Enyene Ntiense Jehovah kiet ke Bulgaria emi ekerede Ong-li. Enye ama esikpep eyenan̄wan kiet emi ekerede Zlatka Bible; ebe Zlatka iketieneke ikpep Bible. Ong-li ọdọhọ ete: “Ini isụk inemede nte ẹkpenamde n̄kpọ ke ubon, mma nnen̄ede ntịn̄ ke ọfọn isidọhọ ebe m̀mê n̄wan ye nditọ nnyịn ke imama mmọ. Iso ama okpụhọhọde Zlatka; enye ama ọdọhọ ke akananam imọ idọhọke ebe imọ m̀mê eyen imọ an̄wan emi edide isua usụkkiet ke imama mmọ!”

 Zlatka ọkọdọhọ ete, “Mmeben̄e idem ndinam kpukpru n̄kpọ nnọ mmọ, edi ndikemeke ndidọhọ mmọ ke mmama mmọ.” Onyụn̄ adian ete, “Akanam eka mi idọhọke mi ke imama mi, eka eka mi ikonyụn̄ idọhọke eka mi ke imama enye.” Ong-li ama owụt Zlatka ke Jehovah ama osio ọdọhọ Jesus ke imama enye. (Matthew 3:​17) Enye ama ọdọhọ Zlatka esịn n̄kpọ oro ke akam , esinyụn̄ oyom usụn̄ ọdọhọ ebe esie ye eyen esie ke imama mmọ.

 Ong-li ọdọhọ ete: “Ke usen iba ama ekebe, Zlatka ama ọdọhọ mi ke ima ibọn̄ akam inọ Jehovah, ke etịn̄ ke asak. Ke ini ebe imọ ọkọnyọn̄de edi, ke ima idọhọ enye ke imekpep ke Bible ke ọfọn n̄wan okpono onyụn̄ ama ebe esie. Ndien ke ima ikebet ekpri, ke ima idọhọ ebe imọ ke imama enye etieti! Zlatka ọdọhọ ke ima ifat eyen imọ ke ini ọkọnyọn̄de edi inyụn̄ idọhọ enye ke imama enye! Zlatka ama ọdọhọ mi n̄ko ete: ‘Enem mi ke idem idahaemi. Ofụri isua emi n̄kesinyụn̄ ntie ntre, n̄kemeke ndinam mbon en̄wen ẹdiọn̄ọ ke mmama mmọ, edi Jehovah an̄wam mi. idahaemi mmekeme ndidọhọ ubon mi ke mmama mmọ.’”

 Ong-li ama ọdọhọ ete, “Ke urua kiet ama ekebe mma n̄kụt ebe Zlatka, ndien enye ama ọdọhọ mi ete: ‘Ediwak owo ẹma ẹdọhọ mi n̄kûyak Zlatka ekpep Bible ye afo, edi mokụt ke se ekpepde enye ke Bible ọfọn etieti ye ubon nnyịn. Ubon nnyịn enen̄ede enem idahaemi, esịt onyụn̄ enem kpukpru owo.’”