu kɛ an yɛrɛ lo la. O cogo kelen na, n’an ye dimi mara mɔgɔ dɔ kɔrɔ, o tɛ koo jugu kɛ o tigi la, nka o be bɔnɛ lase an yɛrɛ lo ma. O kama, n’an be yafa tɔɔw ma, an be koo ɲuman kɛra an yɛrɛ lo ye (Talenw 11:17). An hakili n’an dusukun bena lafiya ani an bena se ka to ka baara kɛ Jehova ye.

11. K’an yɛrɛ mɔnɛbɔ, Bibulu be mun lo fɔ o koo la? (Ɔrɔmukaw 12:19-21).

¹¹ Mɔnɛbɔko ye Jehova ta ye. Jehova  ma sira di an ma ko ni mɔgɔ dɔ donna an gasi an la, an k’an yɛrɛ mɔnɛbɔ (Ɔrɔmukaw 12:19-21 kalan). An ka dafabaliya kosɔn, an tɛ koo bɛɛ faamu. O kama, an tɛ se ka kiti tigɛ cogo ɲuman na i ko Ala (Eburuw 4:13). Ani tuma dɔw la, an dusukunnakow b’an lafili ani o b’a to an tɛ koow kɛ cogo ɲuman na. Jehova ka hakili senu barika la, Zaki y’a sɛbɛ ko: “Mɔgɔ min dusu gwannin lo, o tigi te kotilennin kɛ Ala ɲakɔrɔ.” (Zaki 1:20). An ka la a la ko Jehova bena koo bɛnnin kɛ ani ka kiti tigɛ cogo tilennin na.

12. An be se k’a yira cogo di ko an lanin b’a la ko Jehova bena kiti tigɛ cogo tilennin na?

¹² N’an be yafa tɔɔw ma, an b’a yira ko an lanin b’a la ko Jehova bena kiti tigɛ cogo tilennin na. N’an be koow to Jehova bolo, an b’a yira ko an lanin b’a la ko jurumu ye bɔnɛ o bɔnɛ lase an ma, a bena o lalaga. Duniɲa kura kɔnɔ, “mɔgɔw tena miiri” dusukasiko tɛmɛninw na tugun ani u “tena na u hakili la tugu.” (Ezayi 65:17). Nka ni dɔ y’an hakɛ ta fɔɔ ka juguya, yala an be se ka yafa a tigi ma tiɲɛn na ani an tɛ dimi mara an kɔnɔ wa? An ka mɔgɔ dɔw ka koo lajɛ minw sera k’o kɛ.

13-14. Tony ni José ka koo b’i dɛmɛ ka mun lo faamu yafali koo la?

¹³ An balima caaman y’a latigɛ ka yafa tɔɔw ma hali k’a sɔrɔ u donna u gasi la fɔɔ ka juguya. O balimaw ye nafa jumanw lo sɔrɔ o la?

¹⁴ Tony be Filipine jamana na. * Saan caaman sanni a ka kɛ Jehova Seere ye, a y’a mɛn ko cɛɛ dɔ y’ale kɔrɔcɛ faga ani o cɛɛ tɔgɔ ko José. O wagati la, Tony tun ka fari ani a tun b’a fɛ k’a yɛrɛ mɔnɛbɔ. U ye José minɛ k’a don kaso la a ka koo jugu kosɔn. Kɔfɛ, u ye José bɔ kaso la ani Tony kalila ko fɔɔ ale k’a faga. A ye marifa san o kama. O kɔ, Tony y’a daminɛ ka bibulukalan kɛ ni Jehova Seerew ye. A ko: “N’ ka bibulukalan ye n’ dɛmɛ k’a faamu ko n’ ka ɲi ka yɛlɛmanibaw kɛ. O yɛlɛmaniw dɔ tun ye ko n’ man ɲi ka dimi mara n’ kɔnɔ.” Tony batizera ani kɔfɛ a kɛra kafo  ka diinan mɔgɔkɔrɔ dɔ ye. Miiri k’a filɛ a kabakoyara cogo min na tuma min na a y’a mɛn ko José fana batizera ka kɛ Jehova sagokɛla dɔ ye! Tuma min na u fila ye ɲɔgɔn ye, u ninsɔndiyaninba melekera ɲɔgɔn na ani Tony y’a fɔ José ye ko ale yafara a ma. Tony ko ale yafara José ma minkɛ, o y’ale ninsɔn diya cogo min na, o tɛ se ka fɔ. Tiɲɛn na, Jehova ye Tony duga sabu a sɔnna ka yafa.

15-16. Peter ni Sue ka koo y’i dɛmɛ ka mun lo faamu yafali koo la?

¹⁵ Saan 1985, Peter ni Sue tun be lajɛn dɔ la Masaya Boon na ani bɔnbu dɔ barila ka ci. Cɛɛ dɔ lo tun ye o bɔnbu bila Masaya Boon na. O bɔnbu ye Sue mandimi ka juguya fɔɔ k’a ɲɛɛw fiyen ani k’a tulow gwelen. A fana tun tɛ kasa mɛn tugun. * Tuma caaman na, Peter ni Sue b’u yɛrɛ ɲininga ko: “Mɔgɔ sugu juman lo be sɔn ka koo jugu nin ɲɔgɔn kɛ?” Saan caaman o koo kɛnin kɔ, faamanw y’o tigi minɛ ani u ko a bena a sii tɔɔ bɛɛ kɛ kaso la. Jehova Seere tun tɛ. Tuma min na u ye Peter ni Sue ɲininga n’u yafara o cɛɛ ma, u y’a fɔ ko: “Jehova b’an kalan ko n’an be dimi mara an kɔnɔ, o be se k’an ka kɛnɛyako nagasi, k’an hakili ɲagami ani k’an ka jɛnɲɔgɔnya nagasi ni tɔɔw ye. O kama, o koo kɛnin kɔ dɔrɔn, an ye Jehova deli a k’an dɛmɛ an kana dimi mara an kɔnɔ walisa an ka to hɛɛrɛ la.”

¹⁶ Yala a tun ka nɔgɔ u ma ka yafa o cɛɛ ma wa? Ayi, a tun man nɔgɔ tuma bɛɛ. U ko: “Tuma dɔw la, ni Sue mandimiyɔrɔw b’a tɔɔrɔla, an dusu be gwan tugun. Nka min kɛra, an tɛ to ka miiri o la. O kama, an dusu be sin ka suma. Tiɲɛn na, an be se k’a fɔ n’an dusu bɛɛ ye ko cɛɛ min y’o bɔnbu bila, n’a kɛra an balima ye loon dɔ, an bena a bisimila ni dusudiya ye. O koo y’an dɛmɛ k’a faamu ko Bibulu ka sariyakolow be mɔgɔ hɔɔrɔnya sɔbɛ la.  U y’an hɔɔrɔnya cogo caaman na fɔɔ a tɛ se ka fɔ! O koo ye bɔnɛ minw lase an ma, yanni dɔɔni Jehova bena u bɛɛ lalaga. An kɛtɔ k’o lɔn, o fana y’an dusu saalo.”

17. Myra ka koo y’i dɛmɛ ka mun lo faamu yafali koo la?

¹⁷ Tuma min na Myra ye tiɲɛn lɔn, a tun furula ka ban ani a tun be ni deen fitinin fila ye. A cɛɛ ma sɔn tiɲɛn batoli ma. Kɔfɛ a cɛɛ ye ɲamɔgɔya kɛ ani a tagara k’a ka denbaya to yen. Myra ko: “N’i ka mɔgɔ kanulen dɔ y’i janfa, o be min kɛ i la, o ɲɔgɔn lo ye n’ sɔrɔ tuma min na n’ cɛɛ tagara ka ne ni an ka denmisɛn fila to yen. O ye n’ hakili ɲagami ani n’ tun ma la a la ko a be sɔn k’o kɛ n’ na. O ye n’ dusu kasi, n’ tora ka nimisa, ka n’ yɛrɛ jalaki ani ka dimi.” Hali u ka furu sanin kɔ, a bele dusu tun kasinin lo sabu a cɛɛ y’a janfa. Myra ko: “N’ tora ka hami ani n’ diminin tora kalo caaman kɔnɔ. Kɔfɛ, n’ y’a faamu ko o koow tun be ne ni Jehova ni tɔɔw ka jɛnɲɔgɔnya nagasira.” Myra ko sisan, ale diminin tɛ tugun ani a tɛ koo jugu si miiri a cɛɛ kɔrɔ koo la. A jigi b’a la ko loon dɔ, a cɛɛ kɔrɔ bena kɛ Jehova sagokɛla dɔ ye. Myra be sera k’a ɲɛɛ lɔnin to sinikow kan. A y’a deen fila lamɔ a kelen u kɛra Jehova sagokɛlaw ye. Sisan, Myra ninsɔn ka di sabu ale n’a deenw n’u somɔgɔw be baara kɛra Jehova ye.

18. An be se ka la a la ko Kititigɛlaba Jehova bena mun lo kɛ?

¹⁸ K’a lɔn ko mɔgɔw kitiko tɛ an ka kunkanbaara ye, o b’an lafiya yɛrɛ le! O koo kɔrɔtaninba ye Jehova ka kunkanbaara ye sabu ale lo ye Kititigɛlaba ye (Ɔrɔm. 14:10-12). A bena kiti tigɛ tuma bɛɛ ka kɛɲɛ n’a ka sariya dafaninw ye ɲuman ni juguman koo la. Kana siga o la fewu! (Zɛnɛzi 18:25; 1 Mas. 8:32). A tɛna tilenbaliyako si kɛ!

19. Jehova ka tilenninya dafanin bena a lasun ka mun lo kɛ?

¹⁹ Wagati min na Jehova Ala bena dafabaliya ni jurumu nɔfɛkow bɛɛ ban pewu, an kɔrɔtɔnin lo o ka se. O wagati la, dimi min be an kan farikolo ani dusukunnako ta fan fɛ, olu bɛɛ bena ban pewu! (Zab. 72:12-14; Yir. 21:3, 4). U tɛna na an hakili la tugun abada! Sanni o wagati ka se, an be Jehova waleɲuman lɔn kosɔbɛ sabu a ye see di an ma an k’a ladegi ani ka yafa tɔɔw ma.