Fuléle Nu Ayi Keŋkeŋ Gbe Ðeka!
Ne míawo ŋutɔwo míedzudzɔ fuléle amewo hãa, mímate ŋu ana amewo nadzudzɔ fuléle o. Eya ta, amewo ayi edzi anɔ nu manyomanyo wɔm ɖe ame bubuwo ŋu le fuléle ta. Ke ame kae ate ŋu aɖe fuléle ɖa keŋkeŋ?
Yehowa Mawu koe ate ŋui, eye nu ma tututue Biblia do ŋugbe be awɔ.—Lododowo 20:22.
MAWU AÐE NU SIWO GBƆ FULÉLE TSO ÐA KEŊKEŊ
-
1. SATANA ABOSAM. Satana koŋ gbɔe fuléle siwo teƒe kpɔm míele egbea tso. Mawu atsrɔ̃ Satana kple ame siwo katã srɔ̃a eyama eye woléa fu amewo.—Psalmo 37:38; Romatɔwo 16:20.
-
2. SATANA ƑE XEXE SI ME YƆ FŨU KPLE FULÉLE. Mawu atsrɔ̃ ame siwo katã doa fuléle ɖe ŋgɔ le xexe vɔ̃ɖi sia me. Wo dometɔ aɖewoe nye subɔsubɔhakplɔla kple dunyahela siwo wɔa nu fitifiti. Azɔ hã, Mawu atsrɔ̃ asitsala siwo klẽa ŋu eye wotafaa amewo.—2 Petro 3:13.
-
3. BLIBOMADEMADE. Biblia ɖee fia be amegbetɔwo mede blibo o, eya ta míaƒe nuŋububu, nuwɔna, kple seselelãmewo nyea vɔ̃ zi geɖe. (Romatɔwo 5:12) Esia wɔnɛ be míeléa fu amewo ɣeaɖewoɣi. Gake Mawu ava ɖe blibomademade ɖa keŋkeŋ, akpe ɖe mía ŋu míawɔ tɔtrɔ siwo hiã, eye esia ana fuléle nu nayi tegbee.—Yesaya 54:13.
BIBLIA DO ŊUGBE BE XEXE AÐE AVA SI ME FULÉLE MANƆ O
-
1. NU MADZƆMADZƆ WƆWƆ MANƆ ANYI O. Mawu Fiaɖuƒe si le dziƒo ye aɖu anyigba bliboa dzi, eye wòana amewo nawɔ nu dzɔdzɔe tegbee. (Daniel 2:44) Nazãbubu kple fuléle manɔ anyi o. Mawu aɖɔ nu madzɔmadzɔ siwo katã wɔm wole ɖe amewo ŋu egbea ɖo.—Luka 18:7.
-
2. ŊUTIFAFA AXƆ AƑE ÐI. Ame aɖeke magakpe fu le ŋutasẽnuwɔwɔ alo aʋawɔwɔ ta o. (Psalmo 46:9) Anyigbaa anye dedienɔƒe, elabe ame siwo katã anɔ edzia alɔ̃ ŋutifafa.—Psalmo 72:7.
-
3. AME SIA AME ANƆ AGBE TEGBEE LE DZIÐEÐI ME. Ame siwo katã anɔ anyigba dzia alɔ̃ wo haviwo. (Mateo 22:39) Ame aɖeke matsi dzimaɖi alo aɖo ŋku nane si ana wòaxa nu dzi o. (Yesaya 65:17) Ne fuléle nu yi keŋkeŋ la, “dzi adzɔ [amegbetɔwo] geɖe ɖe ŋutifafa gbogbo la ŋuti.”—Psalmo 37:11.
Ðe medzro wò be nànɔ xexe ma me oa? Fifia gɔ̃ hã, Biblia le kpekpem ɖe ame geɖe ŋu be woadzudzɔ fuléle. (Psalmo 37:8) Nu ma wɔmee Yehowa Ðasefo miliɔn geɖe siwo le xexea me katãa le. Togbɔ be wonye ame vovovowo eye wotso teƒe vovovowo hãa, wolɔ̃ wo nɔewo eye wowɔ ɖeka abe ƒome ene.—Yesaya 2:2-4.
Adzɔ dzi na Yehowa Ðasefowo be yewoafia wò nu si kpena ɖe yewo ŋu yewodoa dzi, ne amewo mewɔ nu ɖe yewo ŋu nyuie o hã. Nu siwo woafia wòa akpe ɖe ŋuwò be vivivia, nàna lɔlɔ̃ naxɔ ɖe fuléle teƒe. Àva srɔ̃ ale si nàwɔ nu ɖe amewo katã ŋu nyuie; ame siwo mekpɔa ŋudzedze ɖe nu ŋu o kple ame siwo léa fu wò gɔ̃ hã. Esia ana nàkpɔ dzidzɔ fifia, eye wò kple amewo dome anɔ nyonyom ɖe edzi. Vevietɔ wua, àsrɔ̃ nu siwo wòle be nàwɔ be nàva nɔ agbe tegbee le anyigbaa dzi ne Mawu Fiaɖuƒea va ɖe fuléle ɖa keŋkeŋ.—Psalmo 37:29.
Ɖewohĩ Esia Hã Adzɔ Dzi Na Wò
GBETAKPƆXƆ
Nu Kae Mawu Fiaɖuƒea Awɔ?
Yesu nyae be Mawu Fiaɖuƒea koe nye dziɖuɖu si ate ŋu akpɔ amegbetɔwo ƒe kuxiwo gbɔ le anyigba dzi. Nu kawoe Fiaɖuƒea wɔ xoxo si na míeka ɖe edzi?
NYƆ!
Nazãbubu—Nu Si Ate Ŋu Aɖe Nazãbubu Ða Keŋkeŋ
Nu ene kawoe Mawu Fiaɖuƒea awɔ atsɔ aɖe nazãbubu ɖa?
