Ẹsiwak ndida ikọ oro “Eti Owo Samaria” ntịn̄ mban̄a owo emi esisọpde atua owo mbọm m̀mê owo emi esin̄wamde mbon en̄wen. Ẹkeda ikọ oro ẹto mbụk emi Jesus ọkọnọde ndiwụt ke eti mbọhọidụn̄ edi owo emi esituade owo mbọm inamke n̄kpọ m̀mê owo oro oto mmòn̄ m̀mê ẹsinyụn̄ ẹnam n̄kpọ didie ke edem mmọ.

Ke ibuotikọ emi

•  Nso idi mbụk “Eti Owo Samaria”?

•  Ntak emi Jesus ọkọnọde mbụk emi?

•  Nso ke mbụk oro ekpep nnyịn?

•  Mbon Samaria ẹkedi mmanie?

•  Ndi mbụk “Eti Owo Samaria” ama etịbe?

Se ibio ibio se iketịbede ke mbụk Jesus oro mi: Owo Jew kiet okoto Jerusalem aka Jericho. Nte enye osụk akade ke usụn̄ mme inọ ẹma ẹmia enye ẹnyụn̄ ẹbọ enye kpukpru se enye akakamade, ndien ẹyak enye ana do akpa.

Oku Jew kiet ye akwaowo ido ukpono Jew en̄wen ẹma ẹsan̄a ẹbe owo oro ekekperede n̄kpa do. Kpa ye oro mmọ ẹketode ebiet kiet ye ete oro, mmọ ndomokiet ikan̄wamke enye.

Ẹtise, ete kiet emi otode idụt en̄wen ama edibe ke usụn̄ oro. Enye ekedi owo Samaria. (Luke 10:33; 17:16-18) Mbọm ama anam owo Samaria oro ndien enye ama ada ọfọn̄ ọbọp unan ete oro. Ekem emen enye aka itie usọbọ. Enye ama ese aban̄a ete oro ofụri okoneyo oro. Edem usen, enye ama ekpe abia usọbọ oro onyụn̄ ọdọhọ ke iyedikpe se ededi emi enye edibiatde idian do.​—Luke 10:30-35.

Jesus eketịn̄ mbụk emi ọnọ ete kiet emi ekekerede ke mbon idụt mmimọ ye mbon emi mmimọ ikade ido ukpono kiet ẹdi mbọhọidụn̄ imọ. Jesus okoyom ndikpep ete oro ata akpan n̄kpọ, oro edi, ke “mbọhọidụn̄” esie ẹsịne mbon oro mîtoho idụt kiet ye enye, ke idịghe mme Jew kpọt. (Luke 10:36, 37) Ẹkesịn mbụk emi ke Bible man kpukpru mbon oro ẹyomde ndinam se Abasi amade ẹkpep n̄kpọ ẹto.​—2 Timothy 3:16, 17.

Mbụk oro ekpep nnyịn ke eti mbọhọidụn̄ esinanam n̄kpọ ndiwụt ke imọ imatua owo mbọm. Enye esin̄wam owo emi ọbọde ufen idaha ise m̀mê owo oro oto edem mmọ mîtoho, m̀mê edi imọ m̀mê ubuene. Eti mbọhọidụn̄ esinam n̄kpọ ye mme owo nte enye akpamade ẹnam ye enye.​—Matthew 7:12.

Mbon Samaria ẹkedụn̄ ke n̄kan̄ edem usiahautịn Judea. Mmọ ẹma ẹsịne nditọ emi mme Jew emi ẹkedọde mbon emi mîkedịghe mme Jew ẹkebonde.

Ke n̄kpọ nte isua 2000 emi ekebede, mbon Samaria ẹma ẹtọn̄ọ ido ukpono eke mmọ. Mmọ ẹkenyịme akpa n̄wed itịon ke n̄wed Abasi Usem Hebrew kpọt, edi inyịmeke mbon eken.

Ediwak mme Jew ke eyo Jesus ikamaha mbon Samaria ikonyụn̄ imaha ndidian idem ye mmọ. (John 4:9) Ndusụk mme Jew ẹma ẹsikam ẹkot owo, “Owo Samaria” ẹma ẹyom ndisụni owo oro.​—John 8:48.

Bible idọhọke ke mbụk owo Samaria edi n̄kpọ emi eketịbede. Kpa ye oro, Jesus ekesida ido obio emi mme owo ẹmehede ye mme ebiet emi mme owo ẹdiọn̄ọde ekpep mme owo n̄kpọ, man se enye ekpepde ọsọp an̄wan̄a mbon oro enye ekpepde n̄kpọ.

N̄wed mbụk ẹwụt ke ediwak n̄kpọ emi Jesus akasiakde ke mbụk emi ẹma ẹnen. Ke uwụtn̄kpọ:

• Usụn̄ emi okotode Jerusalem aka Jericho ama ọniọn̄ akan kilomita 20​—adiarade kilomita 1. Mbụk oro owụt nnennen nnennen ke mbon isan̄ emi ẹkade Jericho ‘ẹkesito Jerusalem osụhọde.’​—Luke 10:30.

• Mme oku ye mme Levi emi ẹdụn̄de ke Jericho ẹkesiwak ndisan̄a ke usụn̄ emi n̄ka Jerusalem.

• Mme inọ ẹma ẹsidịbe ke mme itie emi odobode ke usụn̄ oro ẹbet mbon emi ẹkade isan̄, akpan akpan mbon emi ẹsan̄ade ikpọn̄.