Gbe ɖeka Danielle si nye Yehowa Ðasefo le South Africa la fɔ akplo aɖe si ame aɖe gblẽ ɖe kɔfinoƒe aɖe. Ga kple gaxɔgbalẽviwo le akploa me. Esi Danielle di be yeatsɔ akploa ayi na ame si tɔ wònye ta la, edi amea ƒe adrɛs alo kaƒodzesi gake mekpɔ wo o, ke boŋ ŋutsu aɖe ƒe ŋkɔ koe wòkpɔ le akploa me. Eƒo ka na gadzraɖoƒe si ŋutsua dzraa ga ɖo le be yeato edzi ake ɖe eŋu, gake mete ŋu ke ɖe eŋu o. Gake esia mena wòna ta o. Ekpɔ kɔdzi ƒe agbalẽvi aɖe le akploa me eye wòyɔ kaƒodzesi si le edzi. Ame si xɔ yɔyɔa gblɔ na Danielle be yeatsɔ eƒe kaƒodzesi ana ŋutsua ne wòayɔe.

 Ewɔ nuku na ŋutsua esi woyɔe tso kɔa dzi gblɔ nɛ be Danielle fɔ eƒe akploa eye wòle edim be yeatsɔe anae. Esi ŋutsua va be yeaxɔ eƒe akploa la, ekpɔ Danielle kple fofoa. Wogblɔ nu si tae woku kutri dii ʋuu va ke ɖe eŋu la nɛ. Woɖe eme nɛ be Yehowa Ðasefowoe yewo nye, eya ta yewodzea agbagba nɔa agbe ɖe Biblia ƒe mɔfiamewo nu. Esia tae yewodina be yewoaɖi anukware ɣesiaɣi.—Hebritɔwo 13:18.

 Esi ŋutsua dzo le Danielle kple fofoa gbɔ gaƒoƒo aɖe megbea, eɖo message ɖe wo ganɔ akpe dam na wo ake ɖe ale si wotrɔ akploa nɛ ta. Eŋlɔ bena: “Meda akpe na wò ŋutɔ ɖe ale si nèdim ʋuu va ke ɖe ŋunye la ta. Edzɔ dzi nam ŋutɔ be meva do go wò kple wò ƒomea. Nyemaŋlɔ ale si miedo vivi ɖe ŋunye xɔlɔ̃wɔwɔtɔe tso dzi me la be akpɔ o. Eya ta medi be mana ga aɖe mi atsɔ ada akpe na mi. Menya be mietsɔa nanewo sa vɔe hafi subɔa Mawu. Nu si miewɔ la ɖee fia be ame nyuiwoe mienye, eye esia dze le Danielle ƒe nuwɔnawo me. Eya ta akpe na mi kakaka, Mawu neyra mi esi miele esubɔm ta.”

 Ɣleti aɖewo megbe la, ŋutsua ƒo ka na Danielle fofo eye wògblɔ nane si dzɔ ɣeyiɣi kpui aɖe la nɛ. Egblɔ ale si eya hã fɔ ame aɖe si ƒe pɔsuvi bu la nɛ. Egblɔ be esi yenɔ nu ƒlem le fiase aɖe me la, yekpɔ ame aɖe ƒe pɔsuvi le anyigba. Esi yeke ɖe nyɔnu si tɔe pɔsuvia nye ŋu la, yetsɔe nɛ eye yegblɔ nu si ʋã ye yetsɔ pɔsuvia nɛ la nɛ. Egblɔ na nyɔnua be ale si nyɔnuvi aɖe ɖi anukware eye wòtrɔ yeƒe akplo si wòfɔ la va na ye lae ʋã ye yetrɔ etɔa hã vɛ nɛ. Ŋutsua gblɔ be: “Dɔmenyonyo kple anukwareɖiɖi sue aɖe nana ame nyoa dɔ me na ame bubuwo eye esia nana agbea vivina.”