Psalmowo 37:1-40
David ƒe ha.
א [Alef]
37 Dzi megaku wò le nu vlo wɔlawo ta o,Eye mègaʋã ŋu nu tovo wɔlawo o.+
2 Elabena woayrɔ kaba abe gbe ene+Eye woayrɔ abe aŋgba fẽ ene.
ב [Bet]
3 Ðo ŋu ɖe Yehowa ŋu, eye nàwɔ nu nyui;+Nɔ anyigba la dzi, eye nàwɔ nuteƒe.+
4 Yehowa ƒe nu nenyo ŋuwò vevie,Ekema ana nu siwo wò dzi di la wò.
ג [Gimel]
5 Tsɔ wò mɔwo gblẽ ɖe Yehowa si me;*+Ðo ŋu ɖe eŋu, ekema eya ŋutɔ awɔe na wò.+
6 Ana wò dzɔdzɔenyenye naklẽ abe ŋdikekeli ene,Kple wò nya dzɔdzɔe abe ŋdɔkutsu dzatsɛ ene.
ד [Dalet]
7 Zi kpi le Yehowa ŋkume kpoo,+Eye nànɔ esinu kpɔm.*
Dzi megaku wò ɖe ame siƑe mɔ vɔ̃wo dzea edzi nɛ la ŋu o.+
ה [He]
8 Wò dɔmedzoe nu nefa, eye nàdzudzɔ dzikudodo;+Dzi megaku wò ne nàtrɔ ɖe vɔ̃wɔwɔ ŋu o.*
9 Elabena woatsrɔ̃ ame vlowo,+Ke ame siwo kpɔa mɔ na Yehowa lae anyi anyigba la dome.+
ו [Waw]
10 Esusɔ vie ko ame vɔ̃ɖiwo maganɔ anyi o;+Àdi wo le wo nɔƒe,Ke womaganɔ afi ma o.+
11 Ke ame fafawo anyi anyigba la dome,+Eye dzi adzɔ wo geɖe ɖe ŋutifafa gbogbo la ŋuti.+
ז [Zayin]
12 Ame vɔ̃ɖi le nugbe ɖom ɖe ame dzɔdzɔe la ŋu;+Eye wòle aɖukli ɖum ɖe eŋu.
13 Ke Yehowa akoe,Elabena enyae be eƒe ŋkeke li gbɔna.+
ח [Het]
14 Ame vɔ̃ɖiwo ɖe woƒe yi ɖe go, eye wovu woƒe da me*Be yewoaƒu wɔnamanɔŋutɔ kple ame dahe anyi,Ne woawu ame siwo ƒe mɔ dzɔ la.
15 Gake woawo ŋutɔwo ƒe yi aƒo ɖe woƒe dzi;+Eye woƒe datiwo aŋe.
ט [Tet]
16 Nu ʋɛ si le ame dzɔdzɔe si la nyo wuNu gbogbo siwo le ame vɔ̃ɖi geɖewo si.+
17 Elabena ame vɔ̃ɖiwo ƒe alɔ aŋe,Ke Yehowa alé ame dzɔdzɔewo ya ɖe te.
י [Yod]
18 Nu siwo me tom ame maɖifɔwo le la* le nyanya na Yehowa,Eye woƒe domenyinu anɔ anyi ɖaa tegbee.+
19 Ŋu makpe wo le vɔ̃dzɔgbewo o;Eye nu abɔ ɖe wo si taŋ le dɔŋɔli.
כ [Kaf]
20 Ke ame vɔ̃ɖiwo ya atsrɔ̃;+Yehowa ƒe futɔwo nu ayi abe gbeɖuƒe damawo ene,Woabu vĩ abe dzudzɔ ene.
ל [Lamed]
21 Ame vɔ̃ɖi la doa nugbana, eye mexenɛ o,Ke ame dzɔdzɔe nyoa dɔme* henaa nu ame.+
22 Ame siwo Mawu yra la, anyi anyigba la dome,Ke ame siwo wòƒo ƒi de la, woatsrɔ̃ wo.+
מ [Mem]
23 Yehowa fiaa mɔ ame ƒe afɔɖeɖewo*+Nenye be amea ƒe mɔwo dze eŋu.+
24 Ne edze anyi hã la, maɖo baba ɖi o,+Elabena Yehowa léa eƒe asi ɖe te.*+
נ [Nun]
25 Menɔ ɖevime tsã, azɔ metsi,Ke nyemekpɔ wogblẽ ame dzɔdzɔe ɖi loo,+Alo be viawo ɖo abologbe* kpɔ o.+
26 Edoa nu gbana na amewo faa ɣesiaɣi,+Ale yayra le mɔ dzi na viawo.
ס [Samek]
27 Te ɖa tso nu vɔ̃ɖi gbɔ eye nàwɔ nu nyui,+Ekema ànɔ anyi tegbee.
28 Elabena Yehowa lɔ̃a nya dzɔdzɔe,Eye magblẽ ame siwo wɔa nuteƒe nɛ la ɖi o.+
ע [Ayin]
Akpɔ wo ta tegbee;+Ke woatsrɔ̃ ame vɔ̃ɖiwo ƒe dzidzimeviwo.+
29 Ame dzɔdzɔewo anyi anyigba la dome,+Eye woanɔ edzi tegbee.+
פ [Pe]
30 Nunya dona tso ame dzɔdzɔe nu,*Eye eƒe aɖe gblɔa nya dzɔdzɔe.+
31 Eƒe Mawu ƒe se la le eƒe dzi me;+Eƒe afɔ magli o.+
צ [Tsade]
32 Ame vɔ̃ɖi le ame dzɔdzɔe la ɖiam,Eye wòle didim be yeawui.
33 Ke Yehowa maɖe asi le eŋu nɛ o+Eye ne wodrɔ̃ ʋɔnui la, maɖi fɔ o.+
ק [Kof]
34 Kpɔ mɔ na Yehowa, eye nànɔ eƒe mɔ dzi,Ekema ado wò ɖe dzi, ne nànyi anyigba la dome.
Ne wole ame vɔ̃ɖiwo tsrɔ̃m la,+ àkpɔ eteƒe.+
ר [Res]
35 Mekpɔ ame vɔ̃ɖi ŋutasẽla,Evu eɖokui dranyi abe ati dama si dzɔ kple ke ene.+
36 Kaka makpɔ ko enu yi, eye megali o;+Medii gadii, ke nyemekpɔe o.+
ש [Shin]
37 Lé ŋku ɖe ame maɖifɔ* la ŋu,Eye nàkpɔ ame dzɔdzɔe+ la ɖa,Elabena eƒe etsɔme anye ŋutifafa sɔŋ.+
38 Ke woatsrɔ̃ sedzidalawo katã;Eye etsɔme aɖeke manɔ anyi na ame vɔ̃ɖiwo o.+
ת [Taw]
39 Ame dzɔdzɔewo ƒe xɔname tso Yehowa gbɔ;+Eyae nye woƒe mɔ́ sesẽ le xaxaɣi.+
40 Yehowa akpe ɖe wo ŋu, eye wòaxɔ na wo.+
Axɔ na wo tso ame vɔ̃ɖiwo si me, eye wòaɖe wo,Elabena wosii tso.+
Etenuŋɔŋlɔ
^ Egɔmeɖeɖe tẽe, “Mli wò mɔwo ɖo Yehowa dzi.”
^ Alo, “Eye nàkpɔ esinu dzigbɔɖitɔe.”
^ Agate ŋu afia, “Dzi megaku wò o, elabena nu vɔ̃ɖi ko nàyi wɔwɔ ge.”
^ Alo, “wode ka dati ŋu.”
^ Egɔmeɖeɖe tẽe, “Ame maɖifɔwo ƒe ŋkekewo.”
^ Alo, “vea ame nu.”
^ Alo, “nana ame ƒe afɔɖeɖewo lia ke.”
^ Alo, “Yehowa tsɔa eƒe asi lénɛ ɖe te.”
^ Alo, “nuɖuɖugbe.”
^ Alo, “Nunya dona le ame dzɔdzɔe ƒe nu me blewu.”
^ Alo, “ame si wɔa nuteƒe.”
