Ke Bible, ẹkabade ikọ emi “ediset ke n̄kpa” ẹto ikọ Greek emi a·naʹsta·sis, emi ọwọrọde “ndidaha ke enyọn̄” m̀mê “ndifiak ndaha nda.” Ke ini ẹnamde owo eset, ọwọrọ ke ẹnam owo oro akakpade adaha ada, afiak odu uwem kpa nte enye ekesidude mbemiso akpade.—1 Corinth 15:12, 13.

 Kpa ye oro ikọ oro “ediset ke n̄kpa” mîdụhe ke N̄wed Abasi Usem Hebrew, emi esinyụn̄ ẹkotde Akani Testament, ẹtịn̄ ẹban̄a ediset ke n̄kpa do n̄ko. Ke uwụtn̄kpọ, Abasi ama anam prọfet Hosea etịn̄ se imọ in̄wọn̄ọde ete: “Nyafak mmọ nsio Udi ke ubọk; nnyanyan̄a mmọ nsio ke n̄kpa.”—Hosea 13:14; Job 14:13-15; Isaiah 26:19; Daniel 12:2, 13.

 Mbon oro ẹdinamde ẹset ẹdidu ke m̀mọ̀n̄? Ndusụk owo ẹdiset ika heaven ẹkekara ye Christ. (2 Corinth 5:1; Ediyarade 5:9, 10) Bible okot ediset ke n̄kpa enye oro “akpa ediset ke n̄kpa,” ndien oro owụt ke ediset ke n̄kpa en̄wen do. (Ediyarade 20:6; Philippi 3:11) Ediset ke n̄kpa en̄wen oro edidi eke mbon oro ẹdisetde idu uwem mi ke isọn̄. Mmọ ẹnen̄ede ẹwak ẹkan mbon ẹdisetde ika heaven.—Psalm 37:29.

 Didie ke ẹsinam owo eset? Abasi ọnọ Jesus odudu ndinam mme owo ẹset. (John 11:25) Jesus ayanam “kpukpru mme andidu ke udi editi” ẹfiak ẹnyene uwem; mme owo ẹdisụk idọdiọn̄ọ mmọ. Mmọ ẹdisụk inyene edu mmọ ẹkenyenede, ẹnyụn̄ ẹti mme n̄kpọ emi mmọ ẹkediọn̄ọde. (John 5:28, 29) Mbon oro ẹsetde ẹka heaven ẹdinyene ukem idem mme angel, ndien mbon ẹdisetde idu ke isọn̄ idisetke ye udọn̄ọ m̀mê ndo ke idem.—Isaiah 33:24; 35:5, 6; 1 Corinth 15:42-44, 50.

 Mmanie ke ẹdinam ẹset? Ikọ Abasi ọdọhọ ete: “Ndinen owo ye mme anam ukwan̄n̄kpọ ẹyeset ke n̄kpa.” (Utom 24:15) Noah, Sarah, ye Abraham ẹsịne ke otu ndinen owo oro ẹdinamde ẹset. (Genesis 6:9; Mme Hebrew 11:11; James 2:21) Mme anam ukwan̄n̄kpọ emi ẹdinamde ẹset ẹsịne mbon oro mîkanamke n̄kpọ Abasi sia mîduhe eke ekekpepde mmọ Ikọ Abasi.

 Abasi idinamke mme idiọkowo emi mîmaha ndikabade esịt ẹset. Utọ mbon oro ẹma ẹkpa, eke mmọ okụre ke nsinsi.—Matthew 23:33; Mme Hebrew 10:26, 27.

 Ini ewe ke ẹdinam mbon emi ẹkpade ẹset? Bible ama ọdọhọ ke ẹdinam mme owo ẹset ẹka heaven ke ini edidu Christ, emi ọkọtọn̄ọde ke 1914. (1 Corinth 15:21-23) Ẹdinam mme owo ẹset ẹdidu uwem ke isọn̄ emi ke ini Tọsịn Isua Ukara Christ. Isọn̄ edidi paradise ini oro.—Luke 23:43; Ediyarade 20:6, 12, 13.

 Ntak ọfọnde inịm ke ẹyenam mme owo ẹset? Bible etịn̄ nte ẹkenamde owo usụkkiet ẹset; mme owo ẹma ẹkụt ini ẹkenamde mmọ ẹset. (1 Ndidem 17:17-24; 2 Ndidem 4:32-37; 13:20, 21; Luke 7:11-17; 8:40-56; John 11:38-44; Utom 9:36-42; Utom 20:7-12; 1 Corinth 15:3-6) Ediset ke n̄kpa Lazarus akakpa owo idem akan, sia Lazarus ama akpa usen inan̄ mbemiso Jesus edinam enye eset ke iso ediwak ntiense. (John 11:39, 42) Mbon oro mîkamaha Jesus ikekemeke ndidọhọ ke Jesus ikanamke Lazarus eset, ntre mmọ ẹma ẹyom usụn̄ ndiwot Jesus ye Lazarus.—John 11:47, 53; 12:9-11.

 Bible anam idiọn̄ọ ke Abasi enyene odudu ndinam mme akpan̄kpa ẹset, ke onyụn̄ ọdọdọn̄ enye ndinam oro. Enye ifreke nte kpukpru mbon oro enye edinamde eset etiede. (Job 37:23; Matthew 10:30; Luke 20:37, 38) Abasi ekeme ndinam mme akpan̄kpa ẹfiak ẹdidu uwem, se enye onyụn̄ oyomde ndinam edi oro! Kop se Bible etịn̄de mi aban̄a nte etiede Abasi ke idem ndinam mme owo ẹset: “Koro utom ubọk fo ọyọdọn̄ fi.”—Job 14:15.

Se mme owo ẹsitịn̄de ẹban̄a ediset ke n̄kpa

 Se mme owo ẹsitịn̄de: Ediset ke n̄kpa edi ukpọn̄ ndifiak ndiana ye obụkidem.

 Akpanikọ: N̄wed Abasi ọdọhọ ke owo edi ukpọn̄, ke ukpọn̄ idịghe n̄kpọ emi esiwọrọde owo ke idem okodu uwem. (Genesis 2:7; Ezekiel 18:4) Owo emi ẹnamde eset isifiakke ikadiana ye ukpọn̄ esie; ẹsifafiak ẹbot enye nte ukpọn̄ eke odude uwem.

 Se mme owo ẹsitịn̄de: Eyenam ndusụk owo ẹset ẹnyụn̄ ẹsobo mmọ inikiet inikiet.

 Akpanikọ: Bible ọdọhọ ke “mbon oro ẹkenamde se idiọkde ẹyeset ke n̄kpa ẹdụk ikpe.” (John 5:29) Ẹdikpe ikpe inọ mmọ etiene se mmọ ẹdinamde ke ẹma ẹkenam mmọ ẹset, idịghe se mmọ ẹkenamde mbemiso ẹkpade. Jesus ọkọdọhọ ete: “Mme akpan̄kpa [ẹyekop] uyo Eyen Abasi ndien mmọ emi ẹkopde ẹyedu uwem.” (John 5:25) Ẹyesịn enyịn̄ mbon emi ‘ẹkopde,’ m̀mê ẹnamde, se ẹkpepde mmọ ke ẹma ẹkenam mmọ ẹset ke “n̄wed uwem.”—Ediyarade 20:12, 13.

 Se mme owo ẹsitịn̄de: Ẹdinam mbon emi ẹsetde ẹset ye ndo emi mmọ ẹkenyenede mbemiso mmọ ẹkpade.

 Akpanikọ: Owo ama akpa esitaha akabade ntan.—Ecclesiastes 3:19, 20.