NUSƆSRƆ̃ 6
Mɔkpɔkpɔ Kae Li Na Kukuawo?
1. Nya nyui kae li ku ɖe ame kukuwo ŋu?
Esi Yesu va ɖo Betania, afi si te ɖe Yerusalem ŋu la, exɔlɔ̃ Lazaro ku xoxo ŋkeke enee nye ema. Yesu kplɔ Marta kple Maria, siwo nye ame si ku la nɔvinyɔnuwo, ɖo yi afi si woɖi Lazaro ɖo. Eteƒe medidi o, amewo va ƒo zi ɖe teƒea. Àte ŋu akpɔ ale si gbegbe dzi dzɔ Marta kple Maria esi Yesu fɔ Lazaro ɖe tsitre la le susu mea?—Xlẽ Yohanes 11:21-24, 38-44.
Marta nya nu tso nya nyui si ku ɖe kukuawo ŋu la ŋuti xoxo. Enyae be Yehowa afɔ ame kukuwo ɖe tsitre woagava nɔ agbe le anyigba dzi.—Xlẽ Hiob 14:14, 15.
2. Nɔnɔme ka mee ame kukuwo le?
Mawu gblɔ na Adam be: “Anyi nènye, eye anyi ke nàgatrɔ azu!”—1 MOSE 3:19.
Anyie wotsɔ mè amegbetɔwo. (1 Mose 2:7; 3:19) Menye gbɔgbɔ siwo do ŋutilã woe míenye o. Anyigbadzinuwɔwɔwoe míenye, eya ta míaƒe akpa aɖeke meyia edzi nɔa agbe le míaƒe ku megbe o. Ne míeku la, míaƒe susu dzudzɔa dɔwɔwɔ, eye míaƒe tamesusuwo nu yina. Eya ta esi wofɔ Lazaro ɖe tsitre la, megblɔ nya aɖeke si fia be ekpɔ nane teƒe le ku me o, elabena kukuawo meganyaa naneke o.—Xlẽ Psalmo 146:4; Nyagblɔla 9:5, 6, 10.
Ðe Mawu wɔa funyafunya ame kukuwo le dzo mea? Esi Biblia gblɔ be kukuawo menya naneke o ta la, edze ƒãa be funyafunyawɔwɔ amewo le dzo mavɔ me nye alakpanufiafia si doa vlo Mawu. Fuwɔwɔ amewo le dzo me nye ŋunyɔ nɛ.—Xlẽ Yeremiya 7:31.
Kpɔ video si nye Nɔnɔme Ka Mee Ame Kukuwo Le?
3. Ðe kukuawo ate ŋu aƒo nu na mía?
Ame kukuwo mate ŋu aƒo nu alo ase nu o. (Psalmo 115:17) Gake mawudɔla vɔ̃ɖiwo li, eye woate ŋu aƒo nu na amewo ameflutɔe abe ame siwo ku lae le nu ƒom ene. (2 Petro 2:4) Yehowa medina kura be míate kpɔ be míaƒo nu kple ame kukuwo o.—Xlẽ 5 Mose 18:10, 11.
4. Ame kawoe woafɔ ɖe tsitre?
Woafɔ ame kuku miliɔn geɖe siwo le yɔdowo me la ɖe tsitre woava nɔ agbe le anyigba dzi. Woafɔ ame siwo menya Mawu o eye wowɔ nu vlowo la dometɔ aɖewo gɔ̃ hã ɖe tsitre.—Xlẽ Luka 23:43; Dɔwɔwɔwo 24:15.
Mɔnukpɔkpɔ asu ame siwo woafɔ ɖe tsitre la si be woasrɔ̃ nu tso Mawu ŋuti nyateƒea ŋu ahaɖee afia be yewoxɔ Yesu dzi se to toɖoɖoe me. (Nyaɖeɖefia 20:11-13) Ame siwo woafɔ ɖe tsitre la dometɔ siwo awɔ nu nyui la anɔ agbe tegbee le anyigba dzi.—Xlẽ Yohanes 5:28, 29.
5. Nu kae tsitretsitsia fia mí tso Yehowa ŋu?
Ale si Mawu dɔ Via ɖa wòva tsɔ eƒe agbe na ɖe mía ta lae wɔe be woate ŋu afɔ ame kukuwo ɖe tsitre. Eya ta tsitretsitsia nye Yehowa ƒe lɔlɔ̃ kple amenuveve ɖeɖe fia mí. Ne wofɔ ame kukuwo ɖe tsitre la, wo dometɔ kae nàdi vevie be yeakpɔ?—Xlẽ Yohanes 3:16; Romatɔwo 6:23.
