Ke ndusụk idụt, n̄kparawa ye n̄kaiferi ẹsita un̄wọn̄ọ mîdịghe ẹwewet ke n̄wed ẹte ke mmimọ idinamde idan̄ tutu mmimọ idọ ndọ. Se ndusụk owo ẹkotde “un̄wọn̄ọ nti n̄kparawa ye n̄kaiferi” edi oro.

 Utọ un̄wọn̄ọ emi ọkọtọn̄ọ ndiwọrọ etop ke n̄kpọ nte 1990 esịm 1999, ke ini Ufọkabasi Southern Baptist Convention ke United States ẹkenamde edinam emi ẹkotde, “Ata Ima Esibebet.” Edinam emi okowụt nte se Bible etịn̄de ye se nti n̄kparawa ye n̄kaiferi ẹtịn̄de ẹkemede ndin̄wam mmọ ẹtre ndinam idan̄ tutu mmọ ẹdọ ndọ.

 Ẹma ẹtọn̄ọ ukem edinam emi ke mîbịghike, ndien ediwak owo ẹmi ẹketade un̄wọn̄ọ emi ẹma ẹbọ n̄kpanuen silver emi adade aban̄a (edinyụn̄ an̄wamde mmọ ẹti) un̄wọn̄ọ mmọ nditre ndinam idan̄ mbemiso ẹdọde ndọ.

 Ibọrọ emi edibọde onyụn̄ etiene owo emi obụpde.

•   Christine C. Kim ye Robert Rector ẹdọhọ ke ediwak ndụn̄ọde emi inamde owụt ke un̄wọn̄ọ emi akan̄wam ediwak uyen ẹkûnam idan̄ nte ẹmama.

•   Se ufọkn̄wed Guttmacher Institute ekemịn̄de owụt ke “mme uyen oro ẹketade ‘un̄wọn̄ọ nti n̄kparawa ye n̄kaiferi’ ẹkesinam idan̄ ukem nte mme uyen oro mîkataha un̄wọn̄ọ emi.”

 Ntak emi n̄kpọ emi etiede ntem-e?

•   Ẹkenam ndusụk ndụn̄ọde emi ye mbon oro ẹketade un̄wọn̄ọ ye mbon eken emi mîkataha, edi oro ẹnyenede nsio nsio ekikere ẹban̄a idan̄.

•   Ẹma ẹnam ndụn̄ọde ye mbon oro ẹketade un̄wọn̄ọ ye mbon eken emi mîkataha, edi oro ẹnyenede ukem ekikere ẹban̄a idan̄.

 Nso ke ndụn̄ọde oro ẹkenamde ye mbon oro ẹnyenede ukem ekikere ẹban̄a idan̄ okowụt? Dr. Janet Rosenbaum, emi enen̄erede ọdiọn̄ọ nte mme uyen ẹsinamde n̄kpọ ọdọhọ ke ufan̄ isua ition, ke “ukpụhọde baba kiet ikodụhe ke ufọt mbon oro ẹketade un̄wọn̄ọ oro ye mbon oro mîkataha.”

 Mbon oro ẹketọn̄ọde un̄wọn̄ọ emi ẹkeyom ndin̄wam n̄kparawa ye n̄kaiferi ẹdu edisana uwem. Edi mmọ inamke mme uyen emi ẹdiọn̄ọ ntak emi mmọ ẹkpedude eti uwem. Dr. Rosenbaum ọdọhọ ke mbon emi ẹketade un̄wọn̄ọ oro inen̄ekede ibiere ke isọn̄ esịt mmọ ndidu edisana uwem. “Ana owo ebiere ke isọn̄ esịt esie ndidu edisana uwem utu ke nditiene mbon en̄wen nta un̄wọn̄ọ.”

 Bible an̄wam owo ‘ọnọ ukeme ufiọkn̄kpọ esie ukpep ke ndida enye nnam n̄kpọ man ẹdiọn̄ọ se inende ye se ikwan̄ade,’ ndien emi ayan̄wam owo oro ebiere ke esịt esie ndidu edisana uwem. (Mme Hebrew 5:14) Owo ikpodụhe edisana uwem ke ntak emi enye efehede ndimen udọn̄ọ m̀mê ndiyomo idịbi; edi anam emi man okpono Abasi emi ọkọtọn̄ọde ndọ.—Matthew 5:19; 19:4-6.

 Kpukpru se Bible etịn̄de edi ke ufọn nnyịn. (Isaiah 48:17) Kpukpru owo ẹkeme ndinịm ibet Abasi emi ọdọhọde yak nnyịn ‘ifehe ikpọn̄ use,’ edide ikpọ owo m̀mê mme uyen. (1 Corinth 6:18) Ntem mmọ ẹma ẹdọ ndọ, mmọ ẹyenen̄ede ẹkop inem ndọ mmọ, ituaha n̄kpọfiọk, esịt inyụn̄ ifịnake mmọ nte esifịnade mbon oro ẹkenamde idan̄ mbemiso ẹdọ ndọ.