1, 2. Nu kae míate ŋu atsɔ asɔ kple dzitsinya si Yehowa na mí?

TSƆE be zã do eye wòle be nàto mɔ aɖe si dzi akaɖi aɖeke mele o. Aleke nàse le ɖokuiwò me ne ame aɖe tsɔ tɔtsi na wò be nàtsɔ azɔ vivitia mee? Ðikeke mele eme o be àkpɔ dzidzɔ, elabena tɔtsia akɔ mɔ me na wò be nàgakli nu alo nuvevi nawɔ wò o.

² Le mɔ aɖe nu la, míate ŋu atsɔ tɔtsia asɔ kple nu vevi aɖe si Yehowa na mí—si nye dzitsinya. (Yakobo 1:17) Ne ɖe dzitsinya mele mía si o la, anye ne míakpɔ mɔ nyuitɔ si míato le agbe me la adze sii o. Ne míewɔ dzitsinya ŋu dɔ nyuie la, ana míato mɔ dzɔdzɔe ahawɔ nyametsotso nyuiwo. Eya ta mina míadzro nu si dzitsinya nye kple ale si wòwɔa dɔe me gbã. Eyome míadzro nya vevi siwo gbɔna hã me: (1) Ale si míawɔ ana hehe míaƒe dzitsinya, (2) nu si ta wòle be míabu ame bubuwo ƒe dzitsinya ŋu, kple (3) viɖe siwo míakpɔ ne míelé dzitsinya nyui me ɖe asi.

3. Gɔmesese kae le Helagbe me nya si gɔme woɖe be “dzitsinya” la ŋu, eye ŋutete tɔxɛ kae wònye le amegbetɔwo si?

³ Helagbe me nya si gɔme woɖe le Biblia me be “dzitsinya” la gɔmee nye “ame ɖokui nyanya” alo “ame si ƒomevi míenye nyanya.” Mawu na ŋutete mí amegbetɔwo be míate ŋu anya ame si ƒomevi míenye, si mele nenema le anyigbadzinuwɔwɔ bubuwo ya gome o. Esia fia be  míate ŋu adzro mía ɖokui me ahanya ne míele nu nyui alo nu gbegblẽ wɔm. Esi dzitsinya nye ɖaseɖila alo ʋɔnudrɔ̃la na mí le ememe ta la, ate ŋu adzro míaƒe nuwɔnawo, nɔnɔmewo, kple nyametsotsowo me. Ate ŋu afia mɔ mí míawɔ nyametsotso nyui loo alo axlɔ̃ nu mí míaƒo asa na nyametsotso gbegblẽ wɔwɔ. Azɔ hã, ate ŋu ana míaƒe dzi nadze eme ne míewɔ tiatia nyui loo alo awɔ fu mí ne míewɔ tiatia si mesɔ o.

4, 5. (a) Aleke míewɔ nya be dzitsinya nɔ Adam kple Xawa si, eye nu kae dzɔ esi wogbe Mawu ƒe se dzi wɔwɔ? (b) Kpɔɖeŋu kawoe ɖee fia be nuteƒewɔla siwo nɔ anyi do ŋgɔ na Kristotɔwo ƒe ɣeyiɣia la wɔ woƒe dzitsinya ŋu dɔ nyuie?

⁴ Mawu de ŋutete sia amegbetɔwo me tso gɔmedzedzea me ke. Adam kple Xawa ƒe nuwɔna ɖee fia be dzitsinya nɔ wo si. Ŋu si kpe wo le woƒe nu vɔ̃ wɔwɔ megbe la ɖo kpe esia dzi. (1 Mose 3:7, 8) Nublanuitɔe la, togbɔ be woƒe dzitsinya ɖe fu na wo ɣemaɣi hã la, megaɖe vi aɖeke na wo o. Wonya nyuie hafi da Mawu ƒe se dzi. Eya ta woawo ŋutɔwoe tiae be yewoadze aglã ɖe Yehowa Mawu ŋu azu eƒe futɔwo. Esi wònye ame deblibowoe wonye eye wonya nyuie hafi dze aglã ta la, womagate ŋu atrɔ ɖe Mawu ŋu o.

⁵ Amegbetɔ madeblibo geɖe ɖo to woƒe dzitsinya—nu si Adam kple Xawa ya mewɔ o. Le kpɔɖeŋu me, nuteƒewɔla Hiob te ŋu gblɔ be: “Malé nye dzɔdzɔenyenye me ɖe asi, eye nyemaɖe asi le eŋu akpɔ o; zi ale si mele agbe la, nye dzi mabu fɔm o.” * (Hiob 27:6) Hiob wɔ eƒe dzitsinya ŋu dɔ nyuie vavã. Eɖo to eƒe dzitsinya hena wòfia mɔe le eƒe  nuwɔna kple nyametsotsowo me. Ema tae wòte ŋu gblɔ kakaɖedzitɔe be yeƒe dzi mebu fɔ ye o, si fia be eƒe dzitsinya mewɔ fui alo na ŋu kpee o. David hã wɔ dzitsinya ŋu dɔ, gake le mɔ si to vovo na Hiob tɔ nu. Esi David mede bubu Saul, si nye fia si Yehowa si ami na ŋu o eye wòlã eƒe awu toga la, “David ƒe dzi lã kpo.” (1 Samuel 24:5) David ƒe dzitsinya si wɔ fui vevie alea la ɖe vi nɛ, elabena tso ema dzi la, esrɔ̃ ale si wòaƒo asa na bubumademade ame ŋu.

6. Nu kae ɖee fia be dzitsinya le amegbetɔwo katã si?

⁶ Ame siwo subɔa Yehowa si koe dzitsinya ƒe nunana la lea? Bu nya siawo siwo gbɔgbɔ ʋã apostolo Paulo wòŋlɔ la ŋu kpɔ: “Ne dukɔ siwo si se mele o la me tɔwo wɔa nu le dzɔdzɔme nu wòsɔna ɖe se nu, togbɔ be se mele wo si o hã la, wozu se na wo ɖokuiwo. Ame siawo tututue ɖee fia be woŋlɔ se la ƒe mɔfiamewo ɖe yewoƒe dziwo me, esi woƒe dzitsinya hã ɖia ɖase, eye woawo ŋutɔwo ƒe tamesusuwo bua fɔ wo alo tsoa afia na wo be wo tɔ dzɔ.” (Romatɔwo 2:14, 15) Ðaseɖila ememetɔ sia ate ŋu aʋã ame siwo menya nu boo aɖeke tso Yehowa ƒe sewo ŋu o gɔ̃ hã be woawɔ nu wòasɔ ɖe Mawu ƒe nudidiwo nu.

7. Aleke wòate ŋu adzɔe be dzitsinya nadzudzɔ mɔfiafia mí ɣeaɖewoɣi?

⁷ Ke hã, dzitsinya ate ŋu adzudzɔ mɔfiafia mí. Aleke wòadzɔe? Èɖo ŋku tɔtsi ƒe kpɔɖeŋu si míewɔ va yi dzia? Ne tɔtsikpeawo le kukum la, ekema tɔtsia magate ŋu aklẽ nyuie ahana mɔ me nakɔ na wò o. Nenema kee ne míekpɔ nyuie o la, míaƒe dzi ƒe ɖokuitɔdidi nudzodzrowo ate ŋu awɔe be míaƒe dzitsinya nanɔ kukum vivivi ale be magate ŋu afia mɔ mí nyuie o. Ne míetsɔ Mawu ƒe Nya na hehe míaƒe dzitsinya ko hafi míate ŋu anya nu si sɔ kple nu si mesɔ o, le nyametsotso vevi geɖewo wɔwɔ me. Le nyateƒe me la, hafi míaƒe dzitsinya nawɔ dɔ nyuie la, ele be míana Yehowa ƒe gbɔgbɔ kɔkɔea nafia mɔ mí. Paulo  gblɔ be: “Nye dzitsinya wɔ ɖeka kple gbɔgbɔ kɔkɔe la le ɖase ɖim nam.” (Romatɔwo 9:1) Ke nu kae míawɔ be Yehowa ƒe gbɔgbɔ kɔkɔea nafia mɔ míaƒe dzitsinya? Ele be míana hehee.

8. (a) Aleke dzi la ate ŋu akpɔ ŋusẽ ɖe dzitsinya dzii, eye nu ka koŋ ŋue wòle be míabu le nyametsotsowo wɔwɔ me? (b) Nu ka tae mele be Kristotɔ nagblɔ be ne yeƒe dzitsinya meɖe fu na ye o ko evɔ o? (Kpɔ etenuŋɔŋlɔa.)

⁸ Aleke nàwɔ anɔ te ɖe wò dzitsinya dzi awɔ nyametsotso nyuiwo? Edze abe ɖeko ame aɖewo nɔa te ɖe ale si wose le wo ɖokui me dzi ko tsoa nya me ene. Ðewohĩ woagblɔ be, “Meɖe fu na nye dzitsinya o ɖe.” Míaƒe dzimedidiwo nu ate ŋu asẽ ale gbegbe be woakpɔ ŋusẽ gbegblẽ ɖe míaƒe dzitsinya ƒe dɔwɔwɔ dzi gɔ̃ hã. Biblia gblɔ be: “Ame ƒe dzi la, alakpatɔ wònye wu nuwo katã, eye enu menya léna o. Ame kae ate ŋu adze sii?” (Yeremiya 17:9) Eya ta mele be míanɔ te ɖe nu si dzro míaƒe dzi la ɖeɖe ko dzi awɔ nyametsotso o. Ke boŋ nu si adze Yehowa Mawu ŋu la koŋ ŋue wòle be míabu. *

9. Nu kae nye mawuvɔvɔ̃, eye aleke wòakpe ɖe mía ŋu le dzitsinya ŋu dɔ wɔwɔ me?

⁹ Nyametsotso si wonɔ te ɖe dzitsinya si wona hehee nyuie dzi wɔ la aɖe mawuvɔvɔ̃ afia, ke menye ame ŋutɔ ƒe didiwo o. Bu kpɔɖeŋu sia ŋu kpɔ. Nuteƒewɔla Nehemiya kpɔ mɔ axɔ adzɔ vovovowo le Yerusalem tɔwo si le esi  eyae nye anyigbadzikpɔla ta hafi. Gake mewɔe o. Nu ka tae? Medi kura be yeate Yehowa Mawu ƒe amewo ɖe anyi ne wòado dziku ɖe ye ŋu o. Egblɔ be: “Nye ya nyemewɔ nenema o, le esi mevɔ̃a Mawu ta.” (Nehemiya 5:15) Ele vevie be mawuvɔvɔ̃ nyuitɔ, esi tso dzi me, si nye vɔvɔ̃ na nu si madze mía Fofo si le dziƒo ŋu o wɔwɔ, nanɔ mía me. Mawuvɔvɔ̃ vavãtɔ sia aʋã mí be míadi mɔfiame le Mawu ƒe Nya la me hafi awɔ nyametsotsowo.

10, 11. Biblia ƒe gɔmeɖose kawoe ku ɖe aha muame nono ŋu, eye nu kae míawɔ be Mawu nafia mɔ mí le wo dzi wɔwɔ me?

¹⁰ Le kpɔɖeŋu me, bu aha muame nono ƒe nya ŋu kpɔ. Nyametsotso si dzea ŋgɔ ame geɖewo le hadomewɔnawo mee nye, Ðe mano aha muamea, alo ɖe nyemanoe o? Gbã la, ele be míana hehe mía ɖokui. Biblia ƒe gɔmeɖose kawoe ku ɖe nya sia ŋu? Biblia metsi tre ɖe aha muame nono le ŋuɖɔɖo me ŋu o. Ekafu Yehowa le wain ƒe nunana la ta. (Psalmo 104:14, 15) Ke hã, Biblia tsri aha tsu nono kple aglotutu siwo gbɔ eme. (Luka 21:34; Romatɔwo 13:13) Gawu la, woyɔ ahamumu de nu vɔ̃ gã bubuwo abe gbɔdɔdɔ ƒe agbe gbegblẽ nɔnɔ ene dome. *—1 Korintotɔwo 6:9, 10.

¹¹ Gɔmeɖose siawo tɔgbi ye Kristotɔwo tsɔna naa hehe woƒe dzitsinya be wòanɔ agbe. Eya ta ne aha muame nono le hadomewɔnawo me ƒe nyametsotso dze ŋgɔ mí la, ele be míabia nya aɖewo mía ɖokui, abe: ‘Hadomewɔna ka tɔgbi wònye? Ðe wòate ŋu atrɔ azu aglotutu si gbɔ emea? Nɔnɔme kae meɖena fiana ɖe aha muame nono ŋu? Ðe aha muame dzroam vevie, eye menonɛ be matsɔ aɖu nuxaxa alo seselelãmekuxi aɖe dzi alo be mate ŋu awɔ nu siwo nyemate ŋu awɔ hafi oa? Ðe mete ŋu ɖua ɖokuinye dzi be magano aha wòagbɔ eme oa?’ Ele be  míatsɔ Biblia ƒe gɔmeɖosewo ada biabia siawo kpɔ, eye anyo be míado gbe ɖa abia Yehowa ƒe mɔfiame. (Xlẽ Psalmo 139:23, 24.) Ne míewɔe alea la, afia be míedi be Yehowa natsɔ eƒe gbɔgbɔ kɔkɔea afia mɔ mí. Afia hã be míele hehe nam míaƒe dzitsinya be wòafia mɔ mí wòasɔ ɖe Biblia ƒe gɔmeɖosewo nu. Gake nu vevi bubu aɖe hã li si ŋu wòle be míabu le nyametsotsowo wɔwɔ me.

12, 13. Susu siwo ta Kristotɔwo ƒe dzitsinya le vovovo la ƒe ɖewo ɖe, eye aleke wòle be nyanya be míaƒe dzitsinya le vovovo nakpɔ ŋusẽ ɖe míaƒe nuwɔna dzi?

¹² Ale si gbegbe Kristotɔwo ƒe dzitsinya le vovovo la ate ŋu awɔ nuku na wò ɣeaɖewoɣi. Ame aɖe ate ŋu abu nuwɔna alo kɔnu aɖe be mesɔ o, gake ame bubu ya akpɔ dzidzɔ ɖe eŋu eye makpɔe be naneke gblẽ le eŋu o. Le kpɔɖeŋu me, ame aɖe ate ŋu abu ahanono le fiase me be mesɔ o, gake ame bubu ya ate ŋu akpɔ dzidzɔ ɖe xɔlɔ̃ ʋɛ aɖewo kpɔkplɔ ɖo ahano aha le fiase me le fiẽsi aɖe me ŋu. Nu ka tae míaƒe dzitsinya le vovovo, eye aleke wòle be esia nyanya nakpɔ ŋusẽ ɖe nyametsotso siwo míewɔna dzi?

¹³ Susu geɖewo tae míaƒe dzitsinya le vovovo ɖo. Nɔnɔme siwo me míeto le agbe me la le vovovo. Eye ame aɖewo hã nyae be yewowɔ avu kple gbɔdzɔgbɔdzɔ aɖewo va yi, siwo dzi ɖuɖu menɔ bɔbɔe na yewo o. (1 Fiawo 8:38, 39) Le kpɔɖeŋu me, ame siwo aha muame nono nye kuxi na va yi la ate ŋu anɔ vɔvɔ̃m na ahanono. Ne ame ma ƒomevi va srã wò kpɔ la, eƒe dzitsinya ate ŋu ana wòagbe be yemano aha o. Ðe wòate ɖe dziwòa? Ðe nàzii ɖe edzia? Ao. Ðewohĩ amea madi be yeaɖe nu me na wò o, eya ta ne mènya susu si tae wògbe be yemano aha o hã la, ele be nɔvilɔlɔ̃ naʋã wò nàɖe ameŋububu afia.

14, 15. Nya ka mee ƒe alafa gbãtɔ me hamea me tɔwo ƒe dzitsinya to vovo le, eye aɖaŋu kae Paulo ɖo?

 ¹⁴ Apostolo Paulo de dzesi ale si gbegbe Kristotɔ siwo nɔ anyi le ƒe alafa gbãtɔ me la ƒe dzitsinya le vovovoe. Ɣemaɣi la, nuɖuɖu siwo wotsɔ sa vɔ na legbawo ɖuɖu ƒe nya ɖe fu na Kristotɔ aɖewo vevie. (1 Korintotɔwo 10:25) Paulo ya mekpɔe be naneke gblẽ le nuɖuɖu mawo, siwo wova dzrana le asime emegbe la ɖuɖu ŋu o. Le eƒe susu nu la, legbawo menye naneke o, eye nuɖuɖu siwo Yehowa wɔ la mate ŋu ava zu legbawo tɔ le esi amewo tsɔe sa vɔ na wo ta o. Gake Paulo kpɔe be ame bubuwo ƒe nukpɔsusu mesɔ kple ye tɔ le nya sia me o. Ðewohĩ wo dometɔ aɖewo ƒo wo ɖokui ɖe trɔ̃subɔsubɔ me vĩi tsã hafi va zu Kristotɔwo. Eya ta nu sia nu si wozã le trɔ̃subɔsubɔ me tsã la ŋu dɔwɔwɔ aɖia wo nu. Nu kae nye nya sia gbɔ kpɔnu?

¹⁵ Paulo gblɔ be: “Ele be mí ame siwo ŋu ŋusẽ le la míatsɔ ame siwo ŋu ŋusẽ mele o la ƒe gbɔdzɔgbɔdzɔwo, eye míaganɔ mía ɖokui ŋu dzem o. Elabena Kristo la gɔ̃ hã medze eɖokui ŋu o.” (Romatɔwo 15:1, 3) Paulo ƒe nyawo fia be ele be míatsɔ mía nɔviwo ƒe hiahiãwo aɖo ŋgɔ na mía tɔwo abe ale si Kristo wɔe ene. Le nya sia tɔgbi ke me la, Paulo gblɔ be anyo be yemaɖu lã o, nenye be aɖia Mawu ƒe alẽ xɔasi siwo ta Kristo ku ɖo la dometɔ aɖe nu.—Xlẽ 1 Korintotɔwo 8:13; 10:23, 24, 31-33.

16. Nu ka tae wòle be ame siwo ƒe dzitsinya meɖe mɔ na wo be woawɔ nanewo o la naƒo asa na ʋɔnudɔdrɔ̃ ame siwo ƒe dzitsinya to vovo na wo tɔ?

¹⁶ Le go bubu me la, mele be ame siwo ƒe dzitsinya meɖe mɔ na wo be woawɔ nanewo o hã nate tɔ ɖe edzi be ame bubuwo ƒe nukpɔsusu le dzitsinya ƒe nyawo ŋu nasɔ kple yewo tɔ o. (Xlẽ Romatɔwo 14:10.) Le nyateƒe me la, dzitsinya zazã le mɔ nyuitɔ nue nye be míatsɔe adrɔ̃ ʋɔnu mía ɖokui, ke menye ame bubuwo o. Ðo ŋku edzi be Yesu gblɔ be: “Midzudzɔ ʋɔnudɔdrɔ̃, ne woagadrɔ̃  ʋɔnu mi o.” (Mateo 7:1) Eya ta mele be ame aɖeke nazi eƒe dzitsinya ɖe ame bubu dzi wòazu nya le hamea me o. Ke boŋ míati nu siwo ana lɔlɔ̃ kple ɖekawɔwɔ nanɔ anyi eye wonyo na mía nɔewo tutuɖo la yome, ke menye nu siwo agblẽ mía nɔewo dome o.—Romatɔwo 14:19.

17. Nu kae dzɔ ɖe ame geɖe ƒe dzitsinya dzi egbea?

¹⁷ Apostolo Petro gblɔ be: “Milé dzitsinya nyui me ɖe asi.” (1 Petro 3:16) Yayra gã aɖee dzitsinya dzadzɛ ƒe amesinɔnɔ le Yehowa Mawu ŋkume nye. Ame geɖe ƒe dzitsinya mele nenema egbea o. Paulo gblɔ be ame aɖewo “ƒe dzitsinya ku atri” abe ga xɔdzoe wotsɔ de dzesii ene. (1 Timoteo 4:2) Ne ga xɔdzo fiã ŋutilã ƒe akpa aɖe  la, abiteƒea te ŋu va kuna yikpaa ale gbegbe be megasea naneke gɔ̃ hã o. Ame geɖewo ƒe dzitsinya ku yikpaa—eku atri ale gbegbe be megagbea nya na wo, xlɔ̃a nu wo, bua fɔ wo, alo nana ŋu kpea wo ne wowɔ nu gbegblẽ o. Eye edzɔa dzi na ame geɖewo egbea gɔ̃ hã be yewoƒe dzitsinya megabua fɔ yewo o.

18, 19. (a) Vi kae wòate ŋu aɖe na mí ne míaƒe dzitsinya bu fɔ mí alo na ŋu kpe mí? (b) Ne míetrɔ dzi me tso nu vɔ̃ aɖe me hafi míaƒe dzitsinya gayi edzi le fu wɔm mí la, nu kae míate ŋu awɔ?

¹⁸ Enye nyateƒe be ne míaƒe dzitsinya bu fɔ mí la, ekema ele gbɔgblɔm na mí be nane si míewɔ la menyo o. Ne seselelãme ma ʋã nu vɔ̃ wɔla aɖe wòtrɔ dzi me la, woatsɔe akee, ne nu si wòwɔ la vɔ̃ɖi ŋutɔ gɔ̃ hã. Le kpɔɖeŋu me, Fia David wɔ nu vɔ̃ gã aɖe, gake wotsɔe kee le esi wòtrɔ  dzi me vavã ta. Esi wòtrɔ tso mɔ vɔ̃ dzi heɖoe kplikpaa be yeawɔ Yehowa ƒe sewo dzi tso ema dzi ta la, ekpɔ ale si Yehowa ƒe ‘dɔme nyo, eye wòlɔ̃a tsɔtsɔke’ la dze sii. (Psalmo 51:1-19; 86:5) Ke ne míaƒe dzitsinya gakpɔtɔ le fu ɖem na mí vevie esi míetrɔ dzi me eye wotsɔ nu vɔ̃ si míewɔ ke mí vɔ hafi ya ɖe?

¹⁹ Ɣeaɖewoɣi la, dzitsinya te ŋu bua fɔ ame wògbɔa eme; ne nu vɔ̃ wɔla trɔ dzi me hã la, ete ŋu gayia edzi nɔa fu wɔmee ɣeyiɣi didi aɖe. Ne ele alea le mía gome la, ɖewohĩ ahiã be míakpɔ kakaɖedzi be Yehowa lolo wu míaƒe dzi si bua fɔ mí. Ele be míaxɔe ase ahaka ɖe edzi be elɔ̃ mí eye wòtsɔa míaƒe nu vɔ̃wo kea mí, abe ale si ko míetsɔa nya siawo dea dzi ƒo na ame bubuwoe ene. (Xlẽ 1 Yohanes 3:19, 20.) Le mɔ bubu nu la, ne dzitsinya dzadzɛ le mía si la, enana míaƒe susu dzea akɔ anyi, míaƒe dzi dzea eme, eye míekpɔa dzidzɔ si tɔgbi mebɔ ɖe xexe sia me o. Dzitsinya nyui te ŋu va su ame geɖe siwo wɔ nu vɔ̃ gãwo tsã la si, eye wole dzidzeme geɖe kpɔm le Yehowa Mawu subɔsubɔ me egbea.—1 Korintotɔwo 6:11.

20, 21. (a) Nu kae wotrɔ asi le agbalẽ sia ŋu be wòakpe ɖe ŋuwò nàwɔ? (b) Ablɔɖe kae su mí Kristotɔwo si, gake aleke wòle be míawɔ ablɔɖe sia ŋu dɔe?

²⁰ Wotrɔ asi le agbalẽ sia ŋu be wòakpe ɖe wò hã ŋuwò be dzidzɔ ma tɔgbi nasu asiwò, be nàlé dzitsinya nyui me ɖe asi le Satana ƒe nuɖoanyi sia ƒe ŋkeke mamlɛ siawo siwo me yɔ fũu kple xaxawo la katã me. Gake menye Biblia ƒe se kple gɔmeɖose siwo ŋu wòahiã be nàbu ahawɔ wo ŋu dɔ le nɔnɔme vovovo siwo nàdo goe gbe sia gbe me la katã ŋue woƒo nu tsoe le agbalẽ sia me o. Azɔ hã, mègakpɔ mɔ be woaŋlɔ nu sia nu ŋuti se ɖi tẽe le nya siwo me wòle be ame ŋutɔ ƒe dzitsinya nafia mɔe le la ŋu kokoko o. Agbalẽ sia ƒe taɖodzinu koŋue nye be wòakpe ɖe ŋuwò nàna hehe wò dzitsinya ahana wòanɔ agbe to Mawu ƒe Nya la ŋu dɔ wɔwɔ me le wò gbe sia gbe  gbenɔnɔ me. “Kristo la ƒe se la” bia tso mía si be míana míaƒe dzitsinya kple Biblia me gɔmeɖosewo nafia mɔ mí le agbe me geɖe wu, ke menye se siwo woŋlɔ ɖi tẽe, abe ale si wònɔ le Mose ƒe Sea gome ene o. (Galatiatɔwo 6:2) Eya ta Yehowa na ablɔɖe geɖe Kristotɔwo. Ke hã, eƒe Nya la xlɔ̃ nu mí be míagazã míaƒe ablɔɖe la “abe taflatsɛdonu ene anɔ nu vɔ̃ɖi wɔm o.” (1 Petro 2:16) Ke boŋ ablɔɖe sia nye mɔnukpɔkpɔ tɔxɛ na mí be míaɖee afia be míelɔ̃ Yehowa.

²¹ Ne èyi edzi srɔ̃ ale si nànɔ agbe ɖe Biblia ƒe gɔmeɖosewo nu, nètsɔ gbedodoɖa kpe ɖe eŋu, eye nèwɔa nyametsotso nyuiwo la, akpe ɖe ŋuwò nàlé lɔlɔ̃ si ʋã wò tso esime nèva nya Yehowa la me ɖe asi. Ana nàna hehe wò “nugɔmeseseŋutetewo to wo zazã me.” (Hebritɔwo 5:14) Wò dzitsinya si nètsɔ Biblia na hehee la aɖe vi na wò le wò gbe sia gbe gbenɔnɔ me. Abe ale si ko tɔtsi ate ŋu akɔ mɔ me na wò ene la, wò dzitsinya ate ŋu afia mɔ wò nàwɔ nyametsotso siwo adze Fofowò si le dziƒo la ŋu. Esiae nye mɔ nyuitɔ si dzi nàto anɔ Mawu ƒe lɔlɔ̃ la me ɖaa.