Ekọn̄ Armageddon edi akpatre ekọn̄ emi Abasi edin̄wanade ye mme andikara ererimbot. Mme andikara ererimbot emi ẹbiọn̄ọ Abasi sia mmọ mînyịmeke ndisụk ibuot nnọ ukara esie. (Psalm 2:2) Ekọn̄ Armageddon oyosobo ukara owo efep.—Daniel 2:44.

 Ikọ oro “Armageddon” odu itie kiet kpọt ke ofụri Bible, oro edi, ke Ediyarade 16:16. Ediyarade owụt ke “ebiet emi ẹkotde ke usem Hebrew, ete, Har–Magedon” ke ẹditan̄ “ndidem ofụri isọn̄ . . . ẹbon ọtọkiet ẹnọ ekọn̄ akwa usen Abasi Ata Ọkpọsọn̄.”—Ediyarade 16:14.

 Mmanie ẹdin̄wana ekọn̄ Armageddon? Jesus Christ edisan̄a ye mme angel ke heaven edin̄wana ye mme asua Abasi. (Ediyarade 19:11-16, 19-21) Mme asua Abasi emi ẹdi mbon oro ẹbiọn̄ọde ukara Abasi ẹnyụn̄ ẹmiomde Abasi.—Ezekiel 39:7.

 Ndi ẹdin̄wana Armageddon ke Ufọt Ufọt Edem Usiahautịn? Ihih. Owo idin̄wanake Armageddon ke ebiet kiet; ẹdin̄wana ke ofụri ererimbot.—Jeremiah 25:32-34; Ezekiel 39:17-20.

 Armageddon, emi ẹsikabarede ndusụk ini nte “Har–Magedon” (Har Meghiddohnʹ ke usem Hebrew), ọwọrọ “Obot Megiddo.” Megiddo ekedi obio ke Israel eset. Ẹdọhọ ke ẹma ẹsin̄wana ikpọ ekọn̄ ke n̄kann̄kụk Megiddo ndien Bible etịn̄ aban̄a ndusụk ekọn̄ oro ẹken̄wanade do. (Judges 5:19, 20; 2 Ndidem 9:27; 23:29) Edi Armageddon idaha iban̄a n̄kann̄kụk Megiddo eset. Akamba obot ndomokiet idụhe do ndien ofụri Unaisọn̄ Jezreel oro ikponyụn̄ ikemke kpukpru mbon oro ẹdin̄wanade ye Abasi. Utu ke oro, Armageddon edi akpatre ini emi ofụri ererimbot ẹdidianade kiet ẹbiọn̄ọ ukara Abasi.

 Nso iditịbe ke ini ekọn̄ Armageddon? Nnyịn idiọn̄ọke se Abasi edikamade in̄wana ekọn̄ Armageddon, edi enye ama esikama utọ n̄kpọ nte edịm itiat, unyekisọn̄, ukwọ, ikan̄ ye sulfur, emịnen̄mịnen̄, ye udọn̄ọ an̄wana ye mme asua esie ke eset. (Job 38:22, 23; Ezekiel 38:19, 22; Habakkuk 3:10, 11; Zechariah 14:12) Enyịn ayanan ndusụk mme asua Abasi tutu mmọ ẹn̄wana ke otu idemmọ ẹnyụn̄ ẹwot kiet eken. Edi mmọ ẹyedidiọn̄ọ ke Abasi an̄wana ye mmimọ.—Ezekiel 38:21, 23; Zechariah 14:13.

 Ndi Armageddon edidi utịt ererimbot? Armageddon idisoboke isọn̄ emi sia Bible ọdọhọ ke mme owo ẹyedụn̄ ke isọn̄ emi ke nsinsi. (Psalm 37:29; 96:10; Ecclesiastes 1:4) Armageddon idiwotke kpukpru owo koro Bible ọdọhọ ke “akwa otuowo” emi ẹkopde uyo Abasi ẹyebọhọ.—Ediyarade 7:9, 14; Psalm 37:34.

 Ndusụk ini, ndiọi owo emi mînyịmeke ndisụk ibuot nnọ Abasi ke Bible esikot “ererimbot.” (1 John 2:15-17) Utọ mbon emi ke Armageddon edisobo. Ntre, ẹkeme ndidọhọ ke Armageddon edidi “utịt ererimbot.”—Matthew 24:3; King James Version.

 Ini ewe ke Armageddon edin̄wana? Ke ini Jesus eketịn̄de aban̄a “akwa ukụt,” emi editrede ke ekọn̄ Armageddon, enye ọkọdọhọ ete: “Baba owo kiet ifiọkke usen ye hour oro, mme angel ke heaven ifiọkke, Eyen inyụn̄ ifiọkke, ke mîbọhọke Ete ikpọn̄.” (Matthew 24:21, 36) Edi Bible anam idiọn̄ọ ke Armageddon edin̄wana ke ini ukara Jesus, emi ọkọtọn̄ọde ke 1914.—Matthew 24:37-39.