Ne dziɖuɖu ɖeka aɖee le anyigbaa dzi ɖum la, wò ya bu ale si wòaɖe vi na ameƒomeae ŋu kpɔ. Ame geɖe le fu kpem egbea le esi woda ahe kolikoli ta, evɔ kesinɔnuwo bɔ ɖe ame bubuwo ya si. Gake ne dziɖuɖu si aɖu anyigbaa katã dzi la ƒe dziɖulawo sea veve ɖe ame nu la, míate ŋu aka ɖe edzi be akpɔ amegbetɔwo katã ƒe nuhiahiãwo gbɔ na wo. Èsusu be amegbetɔwo ate ŋu aɖo dziɖuɖu sia tɔgbi anyia?—Xlẽ Yeremiya 10:23.

Le ŋutinya katã me la, dziɖuɖu ɖe sia ɖe do kpo nu le mɔ geɖe nu; womete ŋu kpɔ wo teviwo ƒe nuhiahiãwo gbɔ na wo o, vevitɔ ame dahewo. Bubuwo hã wɔ nu ŋutasesẽtɔe. (Nyagblɔla 4:1; 8:9) Gake Mawu Ŋusẽkatãtɔ la do ŋugbe be yeaɖo fiaɖuƒe aɖe anyi si ava xɔ ɖe dziɖuɖuwo katã teƒe. Fiaɖuƒe sia ƒe Fia alé be na eteviwo lɔlɔ̃tɔe.—Xlẽ Yesaya 11:4; Daniel 2:44.

Yehowa Mawu ŋutɔ tia ame si dze be wòanye Fiaɖuƒea ƒe Fia—eyae nye Via, Yesu. (Luka 1:31-33) Esi Yesu nye amegbetɔ nɔ anyigba dzi la, ekpena ɖe amewo ŋu ɣesiaɣi. Esi wòzu Fia azɔ la, ana dukɔwo katã me tɔwo nawɔ ɖeka, eye wòakpɔ egbɔ be ame aɖeke magakpe fu azɔ o.—Xlẽ Psalmo 72:8, 12-14.

Ðe ame sia ame alɔ̃ be Yesu nanye anyigba bliboa ƒe Fia? Ao. Ke hã Yehowa le wɔwɔm blewu. (2 Petro 3:9) Ele mɔnukpɔkpɔ nam ame sia ame be wòaxɔ Yesu Fia la. Eteƒe madidi o, Yesu atsrɔ̃ ame vɔ̃ɖiwo ɖa eye wòana ŋutifafa kple dedienɔnɔ naxɔ aƒe ɖe anyigbaa katã dzi.—Xlẽ Mixa 4:3, 4.