1 Corinth 10;1-33
10 Edi nyomke mbufo ẹnana ifiọk, nditọete, ẹte ke kpukpru mme ete ete nnyịn ẹma ẹdu ke idak obubịt enyọn̄,+ kpukpru mmọ ẹma ẹnyụn̄ ẹsan̄a ke inyan̄ ẹbe+
2 ndien kpukpru mmọ ẹma ẹna baptism nte mme anditiene Moses+ ke obubịt enyọn̄ ye inyan̄ oro;
3 kpukpru mmọ ẹkenyụn̄ ẹdia orụk udia eke spirit kiet+
4 kpukpru mmọ ẹma ẹnyụn̄ ẹn̄wọn̄ orụk mmọn̄ eke spirit kiet.+ Koro mmọ ẹkesin̄wọn̄ mmọn̄ eke otode akamba itiat+ eke spirit emi akasan̄ade ye mmọ, ndien akamba itiat+ oro akada aban̄a Christ.+
5 Edi, Abasi ikenemke esịt ye ata ediwak mmọ,+ ndien mmọ ẹma ẹkpan̄a+ ke wilderness.
6 Mme n̄kpọ emi ẹkabade ẹdi uwụtn̄kpọ ẹnọ nnyịn, ẹte nnyịn ikûdi mbon emi ẹyomde ndiọi n̄kpọ,+ kpa nte mmọ ẹkeyomde.
7 Ẹkûnyụn̄ ẹkabade ẹdi mme okpono ndem, nte ndusụk mmọ ẹkedide;+ kpa nte ẹwetde ẹte: “Mbon oro ẹsụhọde ẹtetie ẹdia n̄kpọ ẹnyụn̄ ẹn̄wọn̄ n̄kpọ, ndien mmọ ẹdaha ke enyọn̄ ndibre mbre.”+
8 Ẹyak nnyịn ikûnyụn̄ ika iso inam use, nte ndusụk mmọ ẹkenamde use,+ ẹnyụn̄ ẹkpan̄ade, owo tọsịn edịp ye ita ke otu mmọ ke usen kiet.+
9 Ẹyak nnyịn ikûnyụn̄ idomo Jehovah,+ nte ndusụk mmọ ẹkedomode enye,+ ndien ẹda urụkikọt+ ẹsobo mmọ.
10 Ẹkûnyụn̄ ẹdi mbon nsụkuyo, nte ndusụk mmọ ẹkesụkde uyo,+ ndien ẹtak ke ubọk andisobo.+
11 Mme n̄kpọ emi ẹkewọrọ mmọ nte uwụtn̄kpọ, ẹkenyụn̄ ẹwet mmọ ndida ndụri nnyịn utọn̄,+ kpa nnyịn emi idude ke utịt editịm n̄kpọ+ emi.
12 Mmọdo yak owo eke ekerede ete imọ imọsọn̄ọ ida ekpeme mbak enye ediduọ.+
13 Idomo isịmke mbufo ibọhọke se isiwakde nditịbe nnọ owo.+ Edi Abasi edi anam-akpanikọ,+ idinyụn̄ iyakke ẹdomo mbufo ẹbe se mbufo ẹkemede ndiyọ,+ edi enye oyosio usụn̄ ubọhọ ọnọ mbufo ke ini idomo+ man mbufo ẹkeme ndiyọ enye.
14 Ke ntre, ndima mi, ẹfehe+ ẹkpọn̄ ukpono ndem.+
15 Ntịn̄ nte ntịn̄ nnọ mme enyene-ibuot owo;+ mbufo ke idem mbufo ẹdomo se ndọhọde ẹse.
16 Cup+ edidiọn̄ emi nnyịn idiọn̄de, nte enye idịghe edibuana ke iyịp Christ? Uyo emi nnyịn ibụn̄de,+ nte enye idịghe edibuana ke idem Christ?+
17 Sia edide uyo kiet odu, nnyịn idi idem kiet,+ okposụkedi iwakde,+ koro nnyịn kpukpru ibuanade ke uyo kiet oro.+
18 Ẹse Israel eke obụk:+ Nte mmọ emi ẹdiade se ẹwade ibuanake n̄kpọ ye itieuwa?+
19 Nso, ndien, ke n̄kpọdọhọ? Nte ke se ẹwade ẹnọ ndem edi n̄kpọ, m̀mê nte ndem edi n̄kpọ?+
20 Baba-o; edi ndọhọ ke se mme idụt ẹwade ke mmọ ẹwa ẹnọ mme demon,+ iwaha inọ Abasi; ndien nyomke mbufo ẹbuana n̄kpọ ye mme demon.+
21 Mbufo ikemeke ndin̄wọn̄ cup Jehovah+ ye cup mme demon; mbufo ikemeke ndidia n̄kpọ ke “okpokoro Jehovah”+ ye ke okpokoro mme demon.
22 Mîdịghe “nte nnyịn inam Jehovah efịbe ufụp”?+ Nnyịn isọn̄ke odudu+ ikan enye, nte imọsọn̄?
23 Kpukpru n̄kpọ ẹnenen ndinam; edi idịghe kpukpru n̄kpọ ẹnyene ufọn.+ Kpukpru n̄kpọ ẹnenen ndinam,+ edi idịghe kpukpru n̄kpọ ẹdi se ibọpde-bọp.+
24 Yak owo kiet kiet okûyom ufọn idemesie,+ edi oyom ufọn owo en̄wen.+
25 Ẹta kpukpru unam eke ẹnyamde ke urua,+ ẹkûbụp mbụme mbak ubieresịt edifịna mbufo;+
26 koro “isọn̄ ye se iyọhọde ke esịt+ ẹnyene Jehovah.”+
27 Edieke owo ekededi emi mînịmke ke akpanikọ ọnọde mbufo ikot ndien mbufo ẹnyịme ndika, ẹdia se ededi eke ẹnịmde mbufo ke iso,+ ẹkûbụp mbụme mbak ubieresịt edifịna mbufo.+
28 Edi edieke owo ọdọhọde mbufo ete: “Ẹma ẹda unam emi ẹnam uwa,” ẹkûta ke ntak owo oro eketịn̄de ọnọ mbufo, ye ke ntak ubieresịt.+
29 Ntịn̄ke mban̄a “ubieresịt” fo, edi ntịn̄ mban̄a eke owo enye eken. Koro ntak emi ẹkpedade ubieresịt owo efen ẹbiere ifụre oro nnyenede?+
30 Edieke mbọde nta ye ekọm, ntak emi ẹkpetịn̄de ikọ ẹdian mi ke n̄kpọ oro mma n̄kọnọ ekọm mban̄a?+
31 Ke ntre, edide mbufo ẹdia n̄kpọ m̀mê ẹn̄wọn̄ n̄kpọ m̀mê ẹnam n̄kpọ ekededi, ẹnam kpukpru n̄kpọ ẹnọ Abasi ubọn̄.+
32 Ẹkûnam n̄kpọ ẹdi ntak iduọ+ ẹnọ mme Jew ọkọrọ ye mme Greek* ye esop Abasi,
33 kpa nte ami nnemde kpukpru owo esịt ke kpukpru n̄kpọ,+ nyomke ufọn idemmi+ edi nyom ufọn ediwak owo, man ẹkpenyan̄a mmọ.+
Mme Ikọ Idakisọn̄
^ Eyedi emi aban̄a mbon oro ẹkesemde usem Greek, kpa mbon emi mîkedịghe mme Jew.
