Ðe Yehowa kpɔa ŋudzedze ɖe agbagba siwo esubɔlawo dzena be yewoadze eŋu la ŋua? Ame aɖewo aɖo eŋu be ao, eye woagblɔ be Mawu metsɔa ɖeke le eme na mí o. Gake nya ma nye alakpanyagbɔgblɔ ɖe Mawu ŋu. Eƒe Nya, Biblia la, na míenya nyateƒea. Ena míeka ɖe edzi be Yehowa kpɔa ŋudzedze ɖe agbagba siwo esubɔla nuteƒewɔlawo dzena be yewoasubɔe la ŋu. Bu apostolo Paulo ƒe nya si dze le Hebritɔwo 11:6 ŋu kpɔ.

Aleke míawɔ adze Yehowa ŋu? Paulo ŋlɔ bena: “Ne xɔse mele ame si o la, mate ŋu adze [Mawu] ŋu nyuie o.” De dzesii be Paulo megblɔ be asesẽ be woadze Mawu ŋu ne xɔse mele ame si o. Ke boŋ egblɔ be ne xɔse mele ame si o la mate ŋu adze Mawu ŋu o. Nya lae nye be, ele vevie ŋutɔ be xɔse nanɔ mía si hafi míate ŋu adze Mawu ŋu.

Xɔse ka ƒomevie dzea Yehowa ŋu? Ele be míaƒe Mawu dzi xɔse naɖe dzesi le go eve me. Gbã la, ele be ‘míaxɔe ase be eli.’ Biblia gɔmeɖeɖe bubuwo gblɔ be ele be ‘míaxɔe ase be eli vavã.’ Aleke míawɔ adze Mawu ŋu ne míeka ɖe edzi be eli o? Ke hã xɔse vavã bia nu geɖe wu ema, elabena gbɔgbɔ vɔ̃wo gɔ̃ hã xɔe se be Yehowa li. (Yakobo 2:19) Ne míexɔe se be Mawu li vavã la, ele be dɔwɔwɔ nakpe ɖe eŋu, si fia be míaɖe míaƒe xɔsea afia to ale si míanɔ agbe wòadze Mawu ŋu me.—Yakobo 2:20, 26.

Evelia, ele be ‘míaxɔe ase be’ Mawu nye “teƒeɖola.” Ele be ame si si xɔse akuakua le la naka ɖe edzi bliboe be agbagba siwo dzem yele be yeanɔ agbe wòadze Mawu ŋu la manye dzodzro o. (1 Korintotɔwo 15:58) Aleke míawɔ adze Yehowa ŋu ne míeka ɖe edzi be didi kple ŋutete le esi be wòaɖo míaƒe xɔse teƒe na mí o? (Yakobo 1:17; 1 Petro 5:7) Ne ame aɖe bu Mawu be metsɔa ɖeke ele eme na ame o, mekpɔa ŋudzedze ɖe míaƒe agbagbadzedzewo ŋu o, eye menyoa dɔme o la, efia be menya Mawu si ŋu Biblia ƒo nu tsoe la o.

Ame kawoe Yehowa ɖoa eteƒe na? Paulo gblɔ be: “Ame siwo dinɛ vevie.” Biblia gɔmeɖelawo ƒe numekugbalẽ aɖe gblɔ be Helagbe me nya si gɔme woɖe be “dinɛ vevie” la mefia be woanya Mawu ko evɔ o, ke boŋ efia be “woade ta agu” nɛ. Numekugbalẽ bubu aɖe hã gblɔ be Helagbe me nya ma si wozã la fia kutrikuku kple veviedodo. Ɛ̃, Yehowa ɖoa eteƒe na ame siwo ƒe xɔse ʋãa wo wosubɔnɛ dzonɔamemetɔe le esi wolɔ̃e kple dzi blibo ta.—Mateo 22:37.

Aleke Yehowa ɖoa eteƒe na esubɔla wɔnuteƒewo? Edo ŋugbe be yeatsɔ etsɔme nyui aɖe aɖo eteƒe na wo, si nye be woanɔ agbe tegbee le Paradiso me le anyigba dzi. Esia ɖe eƒe lɔlɔ̃ gã kple eƒe dɔmenyonyo fia. (Nyaɖeɖefia 21:3, 4) Fifia gɔ̃ hã la, yayra geɖe sua ame siwo dia Yehowa vevie la si. Eƒe gbɔgbɔ kɔkɔea kpakple nunya si le eƒe Nya, Biblia, me la kpena ɖe wo ŋu wonɔa agbe si me dzidzɔ kple dzidzeme le.—Psalmo 144:15; Mateo 5:3.

Vavãe, Yehowa nye Mawu si kpɔa ŋudzedze ɖe agbagba siwo esubɔla wɔnuteƒewo dzena be yewoasubɔe la ŋu eye wòdea asixɔxɔ wo ŋu. Ðe esia nyanya meʋã wò be nàte ɖe Mawu ŋu geɖe wu oa? Ne nenemae la, ɖe manyo be nàsrɔ̃ ale si nàtu xɔse si ƒomevi dzea Yehowa ŋu la ɖo eye nànɔ agbe ɖe enu be wòaɖo eteƒe na wò oa?