Biblia gblɔ be: “Ne ame vɔ̃ɖi le fia ɖum la, dukɔ ɖua tse.”—Lododowo 29:2.

Tso blema ke la, ŋutasẽdziɖula geɖewo tea wo teviwo ɖe anyi, si wɔnɛ be wokpea fu geɖe ŋutɔ. Enye nyateƒe be menye aleae dziɖulawo katã le ya o. Wo dometɔ aɖewo di vevie be yewoakpe ɖe yewo havi amegbetɔwo ŋu hafi. Ke hã ne wonya va zia dzi ko la, wokpɔnɛ dzea sii be tsitretsiɖeŋu kple hoʋiʋli doa kplamatsɛ yewoƒe agbagbadzedzewo. Alo ɖewohĩ wowɔa woƒe ŋusẽ ŋu dɔ le mɔ gbegblẽ nu le woawo ŋutɔwo ƒe viɖekpɔkpɔ ta, eye esia gblẽa nu le wo teviwo ŋu. Henry Kissinger, si nye United States Dukɔa ƒe Agbalẽŋlɔla tsã, gblɔ be: “Ŋutinya me yɔ fũu kple agbagbadzedze siwo do kpo nu kpakple mɔkpɔkpɔ siwo meva eme o.”

Biblia gblɔ hã be: “Ŋutsu ƒe zɔzɔme la menye eya ŋutɔ si me wòle, ne eƒe azɔlime nato mɔ ɖeka o.” (Yeremiya 10:23) Nunya kple gɔmesese si hiã la mele amegbetɔ madeblibowo si be woakplɔ wo ɖokuiwo dzidzedzetɔe o. Ne amegbetɔwo mate ŋu afia mɔ woawo ŋutɔwo ƒe zɔzɔme o ɖe, aleke woawɔ akplɔ dukɔ blibo? Èkpɔ nu si tae ŋutete mele dziɖula siwo nye amegbetɔwo si be woaɖe fukpekpe ɖa oa? Le nyateƒe me la, dziɖuɖu gbegblẽ gbɔe wòtsona zi geɖe be amewo kpea fu!

Yesu gblɔ be: “Esia me amewo katã anyae le be nye nusrɔ̃lawo mienye, ne lɔlɔ̃ le mia dome.”—Yohanes 13:35.

Subɔsubɔha ƒomevi vovovoawo katã ƒoa nu tso lɔlɔ̃ kple ɖekawɔwɔ ŋu. Gake nyateƒeae nye be womete ŋu ƒã lɔlɔ̃ vavã si ana woƒe hameviwo nadzudzɔ ameŋkumekpɔkpɔ la ɖe wo me o. Le esi teƒe be subɔsubɔhawo nakpe ɖe amewo ŋu be woalɔ̃ wo haviwo la, mama, fuléle kple dzre boŋue wodea to vovovo me tɔwo kple dukɔmeviwo dome zi geɖe. Mawunyaŋutinunyala Hans Küng ŋlɔ ɖe eƒe agbalẽ aɖe ƒe nyataƒonya me be: “Dunyahehe ƒe hoʋiʋli siwo me amewo wɔ ŋutasẽnu eye wohe zazɛ̃nya le wu lae nye esiwo dzi subɔsubɔhawo da asi ɖo, do ɖe ŋgɔ heda megbe na.”—Christianity and the World Religions.

 Tsɔ kpe ɖe eŋu la, subɔsubɔhakplɔla geɖewo ɖee fia le dutoƒo be yewoda asi ɖe gbɔdɔdɔ do ŋgɔ na srɔ̃ɖeɖe, ahasiwɔwɔ kple ŋutsu kple ŋutsu alo nyɔnu kple nyɔnu ƒe dɔdɔ dzi. Nu siawo hea dɔléle, fuɖeɖe, gbɔmeyafufɔfɔ, srɔ̃gbegbe kple ƒomewo ƒe gbagbã vanɛ eye emetsonu nyea vevesese kple nuxaxa geɖe.

“Nu si tea ame sia ame kpɔ lae nye ye ŋutɔ ƒe nudzodzro si henɛ, eye wòblenɛ. Azɔ ne nudzodzro la fɔ fu la, edzia nu vɔ̃.”—Yakobo 1:14, 15.

Mí katã míedaa vo le esi wodzi mí ame madeblibowoe ta, eye avu kple kɔe wònyena be míaƒo asa na “nu siwo ŋutilã la kple tamesusuwo di la [wɔwɔ].” (Efesotɔwo 2:3) Eye ne dzodzro vɔ̃ nyɔ ɖe mía me le ɣeyiɣi si me mɔnukpɔkpɔ ʋu ɖi be míawɔ ɖe edzi la, ɖokuidziɖuɖu gasesẽna ŋutɔ. Ne míeɖu dzodzro vɔ̃ dzi o la, ate ŋu agblẽ nu ŋutɔ.

Agbalẽŋlɔla P. D. Mehta ŋlɔ bena: “Nu siwo hea fukpekpe akpa gãtɔ vanɛ ye nye míawo ŋutɔwo ƒe nudzodzrowo, míaƒe dzidzɔkpɔkpɔ yome nɔnɔ atraɖii kple agbeɖuɖu blibaa, míaƒe ŋukeklẽ kple míaƒe nu gã didi.” Nudzodzro kple numame ƒomevi vovovoawo—aha muame, atike vɔ̃ɖi, tsatsadada, gbɔdɔdɔ manɔsenu kple bubuawo—yome nɔnɔ na “dukɔmevi bubume” geɖewo ƒe agbe dome gblẽ eye wòhe fukpekpe va woƒe ƒometɔwo, xɔlɔ̃wo kple ame bubuwo dzi. Esi amegbetɔƒomea mede blibo o ta la, ele be míalɔ̃ ɖe Biblia ƒe nya sia dzi be: “Míenyae be nuwɔwɔ blibo la katã le ŋeŋem ɖekae, eye wòle veve sem ɖekae va se ɖe fifia.”—Romatɔwo 8:22.

Biblia na míenya be Satana ye nye “nuɖoanyi sia ƒe mawu” eye gbɔgbɔmenuwɔwɔ vɔ̃ɖi siwo si ŋusẽ le, siwo woyɔna be gbɔgbɔ vɔ̃wo la kpe ɖe eŋu.—2 Korintotɔwo 4:4; Nyaɖeɖefia 12:9.

Abe Satana ke ene la, gbɔgbɔ vɔ̃wo le agbagba dzem vevie le ŋusẽ kpɔm ɖe amewo dzi hele wo blem. Apostolo Paulo lɔ̃ ɖe nya sia dzi esime wògblɔ be: “Míele kame tem, menye kple ʋu kpakple ŋutilã o, ke boŋ kple dziɖuɖuwo, kple ŋusẽwo, kple viviti sia ƒe xexemedziɖulawo, kple gbɔgbɔmeŋusẽ vɔ̃ɖi siwo le dziƒonutowo me.”—Efesotɔwo 6:12.

Togbɔ be fuwɔwɔ amewo doa dzidzɔ na gbɔgbɔ vɔ̃wo hã la, menye emae nye woƒe taɖodzinu vevitɔ o. Woƒe taɖodzinu vevitɔe nye be yewoahe amewo ɖe aga tso Mawu Dziƒoʋĩtɔ, Yehowa, gbɔ. (Psalmo 83:19) Ameflunu siwo dzi wotona blea amewo hekpɔa ŋusẽ ɖe wo dzi la dometɔ aɖewoe nye ɣletivimefakaka, akunyawɔwɔ, gbɔgbɔyɔyɔ kple afakaka. Esia tae Yehowa xlɔ̃a nu mí tso nu mawo ŋu eye wòkpɔa ame siwo katã tsia tre ɖe Satana kple gbɔgbɔ vɔ̃wo ŋu la ta ɖo.—Yakobo 4:7.

Ƒe akpe eve kloe ye nye esia Biblia gblɔ ɖi be: ‘Nya esia be, le ŋkeke mamlɛawo me la, ɣeyiɣi sesẽ siwo me nɔnɔ asesẽ la ava.’

Ehe susu yi nu siwo ana nɔnɔmeawo nasesẽ la dzi esi wògblɔ be: “Elabena amewo anye ɖokuilɔ̃lawo, galɔ̃lawo, adegbeƒolawo, ɖokuidoɖedzilawo, . . . ame siwo melɔ̃a ame ƒe nya o, ame siwo melɔ̃na ɖe nya aɖeke dzi o, ameŋugblẽlawo, ame siwo meɖua wo ɖokuiwo dzi o, ame wɔadãwo, ame siwo melɔ̃a nu nyui o, yomemɔfialawo, ame magbɔdziɖiwo, ame siwo doa wo ɖokuiwo ɖe dzi glodzoo, ame siwo lɔ̃a dzidzɔkpɔkpɔ le esi teƒe be woalɔ̃ Mawu.” Eme kɔ ƒãa be susu vevi ɖeka aɖe si tae míele fukpekpe siawo gbegbe teƒe kpɔm lae nye be míele “ŋkeke mamlɛawo” me.—2 Timoteo 3:1-4.

Esi nèxlẽ nu vovovo siwo me míedzro fifia vɔ ɖe, ɖe nu si tae amegbetɔwo mete ŋu le fukpekpe ɖem ɖa o, togbɔ be wodi vevie be yewoaɖee ɖa hafi la me mekɔ oa? Ekema afi kae míakpɔ kpekpeɖeŋu tsoe? Ele be míakpɔ mía Wɔla si do ŋugbe be “[yeagblẽ] Abosam ƒe dɔwɔwɔwo” kple eyomedzelawo tɔwo me la si nu. (1 Yohanes 3:8) Nyati si kplɔe ɖo la adzro nu si Mawu awɔ atsɔ aɖe nu siwo katã hea fukpekpe vanɛ ɖa la me.