MƆGƆ caaman b’a lɔn ko u ye Yezu faga gwengwe lɔgɔ kan benkannikɛla fila cɛma (Mat. 27:35-38). O kɔ, Bibulu b’a fɔ ko u ye Yezu suu labɛn ani k’a sutara. Nka mɔgɔ dɔw b’a miiri ko Bibulu be min fɔ o koo la, o tɛ tiɲɛn ye.—Mariki 15:42-46.

Mɔgɔ minw be Evanzili kɔnɔkumaw sɔsɔ, u dɔw b’a fɔ ko u lanin t’a la ko n’u tun ye kojugukɛla dɔ faga, Ɔrɔmukaw tun be sɔn a tigi ka sutara cogo bɛnnin na. Olu fɛ, o suuw tun be kɛ cogo wɛrɛ la. Zurunalisi Ariel Sabar y’o mɔgɔw ka miiriya ɲɛfɔ zurunali dɔ kɔnɔ ko: “U tun be mɔgɔ juguw lo faga gwengwe lɔgɔ kan walisa k’u ɲangi. O kama, lɔnnikɛla dɔw y’a fɔ ko Ɔrɔmukaw tun tɛ se ka sɔn o mɔgɔw suu ka don cogo bɛnnin na.” (Smithsonian). Jalaki benna mɔgɔfagala minw kan, Ɔrɔmukaw tun b’olu lamaloya kosɔbɛ. O kama, u tun b’o mɔgɔw suu to gwengwe lɔgɔ kan walisa kongosogow k’u ɲimi. O kɔ, suu yɔrɔ minw tɔɔ tora, u t’u b’o don foroba kaburu dɔ kɔnɔ.

Nka Sɛgɛsɛgɛrikɛlaw bɔra fɛɛn dɔw kan minw be dan na. O ɲɛsinna Yahutu dɔw ma, Ɔrɔmukaw tun ye minw faga. Saan 1968, u ye cɛɛ dɔ kolow ye, min tun fagara saan kɛmɛkulu fɔlɔ la. U y’o kolow ye kaburu tigitigi dɔ kɔnɔ Zeruzalɛmu gɛrɛfɛ. O kaburu tun ye Yahutu denbaya mɔgɔ dɔ ta lo ye. Kolow dama dɔrɔn lo tun tora. O kolow cɛma, senjukolo dɔ tun be yen, u tun ye min gwengwe lɔgɔ kan ni puwɛnti dɔ ye. O puwɛnti janya tun ye santimitɛrɛ 11 ni tilan ye. Sabar ko: “O kolo tun ye cɛɛ dɔ ta lo ye min tɔgɔ ko Yehokanan. O senjukolo ye dalilu barikaman ye min b’a yira ko Evanziliw be min fɔ Yezu sutarali koo la, o ye tiɲɛnko ye. . . . [O kɔrɔ ko] Yehokanan senjukolo ye misali ye min b’a yira ko Ɔrɔmukaw ye cɛɛ dɔ faga gwengwe lɔgɔ kan Yezu ka wagati la. O kɔ, u sɔnna u k’a suu don Yahutuw ka sudoncogo la.”

Yehokanan senjukolo be min yira Yezu gwengwecogo koo la lɔgɔ kan, mɔgɔw be sɔsɔli caaman kɛ o koo la. Nka a kɔni gwɛnin lo ko u tun be kojugukɛla minw faga, u tun b’u dɔw sutara ani u tun t’u fili dɔrɔn foroba kaburuw kɔnɔ. Bibulu b’a fɔ ko u ye Yezu suu labɛn ani k’a sutara kaburu dɔ kɔnɔ. Tiɲɛn na, daliluw b’a yira ko Bibulu be min fɔ Yezu sutarali koo la, an be se ka la o la.

Min yɛrɛ kɔrɔtanin lo, o ye ko Jehova tun kɔnna k’a fɔ ko Yezu suu tun bena don nafolotigi dɔ ka kaburu kɔnɔ. Mɔgɔ si do tɛ se ka Ala ka Kuma bali a ka dafa.—Ezayi 53:9; 55:11.