Ẹdọhọ ediwak owo ke idụhe owo emi ọdiọn̄ọde mbon emi ẹkewetde Bible. Edi Bible etịn̄ mbon emi ẹkewetde imọ. Ndusụk n̄wed Bible ọtọn̄ọ ntem: “Ikọ Nehemiah,” “n̄kukụt emi Isaiah eyen Amoz okokụtde,” ye “uyo Jehovah emi ekesịm Joel.”—Nehemiah 1:1; Isaiah 1:1; Joel 1:1.

 Ediwak mme andiwet Bible ẹdọhọ ke Jehovah, kpa ata Abasi kierakiet, enyene se ikewetde sia enye eketeme mmimọ se iwetde. Mme prọfet emi ẹkewetde Genesis esịm Malachi ẹma ẹtịn̄ ẹbe utịm ike 300 ẹte: “Jehovah ọdọhọ ete.” (Amos 1:3; Micah 2:3; Nahum 1:12) Abasi ọkọdọn̄ mme angel eketịn̄ ọnọ mmọ eken se ẹkpewetde.—Zechariah 1:7, 9.

 N̄kpọ nte owo 40 ẹkewet Bible ke ufan̄ isua 1,600. Ndusụk mmọ ẹma ẹwet ẹbe n̄wed kiet. N̄wed 66 ẹdu ke Bible. Genesis esịm Malachi emi ẹsiwakde ndikot Akani Testament ẹdi n̄wed 39, Matthew esịm Ediyarade emi esinyụn̄ ẹkotde Obufa Testament ẹdi n̄wed 27.