N̄kokpon ke mbọhọ Tampere ke Finland. Uyom isidụhe do, obio oro onyụn̄ eye etieti. Ubon nnyịn ikenen̄ekede isịn idem ke n̄kpọ ufọkabasi, edi ikadaha ufọkn̄wed ibre mbre, ẹma ẹnyụn̄ ẹkpep nnyịn ndinyene ido. Eka mi oto Germany, ndien ini n̄kedide eyenọwọn̄, mma nsikodu ye ete eka mi ye eka eka mi ke West Germany.

 N̄kọtọn̄ọ ndima mbre mbuba toto ke ini n̄kedide ekpri. Ini n̄kedide eyenọwọn̄, mma nsibre kpukpru mbre mbuba, edi ke mma n̄kesịm isua 14, mma mmek ndida tennis nte akpan ubọkutom mi. Ini nsịmde isua 16, n̄kesikpep ubre tennis ikaba m̀mê ikata ke usen—owo ekesikpep mi ikaba, ndien ama edi mbubreyo, ami n̄kpep idemmi. Kpukpru se iban̄ade tennis ẹkesinenem mi; n̄kada ke ndibre tennis ayanam mi n̄kop idem nnyụn̄ n̄kere n̄kpọ ọfọn. Kpa ye oro ekesinemde mi ndisan̄a ye mme ufan mi nnyụn̄ ntiene mmọ n̄n̄wọn̄ mmịn ndusụk ini, akanam ndụkke mfịna ke ntak mmịn m̀mê ke ntak ọkpọsọn̄ ibọk. N̄kukụre se ikebehede mi ekedi tennis, enye ekedi akpa n̄kpọ ke uwem mi.

 N̄kọtọn̄ọ ndibre tennis ke mbuba ATP ini ndide isua 17. a Mma ntọn̄ọ ndiwọrọ etop ke idụt nnyịn ke mma n̄kakan mbuba ifan̄. Ini nsịmde isua 22, mma nsịne ke otu akpa owo 50 emi ẹdiọn̄ọde tennis ẹkan ke ofụri ererimbot.

 Mma n̄ka ediwak idụt n̄kebre mbuba tennis ke ediwak isua. Oro ama anam nsikụt ata ndiye ebiet, edi ama onyụn̄ anam mfiọk ediwak mfịna emi odude ke ofụri ererimbot, utọ nte ubiatibet, ndida n̄kpọsọn̄ ibọk, ye ndisabade n̄kann̄kụk. Ke uwụtn̄kpọ, ini n̄kakade United States, ama enyene ndusụk obio emi ẹkedọhọde nnyịn ikûdụk ndusụk itie, ke ubiatibet okpon ke n̄kan̄ oro etieti. Kpukpru oro ama ayat mi. Ndien kpa ye oro n̄kanamde n̄kpọ emi mmade, esịt ikesinemke mi ke akpatre.

 Eyenan̄wan emi n̄kamade ekekere Sanna. Enye ama ọtọn̄ọ ndikpep Bible ye Mme Ntiense Jehovah. Ama enem mi imam ekpri ndikụt enye esịnde ibuot ke n̄kpọ Abasi, edi n̄kakpanke enye ndikpep Bible. Ima inam ndọ ke 1990, ndien enye ama ana baptism edem isua oro onyụn̄ edi Ntiense Jehovah. N̄kadaha idemmi nte owo Abasi, okposụkedi emi n̄kenịmde ke Abasi odu. Mma nti ke eka eka mi ama esikot Bible etieti, enye ama onyụn̄ ekpep mi ndibọn̄ akam.

 Usen kiet, ini ami ye Sanna ikakade ikese Kari ye n̄wan esie emi ẹkedide Mme Ntiense Jehovah, Kari ama owụt mi prọfesi Bible emi aban̄ade “mme akpatre usen.” (2 Timothy 3:1-5) Ama enem mi tutu, sia mma n̄kụt ke itie oro owụt se inamde ererimbot ọdiọk ntem. Nnyịn ikenen̄ekede itịn̄ n̄kpọ iban̄a ido ukpono usen oro. Edi, ọtọn̄ọde ke usen oro, mma ntọn̄ọ ndisineme n̄kpọ ke Bible ye Kari, ndien kpukpru se n̄kekpepde ama esịne ifiọk. Ama esisọn̄ nnyịn ndikpep n̄kpọ sia n̄kesinyeneke ini, mma nsinyụn̄ n̄ka isan̄ ndien ndien. Edi Kari ikakpaha mba. Enye ama esiwet leta ọbọrọ mbụme oro n̄kobụpde enye ini ikekpepde n̄kpọ. Enye ama ada Bible ọbọrọ kpukpru ikpọ mbụme emi ẹsifịnade mme owo ke usụn̄ emi an̄wan̄ade mi, ndien sụn̄sụn̄ sụn̄sụn̄, mma ntọn̄ọ ndikụt ke Bible enyene akpan ibuotikọ kiet, oro edi ke Obio Ubọn̄ Abasi ayanam kpukpru uduak Abasi osu. Ama enem mi tutu ndifiọk ke Abasi ekere Jehovah, ndinyụn̄ n̄kụt se enye anamde ọnọ nnyịn. (Psalm 83:18) Se ikenemde mi ikan ekedi enye ndikọnọ Eyen esie edikpa ọnọ nnyịn—oro ikedịghe n̄kpọ emi esopikpe ẹbierede ẹte ke ana owo anam, edi okowụt ima emi Abasi amade nnyịn. (John 3:16) Mma n̄kpep n̄ko ke mmekeme ndidi ufan Abasi nnyụn̄ ndu uwem ke nsinsi ke Paradise emi afanikọn̄ mîdidụhe. (James 4:8) Mma ntọn̄ọ ndibụp idemmi nte, “Nso ke n̄kpanam n̄wụt Abasi ke mmama se enye anamde?”

 Mma nda ini nnen̄ede n̄kere nte ndude uwem. Mma n̄kpep ke Bible ke ndinọ owo n̄kpọ anam owo okop inemesịt akan, ama onyụn̄ ọdọn̄ mi nditịn̄ se nnịmde nnọ mbon en̄wen. (Utom 20:35) Sia n̄kesibrede tennis ndia n̄kpọ, mma nsikpọn̄ ufọk n̄kebre mbuba tennis. Ẹkpetọ ibat usen emi mmen̄kesidụhe ke ufọk ẹdian, ama esisịm n̄kpọ nte usen 200 ke isua. Ubre tennis, ndikpep ndibre tennis, ye mme n̄kpọ eken emi aban̄ade tennis ke n̄kesibem iso nse n̄kpọ mban̄a mbemiso n̄kerede se ibehede ubon mi. Mma n̄kụt ke ana n̄kpụhọde.

 Mma mfiọk ke idin̄wan̄ake ediwak owo se ikpanamde n̄kpọn̄ ubre tennis ke ntak ido ukpono. Edi ikọsọn̄ke mi ndibiere se n̄kpanamde sia mma ndiọn̄ọ ke utịp ekededi emi n̄kpenyenede nto tennis imenke udomo ye ami nditịm mfiọk Jehovah nnyụn̄ ndu uwem ke nsinsi. Mma mbiere ke ndidọn̄ke utọn̄ ke se ededi emi mme owo ẹtịn̄de, ke ami nnyene ndibiere se ndinamde. Itie Bible emi ekenen̄erede an̄wam mi n̄kûyak se mme owo ẹtịn̄de akpan mi ekedi Psalm 118:6. Itie oro ọdọhọ ete: “Jehovah ada ye ami; ndifeheke ndịk. Nso ke owo ekeme ndinam mi?”

 Kpa ke ufan̄ ini oro, ndusụk owo ẹma ẹnyịme ndikpe mi ediwak okụk yak mbre tennis nnọ mmimọ, ndien oro akpakanam n̄ka iso mbre ke ediwak isua, mfịnake idem mban̄a okụk. Edi mma mbebiere se ndinamde, ntre n̄kenyịmeke ndibre nnọ mmọ, mma nnyụn̄ ntre ndibre tennis ke mbuba ATP. Mma n̄ka iso n̄kpep Bible nnyụn̄ nna baptism ke July 2, 1994 n̄kabade ndi Ntiense Jehovah.

 Ikedịghe n̄kpọ ọwọwọrọ mi, ami ntọn̄ọ ndikere n̄kpọ mban̄a Abasi. N̄konyụn̄ ndaha idemmi nte owo emi asan̄ade-san̄a oyom akpanikọ. N̄kekere ke nte uwem mi etiede oro ọfọn, ke inyeneke se nyomde n̄kan oro. Edi ke ini mmen̄kodorike enyịn, mma n̄kụt ke uwem ikụreke ke emi, uwem mi onyụn̄ enen̄ede ọfọn akan nte n̄kpekekerede! Eketie nte n̄kpọ eke akpanikọ emi odude ke Bible eketiede-tie ebet mi ndifiọk imọ! Ubon nnyịn enem akan akpa, imonyụn̄ idiana kiet ikan akpa. Enen̄ede enem mi n̄ko nte nditọ mi irenowo mbita ẹkpebede mi—idịghe nte mme ebre tennis, edi nte mme Christian.

 Nsụk mbebre tennis tutu emi. Tennis an̄wam mi nnyene se ndiade ke ediwak isua idahaemi. Ke uwụtn̄kpọ, mmesikpep mme owo tennis, nnyụn̄ ndi esenyịn ke itie ubre tennis kiet. Edi nyakke ofụri uwem mi nsịn ke tennis aba. Ini akpa, mma nsida ediwak hour kpukpru urua n̄kpep ndibre tennis man nnen̄ede mfiọk ndibre nnyụn̄ ndi ata-ebre tennis. Edi idahaemi, esinem mi ndida ofụri ini mi n̄n̄wam mme owo ẹfiọk ẹnyụn̄ ẹnam mme item Bible emi akan̄wamde mi n̄kpụhọde. Se isinamde esịt enem mi akan edi ndida n̄kpọ Jehovah Abasi akpa ke uwem mi nnyụn̄ n̄kwọrọ idotenyịn emi nnyenede nnọ mme owo ke ini iso ọyọfọn.—1 Timothy 6:19.