YOMARA kple nɔviaŋutsu siwo nye Marcelo kple Hiver le kɔƒe sue aɖe me le Guatemala. Ðasefowo te Biblia sɔsrɔ̃ kple Yomara, eye emegbe nɔviaŋutsuawo hã va te nusɔsrɔ̃. Gake kuxi aɖe li. Wo ame etɔ̃a katã nye ­ŋkunɔwo, eye womenya ŋkunɔgbe xexlẽ hã o. Eya ta ame si le Biblia srɔ̃m kpli wo xlẽa nusɔsrɔ̃a me nyawo kple mawunyakpukpuiawo na wo.

Hame ƒe kpekpewo dede hã nye kuxi bubu. Fiaɖuƒe Akpata si te ɖe wo ŋu wua gbɔ didi miniti 40, eye woawo ɖeɖe mate ŋu ayi agbɔ o. Eya ta nɔviwo wɔ ɖoɖo be yewoanɔ wo kplɔm ayi kpekpeawo katã. Eye esi wova nɔ sukuvi ƒe dɔdeasiwo wɔm le kwasiɖa domedome kpekpea mea, nɔviawo kpena ɖe wo ŋu woléa dɔdeasiawo me nyawo ɖe susu me va wɔna.

Le May 2019 mea, wote kpekpewo wɔwɔ le woƒe kɔƒea me. Do ŋgɔa, atsu kple asi aɖe siwo nye gbesiagbe mɔɖelawo ʋu va tsi kɔƒea me. Woɖoe be yewoafia ŋkunɔgbe Yomara kple nɔviawo, evɔ woawo ŋutɔwo hã womenya ŋkunɔgbe o! Eya ta woyi agbalẽdzraɖoƒe aɖe va srɔ̃ ale si woŋlɔa ŋkunɔgbe kple ale si wofianɛ amewo.

Le ɣleti ʋɛ aɖewo ko mea, Yomara kple nɔviawo tea ŋu va xlẽa ŋkunɔgbe bɔbɔe, eye esia kpe ɖe wo ŋu wogava se mawusubɔsubɔ gɔme nyuie wu. a Fifia, Yomara, Marcelo, kple Hiver nye gbesiagbe mɔɖelawo, eye Marcelo nye subɔsubɔdɔwɔla. Wowɔa subɔsubɔdɔa vevie kwasiɖa bliboa. Ale si gbegbe wokpɔa dzidzɔ ɖe dɔa ŋu ʋãa ame bubuwo hã be woawɔe.

Nɔvinyɔnu Yomara kple nɔviawo da akpe na hamea ɖe ale si gbegbe wolɔ̃ yewo hekpena ɖe yewo ŋu ta. Yomara gblɔ be: “Zi gbãtɔ si míenya do go Ðasefowo koa, woɖe lɔlɔ̃ vavã si wòle be Kristotɔwo naɖe afiaa fia mí.” Marcelo hã gblɔ be: “Xɔlɔ̃ vavãwo le mía si le hamea me, nɔviwo le mía si le xexea me godoo, eye lɔlɔ̃ bla mí ɖekae.” Yomara kple nɔviawo le mɔ kpɔm vevie na ɣeyiɣi si me woatrɔ anyigbaa wòazu paradiso, eye woakpɔe kple woƒe ŋkuwo.​—Ps. 37:​10, 11; Yes. 35:⁠5.