Ƒo nu tso wò ɖevimenɔɣi ŋu na mí.

Esi mexɔ ƒe asieke la, míaƒe ƒomea ʋu tso Spain va tsi France. Dzinyelawo nye Katolikotɔwo, gake esi mexɔ ƒe 16 la, nyemegava xɔ Mawu dzi se o. Le nye susu nu la, viɖe aɖeke mele mawusubɔsubɔ me o. Ne ame aɖe biam be, ne Mawu meli o la, ke aleke agbe wɔ dze egɔme mahã la, meɖoa eŋu nɛ be: “Fifia dzɔdzɔmeŋutinunyalawo mete ŋu ɖe eme haɖe o, gake gbe ɖeka woava kpɔ ŋuɖoɖo na nya ma.”

Nu ka tae nèsrɔ̃ nu tso ayikudɔ ŋu?

Mesrɔ̃ nu le ɖɔktasuku le Montpellier si le France. Nufialagã aɖe si le sukua me la ɖo aɖaŋu nam be masrɔ̃ nu tso ayikudɔ ŋu. Dɔ sia bia numekuku kple dɔnɔwo gbɔ kpɔkpɔ le ɣeyiɣi ma ke me. Dɔ sia tututu dim mele be mawɔ. Le ƒe 1990 me la, meva nɔ nu srɔ̃m tso lãmetsi si dzia ʋumenugbagbevi dzĩwo ɖe edzi le ame ƒe ƒu me la ŋu. Ɣemaɣi la, wobunɛ be enye numekuku yeye.

Nu kae na nèva di be yeanya ne Mawu li?

Tso keke ƒe 1979 me la, Yehowa Ðasefowo va nɔ Biblia srɔ̃m kple srɔ̃nye Floréal. Gake nyemetsɔ ɖeke le eme o. Esi menɔ ɖevime la, mawusubɔsubɔ ti kɔ nam. Ke hã srɔ̃nye kple mía viwo va zu Yehowa Ðasefowo, eye medidi o mía xɔlɔ̃wo katã kloe zu Yehowa Ðasefowo. Mía xɔlɔ̃awo dometɔ ɖeka si ŋkɔe nye Patricia ɖo aɖaŋu nam be manɔ gbe dom ɖa. Egblɔ nam be: “Ne ame aɖeke mele dziƒo se wò gbedodoɖa o hã la, magblẽ naneke le ŋuwò o. Gake  ne ame aɖe li la, wò ŋutɔ àkpɔ nu si adzɔ.” Le ƒe aɖewo megbe la, meva di be manya tameɖoɖo si le agbea ŋu, eye meɖo ŋku Patricia ƒe nyawo dzi. Ale wɔ meva nɔ gbe dom ɖa be mate ŋu ase nuwo gɔme.

Nu ka tae nèva di be yeanya tameɖoɖo si le agbea ŋu?

Esi ŋɔdzinuwɔlawo dze Xexeame Katã ƒe Asitsaƒegã si le New York dzi la, mebia ɖokuinye be nu ka tae nu vɔ̃ɖi wɔwɔ xɔ aƒe ɖe amegbetɔwo dome mahã. Megblɔ na ɖokuinye be: ‘Mawusubɔla zazɛ̃nyahelawo le afɔku gã aɖe he ge ava mía dzi. Ke hã nye ame nyanyɛ gbogbo aɖewo nye Yehowa Ðasefo ŋutifafamewo. Woawo ya to vovo sãsãsã na zazɛ̃nyahelawo. Wowɔna ɖe Biblia me nyawo dzi. Ðewohĩ ahiã be nye hã madzro Biblia me kpɔ.’ Ale wɔ mede asi Biblia xexlẽ me.

Ðe wòsesẽ na wò be nàxɔe ase be Wɔla aɖe li le esi nènye ɖɔkta ta?

Ao. Mekpɔa ŋudzedze ɖe ale si míaƒe ametia ƒe wɔwɔme wɔ nukue la ŋu ŋutɔ. Le kpɔɖeŋu me, ale si míaƒe ayiku nana be ʋumenugbagbevi dzĩwo ƒe agbɔsɔsɔ dana sɔna le míaƒe ʋu me la wɔ nuku nam ŋutɔ.

Nu kae na nègblɔ nenema?

Ðewohĩ ènyae be ʋumenugbagbevi dzĩwoe tsɔa ya ƒomevi si woyɔna be ɔksidzin la yia ŋutilã ƒe akpa vovovowo. Ne ʋu sɔgbɔ do le ŋuwò alo nèle teƒe kɔkɔ aɖe la, ɔksidzin masɔ gbɔ le lã me na wò o. Míaƒe ayikuwo dea dzesi ɔksidzin ƒe agbɔsɔsɔ si le lã me na mí. Ne wode dzesii be ɔksidzin mesɔ gbɔ le lã me na mí kura o la, wonana be lãmetsi si nana be ʋumenugbagbevi dzĩwo dzina ɖe edzi la sɔna gbɔ ɖe edzi abe teƒe akpe ɖeka ene. Lãmetsi sia nana be ƒutomemiwo wɔa ʋumenugbagbevi dzĩ yeyewo, eye ʋumenugbagbevi siawo tsɔa ɔksidzin gbogbo aɖewo yia ŋutilã ƒe akpa vovovowo. Ewɔ nuku loo! Togbɔ be mesrɔ̃ nu siawo hã la, ƒe ewo megbe hafi meva nyɔ le ɖokuinye me be Mawu koe ate ŋu awɔ nu wɔnuku mawo gbegbe.

Aleke nèbua Bibliae?

Mexlẽ ŋutinyagbalẽ kple modzakaɖegbalẽ xɔŋkɔ geɖewo, gake esi mexlẽ Biblia la, mekpɔe dze sii enumake be eto vovo. Aɖaŋuɖoɖo siwo le eme ɖea vi na ame ale gbegbe be mekpɔe be ele be wòatso ame aɖe si kɔ boo wu amegbetɔwo gbɔ. Yesu ƒe nuwɔnawo wɔ dɔ ɖe dzinye ŋutɔ. Mekpɔe be ame ŋutɔŋutɔe wònye. Seselelãmewo le esi eye xɔlɔ̃wo hã nɔ esi. Esi wònye be nyemedi be maxlẽ Yehowa Ðasefowo ƒe agbalẽwo o ta la, mekua nu me le numekugbalẽwo kple agbalẽ bubuwo me ne medi be makpɔ ŋuɖoɖo na nyabiase aɖewo.

Nu kawo ŋue nèkua nu me le?

Nu siwo wɔ dɔ ɖe dzinye la dometɔ ɖekae nye ale si Biblia gblɔ ƒe si me woanyrɔ Yesu ɖe tsi me la ɖi. Egblɔ ƒe agbɔsɔsɔ siwo ava yi tso Persia-dziɖula Artaxsasta ƒe dziɖuɖu ƒe ƒe 20 lia me dzi va se ɖe ƒe si me Yesu ado abe Mesia ene. * Numekuku mam elabe nye dɔa ƒe akpa ɖee wònye. Eya ta meku nu me le ŋutinyagbalẽwo me be makpɔ kpeɖodzi na ƒe siwo me Artaxsasta ɖu dzi kple ƒe siwo me Yesu wɔ eƒe subɔsubɔdɔa. Mlɔeba meƒo nya ta be Biblia me nyagblɔɖi sia va eme ɖe ɣeyiɣi dzi pɛpɛpɛ, eye meƒo nya ta be Mawu ƒe gbɔgbɔe kokokoe anya ʋã ame siwo ŋlɔe.