Ete ye Eka Mi Ẹmọn̄ Ẹdian̄ade Ndọ
Se afo ekemede ndinam
Tịn̄ se ifịnade fi. Sian ete ye eka fo adan̄a nte mme n̄kpọ emi ẹnamde fi ofụhọ m̀mê etịmede esịt. Ekeme ndidi mmọ ẹyesian fi se idide mfịna mmọ, ndien emi oyosụhọde editịmede esịt fo.
Edieke ete ye eka fo mîkemeke ndin̄wam fi, emekeme ndidọhọ ufan fo emi enyenede mbufiọk an̄wam fi.—Mme N̄ke 17:17.
Mfọnn̄kan n̄kpọ edi ke Ete fo eke heaven emi edide “Andikop akam.” ayakpan̄ utọn̄ ọnọ fi. (Psalm 65:2) Tịn̄ ofụri mfịna fo nọ enye ‘koro enye ekerede aban̄a fi.’—1 Peter 5:7.
Se mûkpanamke
Ndifiak n̄kop inem uwem ke ete ye eka fo ẹma ẹkedian̄ade ndọ etie nte owo ndidụri ọkpọ oro enye okobụn̄de—esibiak owo etieti, edi oyodoro nte ini akade
Kûsịn owo ke esịt. Daniel oro ete ye eka esie ẹkedian̄arede ndọ ke ini enye edide isua itiaba ọdọhọ ete: “Ete ye eka mi ẹkekere ẹban̄a idemmọ kpọt. Mmọ ikekereke iban̄a nnyịn ye nte edinam mmọ edifịnade nnyịn.”
Nso mfịna ke Daniel ekeme ndinyene edieke enye mîtreke ndiyat esịt mînyụn̄ itreke ndisịn owo ke esịt?—Man Ọfiọk: Kot Mme N̄ke 29:22.
Ntak emi ọkpọfọnde Daniel efen ọnọ ete ye eka esie ke se mmọ ẹnamde esịm enye?—Man Ọfiọk: Kot Ephesus 4:31, 32.
Kûnọmọ idemfo. Denny ọdọhọ ete: “Mma nnen̄ede mfụhọ ke ini ete ye eka mi ẹkedian̄arede ndọ. Mma ntọn̄ọ ndinyene mfịna ke ufọkn̄wed, n̄konyụn̄ mbehe n̄wed isua kiet. Ke oro ebede . . . n̄kesidaha aba se ẹnamde ke ufọkn̄wed ke akpan n̄kpọ, mma nsinyụn̄ n̄wak ndin̄wana en̄wan.”
Ekere ke nso ikanam Denny anam n̄kpọ ntre onyụn̄ ọtọn̄ọ ndin̄wana en̄wan ke ufọkn̄wed?
Didie ke edumbet oro odude ke Galatia 6:7 ekeme ndin̄wam mme owo nte Denny ẹtre ndinọmọ idemmọ?
Ediwak urua m̀mê ọfiọn̄ ẹkeme ndibe mbemiso owo efrede n̄kpọ emi ekenen̄erede abiak enye. Edi edieke anamde mme n̄kpọ oro ekesinamde mbemiso ete ye eka fo ẹdian̄arede tutu mmọ ẹmehe fi, ayafiak ọtọn̄ọ ndikop inem uwem.
