Bible ọdọhọ ete: “Koro mme odu-uwem ẹfiọkde ẹte ke mmimọ iyakpa; edi amaedi mme akpan̄kpa, mmọ ifiọkke baba n̄kpọ kiet.” (Ecclesiastes 9:5; Psalm 146:4) Ntre owo ama akpa, akpa, n̄kpọ isụhọke. Mme akpan̄kpa ikemeke ndikere n̄kpọ, m̀mê ndinam n̄kpọ, m̀mê ndikop n̄kpọ ndomokiet.

‘Ayafiak ke ntan’

 Se Abasi eketịn̄de ye Adam anam ifiọk nte n̄kpọ esitiede ke owo ama akpa. Ke ini Adam ọkọsọn̄de ibuot ye Abasi, Abasi ọkọdọhọ enye ete: “Koro afo edide ntan, oyonyụn̄ afiak ke ntan.” (Genesis 3:19) Inyeneke ebiet emi Adam okodude mbemiso Abasi ada “ntan isọn̄” obot enye. (Genesis 2:7) Ntre, Adam akafiak akabade ntan ke ini enye akpade.

 Ntre n̄ko ke edi ye kpukpru mbon emi ẹkpade idahaemi. Bible etịn̄ ntem aban̄a owo ye unam: “Kpukpru mmọ ẹto ke ntan, kpukpru mmọ ẹnyụn̄ ẹfiak ke ntan.”​—Ecclesiastes 3:19, 20.

Idịghe owo ama akpa, esie okụre

 Bible esiwak ndidọhọ ke owo emi akpade edede. (Psalm 13:3; John 11:11-14; Utom 7:60) Owo emi edede ata idap ifiọkke se ikade iso. Mme akpan̄kpa ẹnyụn̄ ẹtie ntre, ifiọkke se ikade iso. Edi Bible ọdọhọ ke Abasi ayanam mme akpan̄kpa eset nte owo edemede ke idap, onyụn̄ anam mmọ ẹfiak ẹdu uwem. (Job 14:13-15) Mbon emi Abasi edinamde ẹset ẹyekụt ke eke mmimọ ikokụreke.