Ƒo nu tso wò ƒometɔwo kple hehe si nèxɔ ŋu na mí.

Dzinyelawo da ahe kolikoli eye nɔnye meɖo afɔ suku xɔ me kpɔ o. Míenyia ha eye míedea amagbewo ƒe agble hã le teƒe aɖe si tsi ɖɔna ɖo edziedzi si te ɖe Taipei-dua ŋu. Dzinyelawo fia nu si tae wòle vevie be manye dɔ sesẽ wɔla lam eye wofiam hã be makpe ɖe amewo ŋu.

Mawusubɔlawoe dziwòlawo nyea?

Dzinyelawo nye Tao-subɔsubɔha me tɔwo. Míesaa vɔ na “Dziƒo Mawu” la, gake míenya naneke tso eŋu o. Mebiaa ɖokuinye be: ‘Nu ka tae amewo ɖua aya? Nu ka tae amewo dia wo ɖokuiwo tɔ?’ Mexlẽ agbalẽ geɖe tso Tao-subɔsubɔha, Buddha-subɔsubɔha kpakple Europatɔwo kple Amerikatɔwo ƒe ŋutinyawo ŋu. Mede sɔleme geɖewo gɔ̃ hã. Gake nyemete ŋu kpɔ nye nyabiaseawo ƒe ŋuɖoɖowo o.

Nu ka tae nèsrɔ̃ dzɔdzɔmeŋutinunya?

Melɔ̃ akɔntabubu, eye se siwo fiaa mɔ ɖoɖo si nu dzɔdzɔmenuwo nɔna la wɔa dɔ ɖe dzinye ŋutɔ. Se aɖewoe fiaa mɔ ɖoɖo si nu nuwɔwɔ ɖe sia ɖe wɔa dɔ le, tso xexeme gbahoo sia dzi va se ɖe nugbagbevi suetɔ kekeake dzi. Medi vevie be mase ale si se siawo wɔa dɔe la gɔme.

Nu ka tae nèxɔ nufiafia si nye be ɖeko nuwo dzɔ le wo ɖokuiwo si la dzi se tsã?

Nyemesrɔ̃ naneke si tsi tre ɖe nufiafia sia ŋu kpɔ o. Le nye sekɛndrisukudeɣi kple yunivɛsitideɣi sia la, wofiaa mí be ɖeko nuwo dzɔ le wo ɖokuiwo si. Eye esi wònye mekua nu me tso nu gbagbewo ŋu ta la, ele nam be maxɔ nufiafia si nye be ɖeko nuwo dzɔ le wo ɖokuiwo si la dzi se.

Nu kae na nèva dze Biblia xexlẽ gɔme?

Meʋu yi ɖatsi Germany le ƒe 1996 me be masrɔ̃ nu ayi ŋgɔe le  nye yunivɛsitiɖaseɖigbalẽ gbãtɔ xɔxɔ megbe. Le ƒe si kplɔe ɖo me la, medo go aƒenɔ aɖe si ŋkɔe nye Simone. Yehowa Ðasefoe wònye, eye egblɔ be yeakpe ɖe ŋunye makpɔ ŋuɖoɖo na nye nyabiasewo le Biblia me. Esi wògblɔ nam be Biblia gblɔ nu si ta míele agbe ɖo la, ewɔ dɔ ɖe dzinye ale gbegbe. Esia ta mefɔna fɔŋli ga ene kple afã gbe sia gbe xlẽa Biblia gaƒoƒo ɖeka sɔŋ. Eyome menɔa zɔzɔm le nutoa me henɔa ŋugble dem le nu siwo mexlẽ ŋu. Le ƒe si kplɔe me la, mexlẽ Biblia katã vɔ. Ale si Biblia me nyagblɔɖiwo va eme pɛpɛpɛ la wɔ dɔ ɖe dzinye ŋutɔ. Vivivi la, meva ka ɖe edzi bliboe be Mawu gbɔe Biblia la tso.

Afi kae nèsusuna tsã be nu gbagbewo dzɔ tso?

Esi menɔ afi si nu gbagbewo dzɔ tso ŋu bum vevie le ƒe 1990 ƒe nuwuwu la, molecule ŋuti nunyalawo va te dzesidedee be ɖoɖo si nu nu gbagbewo ƒe lãmenuwo le kple woƒe dɔwɔwɔ de ŋgɔ sãsãsã wu ale si wobui tsã. Enye nyateƒe be dzɔdzɔmeŋutinunyalawo nyae tso gbe aɖe gbe ke be nunyiame siwo le nu gbagbewo ƒe lãmenugbagbeviwo me la ƒe wɔwɔme kple dɔwɔwɔ gɔme sese sesẽ wu molecule ɖe sia ɖe si li la tɔ. Gake fifia la, wova nya nu tso ale si protein gbogbo aɖewo ƒua ƒu wɔa mɔ̃ siwo ƒe akpa aɖewo zɔna la ŋu. Protein 50 kple edzivɔwo ƒoa ƒu wɔa molecule-mɔ̃ ɖeka. Eye lãmenugbagbevi suetɔ kekeake gɔ̃ hã hiã mɔ̃ siawo ƒe ƒuƒoƒo vovovowo be wòawɔ dɔ vovovowo. Le kpɔɖeŋu me, ehiã mɔ̃ sia be wòatsɔ awɔ ŋusẽ, agbugbɔ nyatakakawo aŋlɔ alo be wòadzɔ mɔnu vovovo siwo le lãmenugbagbevia ŋuti la nu.

Aleke esia na nèƒo nya tae?

Mebia ɖokuinye be, ‘Aleke wòdzɔe be protein-mɔ̃ mawo de ŋgɔ nenema gbegbe?’ Ɣemaɣi la, ale si gbegbe lãmenugbagbeviwo ƒe wɔwɔme de ŋgɔ eye wo gɔme sese sesẽe la na be dzɔdzɔmeŋutinunyala geɖewo hã bia nya sia ke. Lãmetsiŋutinunyalagã aɖe si le United States ta agbalẽ aɖe si ɖe nu me be molecule-mɔ̃ siwo le lãmenugbagbeviwo me de ŋgɔ ale gbegbe be womate ŋu adzɔ le wo ɖokuiwo si o. Melɔ̃ ɖe eƒe nyaa dzi. Mekpɔe be ame aɖe kokokoe wɔ nu gbagbewo.

Nu kae na nèva zu Yehowa Ðasefo?

Ale si Simone mele lãmesẽ me tututu o gake wòzɔa mɔ kilometa 56 kwasiɖa sia kwasiɖa va fiaa Bibliam la wɔ dɔ ɖe dzinye ale gbegbe. Mese be esime Nazitɔwo ɖu Germany dzi la, wode Yehowa Ðasefo aɖewo fuwɔamegaxɔwo me le esi wogbe be yemade nu dunyahehe me o ta. Eye ale si dzi nɔ wo ƒoe hã wɔ dɔ ɖe dzinye ŋutɔ. Nenema kee ale si gbegbe Ðasefoawo lɔ̃ Mawui na meɖoe be manɔ abe woawo ke ene.

Esi nèxɔ Mawu dzi se la, vi kae wòɖe na wò?

Nye dɔwɔhatiwo gblɔ be fifia ya mele dzidzɔ kpɔm ŋutɔ. Tsã la, mebua ɖokuinye be nyemele ɖeke me o, eye wòkpea ŋu nam be maƒo nu tso nye ƒometɔwo ŋu le esi wonye ame dahewo ta, eye nyemenana wonyaa du si me tɔ menye o. Meva srɔ̃e le Biblia me be ɖoƒe si ame le le agbe me menɔa vevie na Mawu o. Le nyateƒe me la, anɔ eme be ƒome si me wonyi Yesu le la da ahe abe míaƒe ƒomea ene. Fifia metsɔa ɖe le eme na dzinyelawo eye meɖea wo fiaa xɔ̃nyewo.