Ɔnhɔn, Sutana be yen tiɲɛn na. Ale lo ye “diɲɛ nin kuntigi ye.” Danfɛn yebali dɔ lo min murutira Ala ma ani a kɛra mɛlɛkɛ jugu ye (Zan 14:30; Efɛzikaw 6:11, 12). Bibulu kɔnɔ, tɔgɔ caaman lara Sutana kan walisa k’a yira a ye mɔgɔ min ye tigitigi:

•   Sutana kɔrɔ ko “Kɛlɛbaga.”—Zɔbu 1:6.

•   Naafigi, o min kɔrɔ ko “Ngalontigɛla.”—Yirali 12:9.

•   Saa, o min kɔrɔ ko “Nanbaratɔ.”—2 Korɛntikaw 11:3.

•   Kɔrɔbɔlikɛla.—Matiyo 4:3.

•   Ngalontigɛla.—Zan 8:44.

Sutana tɛ kojugukɛ nege ye min be adamadenw kɔnɔ

 Dɔw ka miiriya la, Sutana ye kojugukɛ nege ye min be adamadenw kɔnɔ. An do be maana dɔ kalan Bibulu kɔnɔ, o min na Ala ni Sutana be kumana ni ɲɔgɔn ye. Komi Ala dafanin lo, juguya si t’a la. O la, fɛɛn jugu si t’a kɔnɔ a tun be kumana ni min ye (Deteronɔmu 32:4; Zɔbu 2:1-6). Ka fara o kan, Sutana ye Yezu kɔrɔbɔ. Yezu do “ma hakɛ si kɛ.” (Matiyo 4:8-10; 1 Zan 3:5). O la, Bibulu b’a yira ko Sutana be yen yɛrɛ yɛrɛ la, ani kojugukɛ nege tɛ min be adamadenw kɔnɔ.

 K’a ye ko mɔgɔ caaman lanin t’a la ko Sutana be yen tiɲɛn tiɲɛn na, yala o ka ɲi ka bari an na wa? O man ɲi ka bari an na sabu Bibulu b’a fɔ ko Sutana be mɔgɔ lafili walisa ka se k’a ka laɲinita dafa (2 Tesalonikaw 2:9, 10). A ka nanbarako jɔnjɔn dɔ ye ka mɔgɔw ɲɛɛ dibi walisa u kana la a la ko ale be yen tiɲɛn na.—2 Korɛntikaw 4:4.

  Mɔgɔw be min fɔ: Lusifɛr ye Sutana tɔgɔ wɛrɛ lo ye.

 Min ye tiɲɛn ye: Bibulu dɔw kɔnɔ, “Lusifɛr” be sɔrɔ Ezayi 14:12 kɔnɔ. Nka Eburukan kumaden min bayɛlɛmana o cogo la, o kɔrɔ ko “yeelen.” Ezayi sapitiri 14nan kuru bɛɛ b’a yira k’o ɲɛsinna Babilɔni masacɛw lo ma. A fɔra yen fana ko Ala tun bena u lamaloya sabu u yadanin lo (Ezayi 14:4, 13-20). Babilɔni bennin kɔ, mɔgɔw tun b’a weele ko “yeelen” walisa k’a lɔgɔbɔ.

  Mɔgɔw be min fɔ: Ala be tɛmɛ Sutana lo fɛ ka mɔgɔw kɔrɔbɔ walisa ka kiti tigɛ u kan.

 Min ye tiɲɛn ye: Sutana ye Ala jugu lo ye. A ka baarakɛla tɛ. Minw be baara kɛ Ala ye, Sutana b’u kɛlɛ ani a be ngalon tigɛ ka la u kan.—1 Piyɛri 5:8; Yirali 12:10.