“Esi medo go kuxiwo le suku la, mebu ame si ƒe nu dzɔa dzi nam si hã to nɔnɔme ma tɔgbi me kpɔ la ŋu eye esia kpe ɖe ŋunye. Medze agbagba be masrɔ̃ eƒe kpɔɖeŋu. Esi ame aɖe li si ƒe kpɔɖeŋu mete ŋu srɔ̃ ta la, kuxiwo me toto nɔ bɔbɔe nam wu.”​—Haley.

Ne èsrɔ̃ kpɔɖeŋu nyui si ame aɖe ɖo la, ate ŋu akpe ɖe ŋuwò nàƒo asa na kuxiwo ahaɖo wò taɖodzinuwo gbɔ. Nu si le vevie nye be nàsrɔ̃ ame si ɖoa kpɔɖeŋu nyui.

•  Nu ka tae wòle be nàɖɔ ŋu ɖo le tiatia sia wɔwɔ me?

•  Ame si ƒe kpɔɖeŋu nàsrɔ̃ la tiatia

•  Nya siwo hawòtiwo gblɔ

• Ame siwo ƒe kpɔɖeŋu nàtiae be yeasrɔ̃ la akpɔ ŋusẽ ɖe wò nuwɔnawo dzi.

  Biblia fia mí be míalé ŋku ɖe ame siwo ɖoa kpɔɖeŋu nyui la ŋu, egblɔ be: “Esi miele nu siwo do tso woƒe agbenɔnɔ me ŋu bum la, misrɔ̃ woƒe xɔse.”​—Hebritɔwo 13:7.

  Kpekpeɖeŋu: Esi wònye be ame siwo ƒe kpɔɖeŋu nàsrɔ̃ akpɔ ŋusẽ nyui alo ŋusẽ gbegblẽ ɖe dziwò ta la, tia ame siwo si nɔnɔme nyui le, ke menye ame siwo xɔ ŋkɔ alo esiwo mi kpli wo miele ƒe me o.

  “Mesrɔ̃ nu geɖe tso hati Kristotɔ aɖe si ŋkɔe nye Adam gbɔ​—eƒe nɔnɔme kple ale si wòwɔa nu ɖe ame ŋu. Ewɔ nuku nam be megaɖoa ŋku eƒe nyagbɔgblɔ kple nuwɔnawo dzi. Menya ŋusẽ si gbegbe wòkpɔ ɖe dzinye o.”​—Colin.

• Ame siwo ƒe kpɔɖeŋu nàsrɔ̃ la akpɔ ŋusẽ ɖe wò tamebubu kple seselelãmewo dzi.

  Biblia gblɔ be: “Migana woaflu mi o. Hadede vɔ̃wo gblẽa nɔnɔme nyuiwo.”​—1 Korintotɔwo 15:33.

  Kpekpeɖeŋu: Tia ame si si nɔnɔme nyuiwo le, ke menye ame si nya kpɔ le gotagome ko o. Ne menye nenema o la, wò mɔkpɔkpɔ azu dzodzro.

  “Ne ètsɔa ɖokuiwò sɔna kple ame siwo dze ɖeka alo dze tugbe hedzrana ɖo kpeɖii ɣesiaɣi la, àse le ɖokuiwò me be ye ya yemele ɖeke me o. Ate ŋu ana nàva tsi dzi fũu akpa ɖe wò dzedzeme ŋu.”​—Tamara.

  Bu nya sia ŋu: Kuxi kawoe ate ŋu ado mo ɖa ne ame xɔŋkɔwo kple kamedefefewɔlawoe nye ame siwo ƒe kpɔɖeŋu nèsrɔ̃na?

• Ame siwo ƒe kpɔɖeŋu nàsrɔ̃ ate ŋu ana nàɖo wo taɖodzinuwo gbɔ loo alo màɖo wo gbɔ o.

  Biblia gblɔ be: “Ame si zɔna kple nunyalawo la, adze nunya.”​—Lododowo 13:20.

  Kpekpeɖeŋu: Tia ame siwo si nɔnɔme nyui siwo nèdi be yeaɖe afia la le. Ne èle ŋku lém ɖe wo ŋu la, àte ŋu asrɔ̃ afɔ ŋutɔŋutɔ siwo nàte ŋu aɖe be nàtu nɔnɔme mawo ɖo.

  “Be nàɖo taɖodzinu gbadzaa ko abe ‘Medi be maɖo ta’ teƒe la, àte ŋu agblɔ be, ‘Medi be maɖo ta abe Jane ene. Enɔa game dzi ɣesiaɣi eye wòléa fɔ ɖe eƒe dɔdeasiwo ŋu wɔna.’”​—Miriam.

  Nya vevitɔ: Ne èsrɔ̃ ame si ɖɔ ʋu ƒe kpɔɖeŋu la, àva zu ame si ƒomevi nèdi be yeanye.

Àte ŋu atia ame si ƒe kpɔɖeŋu nèdi be yeasrɔ̃ le mɔ eve siawo dometɔ ɖeka nu.

1. Àte ŋu atia nɔnɔme aɖe si nèdi be yeatu ɖo eye nàdi ame si ƒe nu dzɔa dzi na wò si si nɔnɔme ma le.

2. Àte ŋu atia ame si ƒe nu dzɔa dzi na wò eye nàtia nɔnɔme nyui aɖe si le esi si nèdi be yeatu ɖo.

Dɔwɔgbalẽvi si kpe ɖe nyati sia ŋu la akpe ɖe ŋuwò nàwɔ esia.

Ame siwo ƒe kpɔɖeŋu nàte ŋu asrɔ̃ la dometɔ aɖewo ate ŋu anye:

• Hawòtiwo. “Medi be manɔ abe xɔ̃nye vevia ene. Ne vovo mele eŋu o gɔ̃ hã la, etsɔa ɖe le eme na ame. Menye xoxo nɛ, gake mekpɔ nɔnɔme nyui aɖewo siwo mele asinye o la le eŋu eye medi be masrɔ̃ eƒe kpɔɖeŋu.”​—Miriam.

• Ame tsitsiwo. Esiawo ate ŋu anye dziwòlawo alo ame siwo le subɔsubɔ ɖeka me kpli wò. “Ðikeke mele eme o, dzinyela eveawo nye ame siwo ƒe kpɔɖeŋu mesrɔ̃na. Nɔnɔme nyui aɖewo le wo si. Wowɔa vodadawo ya, gake mekpɔe be wokpɔtɔ nye nuteƒewɔlawo hã. Ne metsi abe woawo ene la, avivi nam ne woate ŋu agblɔ nenema tso ŋunye.”​—Annette.

• Bibliamemewo. “Metia Bibliameme geɖe siwo ƒe kpɔɖeŋu medi be masrɔ̃ ɖe susu vovovowo ta. Woawoe nye Timoteo, Rut, Hiob, Petro, Israel-nyɔnuvi suea. Zi ale si mesrɔ̃ nu tso wo ŋu la, zi nenemae wonyea ame ŋutɔŋutɔ nam. Ŋutinya siwo le Srɔ̃ Woƒe Xɔse gbalẽa me kple ‘Bibliameme Siwo Ƒe Kpɔɖeŋu Nàte Ŋu Asrɔ̃’ siwo le Questions Young People Ask​—Answers That Work (Les jeunes s’interrogent​— Réponses pratiques) babla evea siaa me dzodzro do dzidzɔ nam ŋutɔ.”​—Melinda.

Kpekpeɖeŋu: Mègatia ame ɖeka aɖe ko o. Apostolo Paulo gblɔ na hati Kristotɔwo be: “Miaƒe ŋku nanɔ ame siwo le zɔzɔm ɖe kpɔɖeŋu si míeɖo na mi nu la ŋu.”​—Filipitɔwo 3:17.

Ènyaa? Ame aɖe hã ate ŋu asrɔ̃ wò kpɔɖeŋu! Biblia gblɔ be: ‘Nye kpɔɖeŋu na nuteƒewɔlawo le nuƒoƒo me, le agbenɔnɔ me, le lɔlɔ̃ me, le xɔse me, le agbe dzadzɛ nɔnɔ me.’​—1 Timoteo 4:12.

“Togbɔ be ɖewohĩ ègakpɔtɔ le asi trɔm le wò nɔnɔmewo ŋu hã, ame aɖe ate asrɔ̃ kpɔɖeŋu si nèɖona le ɣeyiɣi ma ke me. Mànya ame si le ŋku lém ɖe ŋuwò o, eye mànya ale si nya si nàgblɔ la ate ŋu atrɔ ame aɖe ƒe agbenɔnɔ o.”​—Kiana.