AME AÐEWO XƆE SE be ne ame ku la, eyia edzi nɔa agbe le nɔnɔme bubu aɖe me, gake ame aɖewo hã ka ɖe edzi be ku nye nu sia nu ƒe nuwuwu. Nu kae nye wò susu?

NYA SI BIBLIA GBLƆ

“Kukuawo meganya naneke kura o.” (Nyagblɔla 9:5) Ne ame ku la, efia be megale afi aɖeke o.

NU BUBU SI MÍESRƆ̃ LE BIBLIA ME

• Anyi wotsɔ mè ame gbãtɔ, Adam, eye anyi ke wògatrɔ zu. (1 Mose 2:7; 3:19) Nenema kee wòdzɔna ɖe ame siwo katã le kukum egbea hã dzi, wozua anyi.—Nyagblɔla 3:19, 20.

• Wotso afia na ame siwo ku la hetsɔ woƒe nu vɔ̃wo ke wo. (Romatɔwo 6:7) Eya ta ne ame ku, nu vɔ̃ ƒe tohehe bubu aɖeke megali nɛ o.

ALEKE NÀÐO EŊUI?

• Ɛ̃a?

• Aoa?

• Yemenya oa?

NYA SI BIBLIA GBLƆ

“Tsitretsitsi li.”—Dɔwɔwɔwo 24:15.

NU BUBU KAE MÍATE ŊU ASRƆ̃ LE BIBLIA ME?

• Biblia tsɔa ku sɔna kple alɔ̃dɔdɔ zi geɖe. (Yohanes 11:11-14) Mawu ate ŋu afɔ kukuawo tso ku me, abe ale si ko míetea ŋu nyɔa ame tso alɔ̃ me ene.—Hiob 14:13-15.

• Amewo fɔfɔ tso ku me ŋuti nuŋlɔɖi geɖe le Biblia me, eye esia na kakaɖedzi sẽŋu mí be woava fɔ ame siwo ku la ɖe tsitre.—1 Fiawo 17:17-24; Luka 7:11-17; Yohanes 11:39-44.