1 Samuel 18;1-30
18 Edikem ke ndondo oro enye okụrede nditịn̄ ikọ ye Saul, ukpọn̄ Jonathan+ eyịre+ ye ukpọn̄ David, Jonathan onyụn̄ ama enye nte ukpọn̄ esiemmọ.+
2 Ndien Saul ada enye ke usen oro inyụn̄ iyakke enye afiak ọnyọn̄ ufọk ete esie.+
3 Jonathan ye David ẹnyụn̄ ẹdụk ediomi,+ koro amade enye nte ukpọn̄ esiemmọ.+
4 Ndien Jonathan osio anana-ubọk kod oro enye ekesịnede ọnọ David, onyụn̄ ọnọ enye ọfọn̄idem esie, ye akan̄kan̄ esie ye utịgha esie, ye ubọpisịn esie.
5 Ndien David esiwọrọ aka ekọn̄. Ebiet ekededi eke Saul ọdọn̄de enye, enye ada eti ibuot+ anam n̄kpọ, tutu Saul enịm enye ke etubom mbonekọn̄;+ ndien emi enem kpukpru owo onyụn̄ enem ikọt Saul.
6 Edikem nte mmọ ẹdụkde ẹdi, ke David ama ọkọnyọn̄ ndiwot mbon Philistia, iban ẹto kpukpru obio Israel ẹwọn̄ọ ẹdi, ẹkwọ ikwọ+ ẹnyụn̄ ẹnek unek ẹdi ndisobo ye edidem Saul, ẹbre ekọmọ+ ye ndido emi enyenede urụk ita ẹnyụn̄ ẹdat esịt.+
7 Ndien iban oro ẹnamde idara mi ẹkwọ ẹte:
“Saul owot mme tọsịn,
Edi David owot mme tọsịn ke itie duop.”+
8 Ndien Saul ayat esịt etieti,+ ikọ emi onyụn̄ ọdiọk enye esịt tutu enye ọdọhọ ete: “Mmọ ẹnọ David mme tọsịn ke itie duop, edi mmọ ẹnọ mi mme tọsịn, ndien itie edidem kpọt osụhọ mmọ ndimen nnọ enye!”+
9 Saul onyụn̄ ese David ke idiọk enyịn toto ke usen oro ka iso.+
10 Edikem ke ndan̄nsiere,+ Abasi ayak idiọk spirit* odoro Saul ke idem,+ ntre enye anam n̄kpọ ke esịtufọk nte prọfet,+ ke adan̄aemi David ebrede ikwọ+ nte enye akam esibrede ke mme usen emi ẹkebede; eduat onyụn̄ odu Saul ke ubọk.+
11 Ndien Saul otop eduat+ oro onyụn̄ ọdọhọ ete: “Mmọn̄ n̄kịm David ndian ke ibibene!”+ edi David efep enye utịm ikaba.+
12 Ndien ndịk+ anam Saul aban̄a David koro Jehovah odude ye enye,+ edi idụhe aba ye Saul.+
13 Mmọdo Saul iyakke David odu aba ye imọ,+ edi emek enye enịm ke etubom tọsịn ọnọ idemesie; ndien enye esida mme owo ọwọrọ aka ekọn̄ onyụn̄ ada ọnyọn̄ edi.+
14 Ndien David ada eti ibuot+ anam kpukpru n̄kpọ, Jehovah onyụn̄ odu ye enye.+
15 Ndien Saul okụt ke enye ada eti ibuot+ anam n̄kpọ, ntre ndịk anam enye aban̄a David.
16 Ntre ofụri Israel ye Judah ẹma David koro enye edide andida mmọ n̄ka ekọn̄ nnyụn̄ nda nnyọn̄.
17 Ekem Saul ọdọhọ David ete: “Se Merab+ adiaha mi mi. Enye ke ndida nnọ fi ọdọ.+ Afo kam di owo uko nọ mi nyụn̄ n̄wana ekọn̄ Jehovah.”+ Edi Saul ọdọhọ ke esịt esie ete: “Yak ubọk mi okûtụk enye, edi yak ubọk mbon Philistia otụk enye.”+
18 Ntem David ọdọhọ Saul ete: “Ami ndi anie, iman mi kpa ubon ete mi ẹnyụn̄ ẹdi mmanie ke Israel, eke ami n̄kpedide ebe eyen edidem?”+
19 Nte ededi, etisịm ini emi ẹkpedade Merab kpa adiaha Saul ẹnọ David, ẹma ẹdada enye ẹnọ Adriel+ owo Meholath,+ ke ndọ.
20 Ndien Michal+ udun̄wan Saul ama David, mmọ ẹnyụn̄ ẹmen ẹketịn̄ ẹnọ Saul, ndien ikọ emi enem Saul.
21 Ntre Saul ọdọhọ ete: “Mmọn̄ nda enye nnọ David, man ekpedi afia ọnọ enye,+ man ubọk mbon Philistia ẹkpedoro enye ke idem.” Ntem Saul ọdọhọ David ete: “Men kiet ke otu nditọiban iba emi dọ nyụn̄ dụk ediomi ndọ ye ami mfịn emi.”
22 Ndien Saul owụk mme asan̄autom esie ete: “Mbufo ẹka ẹkedọhọ David ke ndịbe ẹte: ‘Sese! Edidem ama fi, ndien kpukpru mme asan̄autom esie ẹma fi nde. Ntre dụk ediomi ndọ ye edidem.’”
23 Ndien mme asan̄autom Saul ẹmen ikọ emi ẹketịn̄ ẹnọ David, edi David ọdọhọ ete: “Ndi mbufo ẹse ẹte edi ekpri n̄kpọ ndidụk ediomi ndọ ye edidem, ke ini ndide ubuene,+ ẹnyụn̄ ẹbatde mi ke usụhọde?”+
24 Ekem mme asan̄autom Saul ẹkedọhọ enye ẹte: “Ntem ye ntem ke David ọdọhọ.”
25 Ndien Saul ọdọhọ ete: “Ntem ke mbufo ẹdidọhọ David, ‘Edidem iyomke okụk ndọ,+ edi oyom edụt+ mbon Philistia ikie, man osio mme asua edidem usiene.’”+ Edi uduak Saul ekedi ndinam David ọduọ ke ubọk mbon Philistia.
26 Ntre mme asan̄autom esie ẹmen ikọ emi ẹketịn̄ ẹnọ David, ikọ emi onyụn̄ enem David ndidụk ediomi ndọ+ ye edidem, edi usen oro ẹkenịmde ikụreke kan̄a.
27 Ntem David adaha ke enyọn̄ asan̄a ye ikọt esie okowot+ mbon Philistia ikie iba, David onyụn̄ emen n̄kemn̄kem ibat edụt+ mmọ edinọ edidem, man odụk ediomi ndọ ye edidem. Ndien Saul ọnọ enye Michal udun̄wan esie ọdọ.+
28 Ndien Saul okụt onyụn̄ ọfiọk ete ke Jehovah odu ye David.+ Ndien Michal udun̄wan Saul ama enye.+
29 Ntre Saul etetịm okop ndịk aban̄a David, onyụn̄ asua enye kpukpru ini.+
30 Edikem mbọn̄+ Philistia ẹwọrọ ẹka ndin̄wana ekọn̄, ndien adan̄a nte mmọ ẹwọwọrọ ẹka, David anam n̄kpọ ye eti ibuot+ akan kpukpru mme asan̄autom Saul; ndien ẹkpono enyịn̄ esie etieti.+
Mme Ikọ Idakisọn̄
^ At. Ed., “idiọk spirit Abasi.”
