Bible etịn̄ mme n̄kpọ emi ẹditịbede, nte n̄kpọ editiede ye nte mme owo ẹdinamde n̄kpo emi ẹwụtde ke idu ke “mme akpatre usen,” ye mme n̄kpọ emi ẹdinamde nnyịn idiọn̄ọ ke utịt “editịm n̄kpọ emi” ekpere.​—2 Timothy 3:1; Matthew 24:3; Daniel 8:19.

 Bible ama etetịn̄ ediwak n̄kpọ oro ẹditịbede emi ẹdidide “idiọn̄ọ” mme akpatre usen. (Luke 21:7) Se ndusụk uwụtn̄kpọ mi:

 Ekọn̄ ke nsio nsio itie ke ererimbot. Jesus ọkọdọhọ ete: “Idụt ayadaha an̄wana ye idụt, obio ubọn̄ kiet oyonyụn̄ adaha an̄wana ye obio ubọn̄ en̄wen.” (Matthew 24:7) Ediyarade 6:4 n̄ko etịn̄ aban̄a awat enan̄-mbakara emi adade aban̄a ekọn̄ ‘emi edimende emem ifep ke isọn̄.’

 Akan̄. Jesus ọkọdọhọ ete: ‘Akan oyodu.’ (Matthew 24:7) N̄wed Ediyarade n̄ko ama etịn̄ aban̄a awat enan̄-mbakara, emi uwat esie edinamde akan odu ke ata akamba udomo.​—Ediyarade 6:5, 6.

 Ikpọ unyekisọn̄. Jesus ama etetịn̄ ke “unyekisọn̄ ẹyedu ke nsio nsio ebiet.” (Matthew 24:7; Luke 21:11) Ikpọ unyekisọn̄ emi nditịbe ke nsio nsio itie ke ererimbot esinam mme owo ẹbọ ufen onyụn̄ owot ata ediwak owo.

 Udọn̄ọ. Jesus ama etetịn̄ ke nsio nsio ndiọi udọn̄ọ ẹyedu.​—Luke 21:11.

 Ubiatibet. Kpa ye oro ubiatibet odude ke ediwak isua, Jesus ọkọdọhọ ke ubiatibet eyenen̄ede ọtọt ke mme akpatre usen emi.​—Matthew 24:12.

 Ndibiat isọn̄. Ediyarade 11:18 ama etetịn̄ ke mme owo ‘ẹyebiat isọn̄.’ Mmọ ẹdinam oro ke nsio nsio usụn̄, idịghe ke ndinam idiọkn̄kpọ ye afai kpọt, edi mmọ ẹyenam mme n̄kpọ oro mîdiyakke isọn̄ enen̄ede enyene ufọn aba.

 Ndiọi edu. Ke 2 Timothy 3:1-4, Bible ama etetịn̄ ke mme owo ‘ẹyenana esịtekọm, inyeneke nsọn̄ọnda, . . . inyịmeke ndidụk ediomi ekededi, mbon edidọk, ẹnana mfara ke idem, ẹtie obom obom, imaha eti ido, mme andida owo nnọ, ẹsọn̄ ibuot, ẹkohode idem.’ Mme owo ẹyenen̄ede ẹnyene mme edu emi tutu edi se ẹkotde ini oro “ndiọkeyo emi ọsọn̄de ndiyọ.”

 Ubon ididianake kiet. Ke 2 Timothy 3:2, 3, Bible ama etetịn̄ ke ediwak owo idinyeneke “ndammana ima” inọ mbonubon mmọ ndien ke nditọ ‘ẹyesọn̄ ibuot ye ete ye eka.’

 Mme owo idimaha Abasi aba. Jesus ọkọdọhọ ete: “Ima ediwak owo eyebịt.” (Matthew 24:12) Ikọ Jesus ọkọwọrọ ke ediwak owo idimaha Abasi aba nte mmọ ẹkesimade. Ukem ntre n̄ko, 2 Timothy 3:4 ọdọhọ ke mme akpatre usen, ke utọ mme owo oro ‘ẹdima unọ idem inemesịt utu ke ndima Abasi.’

 Ẹnam nte inam n̄kpọ Abasi. Ke 2 Timothy 3:5, Bible ama etetịn̄ ke ediwak owo ẹyenam nte ikpono Abasi, edi mmọ ididụhe uwem ekekem ye se Bible etịn̄de.

 Mme prọfesi Bible ẹyenen̄ede ẹn̄wan̄a mme owo. N̄wed Daniel ama etetịn̄ ke “utịt ini,” ke ediwak owo ẹyenen̄ede ẹdiọn̄ọ akpanikọ Bible, ndien emi esịne mme prọfesi Bible ndinen̄ede n̄n̄wan̄a mme owo.​—Daniel 12:4.

 Ndikwọrọ ikọ ke ofụri ererimbot. Jesus ọkọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄.”​—Matthew 24:14.

 Nsahi ye nditre ndidọn̄ enyịn ke se ikade iso. Jesus ama etetịn̄ ke mme owo idimaha ndidọn̄ enyịn ke mme n̄kpọ oro ẹwụtde ke utịt ererimbot emi enen̄ede ekpere. (Matthew 24:37-39) Se ikande oro edi ke 2 Peter 3:3, 4, ama etetịn̄ ke mme owo ẹdisasak ẹma ẹkop mme n̄kpọ oro ẹwụtde ke utịt ererimbot emi ekpere, ẹnyụn̄ ẹdọhọ ke inyeneke se iditịbede.

 Kpukpru mme prọfesi ẹsu. Jesus ọkọdọhọ ke nte kpukpru mme prọfesi emi ẹdisude ke ukem ini, idịghe ibat ibat kpọt, ediwụt ke idu ke mme akpatre usen.​—Matthew 24:33.

 Ih. Mme n̄kpọ oro ẹtịbede ke ererimbot ye nte mme mbụk Bible asan̄ade ke adiana ke adiana, ẹwụt ke mme akpatre usen ọkọtọn̄ọ ke 1914, isua emi akpa ekọn̄ ererimbot ọkọtọn̄ọde. Man okụt nte mme n̄kpọ oro ẹtịbede ke ererimbot ẹwụtde ke idu ke mme akpatre usen, se vidio emi:

 Obio Ubọn̄ Abasi ọkọtọn̄ọ ndikara ke heaven ke 1914, ndien akpa n̄kpọ emi enye akanamde ekedi ndisio Satan kpa Devil ye mme demon esie mfep ke heaven nnyụn̄ nyak mmọ ẹnam n̄kpọ ke isọn̄ kpọt. (Ediyarade 12:7-12) Nte mme owo ẹdude ndiọi uwem ẹnyụn̄ ẹnamde n̄kpọ mfịn owụt ke Satan ada mmọ usụn̄ ndien emi anam mme akpatre usen emi ọsọn̄ ndiyọ.​—2 Timothy 3:1.

 Ndiọkeyo emi anam esịt etịmede ata ediwak owo. Enen̄ede afịna mmọ nte mme owo mîdianake kiet aba. Idem esinyụn̄ enyek ndusụk owo sia mmọ ẹkere ke mme owo ẹyesobo kiet eken nte ini akade.

 Ke n̄kan̄ eken, odu ndusụk mbon eken oro nte n̄kpọ etiede ke ererimbot afịnade, edi ẹsụk ẹnyenyene idotenyịn ke n̄kpọ ọyọfọn ke ini iso. Mmọ ẹnịm ke Obio Ubọn̄ Abasi ọyọsọp anam n̄kpọ man etre mfịna oro akade iso ke ererimbot. (Daniel 2:44; Ediyarade 21:3, 4) Mmọ ke ẹnyene ime ẹbet Abasi anam se Enye ọkọn̄wọn̄ọde. Mmọ ẹsinyụn̄ ẹda ikọ Jesus emi ẹdọn̄ idem esịt: “Ẹyenyan̄a owo eke ediyọde tutu esịm utịt.”​—Matthew 24:13; Micah 7:7.