2 Samuel 20;1-26
20 Ndien obukpo owo+ kiet ama odu emi ekekerede Sheba,+ eyen Bichri owo Benjamin; ndien enye efri nnụk+ ete: “Nnyịn inyeneke udeme ke David, nnyịn inyụn̄ inyeneke udeme ke eyen Jesse.+ O Israel, mbufo kpukpru ẹnyọn̄ọ ẹtiene mme abasi+ mbufo!”
2 Ntem kpukpru mbon Israel ẹtre nditiene David ẹnyụn̄ ẹwọn̄ọde ẹtiene Sheba eyen Bichri;+ edi mbon Judah ẹsọn̄ọ ẹyịre ye edidem mmọ, ọtọn̄ọde ke Jordan tutu esịm Jerusalem.+
3 Ekem David ọnyọn̄ edi ufọk esie ke Jerusalem.+ Ndien edidem atan̄ iban duop oro,+ kpa ibanesa emi enye ọkọkpọn̄de ete ẹkpeme ufọk, ọkọdọn̄ ke ufọk ukpeme, edi enye osụk ọnọnọ mmọ udia. Enye inyụn̄ inyeneke ebuana+ ye mmọ, edi okụk mmọ ọdọn̄ ke ufọk tutu esịm usen emi mmọ ẹkpan̄ade, ndien mmọ ẹtie nte mme ebeakpa, ke adan̄aemi ebe mmọ osụk odude ke uwem.
4 Ndien edidem ọdọhọ Amasa+ ete: “Kot mbon Judah ete ẹdi ẹbịne mi ke ufan̄ usen ita, afo nyụn̄ di n̄ko.”
5 Ntre Amasa aka okokot mbon Judah obon ọtọkiet; edi enye odu ebịghi akan ini emi edidem ekenịmde ọnọ enye.
6 Ndien David ọdọhọ Abishai+ ete: “Ke emi, Sheba+ eyen Bichri ọyọdiọk ye nnyịn akan Absalom.+ Afo da mme asan̄autom+ ọbọn̄ fo bịne enye mbak enye ediyom mme obio ibibene efehe ekedịbe ọbọhọ nnyịn.”
7 Ntem ikọt Joab+ ye mme Cherethite+ ye mme Pelethite+ ye kpukpru n̄kpọsọn̄ owo ẹwọrọ ẹbịne enye; ndien mmọ ẹwọrọ ke Jerusalem ẹbịne Sheba eyen Bichri.
8 Ndien ke adan̄aemi mmọ ẹkperede akamba itiat emi odude ke Gibeon,+ Amasa+ edi edisobo ye mmọ. Ndien Joab esịne ọfọn̄idem onyụn̄ ọbọbọ mbọbọ isịn; enye onyụn̄ esịn akan̄kan̄ ke efọk afak ke ifụhi esie. Ndien nte enye asan̄ade ọwọrọ edi, akan̄kan̄ oro ọwọrọ ọduọ.
9 Ndien Joab ọdọhọ Amasa ete: “Ndi ọfọn ye afo, eyenete mi?”+ Ekem Joab osio ubọk nnasia omụm Amasa ntan̄ebek nditịm enye inua.+
10 Edi Amasa ikekwe akan̄kan̄ emi Joab akakamade; ntre Joab ada akan̄kan̄ oro ekịm enye+ idịbi, ndien nsia esie ẹwọrọ ẹduọhọ ke isọn̄, enye inyụn̄ ikịmke enye ikaba. Ntre enye akpa. Ndien Joab ye Abishai eyeneka esie ẹbịne Sheba eyen Bichri.
11 Ndien akparawa kiet ke otu ikọt Joab ada ekpere enye onyụn̄ ọdọhọ ete: “Owo ekededi emi amade Joab, owo ekededi emi onyụn̄ edide eke David,+ yak enye etiene Joab!”
12 Ke ofụri ini emi Amasa ke amian̄a ke iyịp+ esie ke ufọt ọkpọusụn̄. Ndien ke ini owo emi okụtde nte kpukpru owo ẹtuakde ẹda, enye emenede Amasa osio ke ọkpọusụn̄ ekenịm ke in̄wan̄. Ekem enye emen ọfọn̄ ofụk enye ke adan̄aemi okụtde nte kpukpru owo ẹtuakde ẹda ke ini ẹdide ẹdisịm enye.+
13 Ke ndondo oro enye emenerede enye osio ke ọkpọusụn̄, mmọ kiet kiet ẹsan̄a ẹbe ẹtiene Joab man ẹbịne Sheba+ eyen Bichri.
14 Ndien Sheba asan̄a ke kpukpru esien Israel ebe ekesịm Abel Beth-maacah.+ Ndien kpukpru mbon Bichrite ẹsop idem ọtọkiet ẹnyụn̄ ẹtiene ẹbịne enye.
15 Ndien mmọ ẹdi ẹdikan enye ẹkụk ke Abel Beth-maacah ẹnyụn̄ ẹkịbi ibombom ẹkanade obio,+ sia enye ekedide obio ibibene. Ndien kpukpru mbon oro ẹdude ye Joab ẹto idak idak ẹdọk ibibene oro man ẹwụri enye.
16 Ndien n̄wan kiet emi edide ọfiọkn̄kpọ+ owo etie ke obio oro ofiori ete: “Mbufo ẹkpan̄ utọn̄, ẹkpan̄ utọn̄! Mbọk, ẹdọhọ Joab ẹte, ‘San̄a kpere man ntịn̄ ikọ nnọ fi.’”
17 Ntre, Joab asan̄a ekpere enye, ndien n̄wan oro obụp ete: “Ndi afo edi Joab?” ndien enye ọbọrọ ete: “Ih.” Ntem enye ọdọhọ enye ete: “Kpan̄ utọn̄ ke ikọ ofụn an̄wan fo.”+ Ndien Joab ọdọhọ enye ete: “Ami ke n̄kpan̄ utọn̄.”
18 Ndien n̄wan oro ọdọhọ ete: “Ẹkesikam ẹdọhọ ke eset ẹte, ‘Yak ẹkebụp obio Abel, ndien ẹyebiere ikọ.’
19 Ami nda ke ibuot mbon emem+ ye mbon akpanikọ+ ke Israel. Afo oyom ndisobo obio+ emi edide eka ke Israel. Ntak emi afo ekpemende udeme+ Jehovah emen?”+
20 Ndien Joab ọbọrọ ete: “Nsa mi o! ndimenke mmen, ndinyụn̄ nsoboke mfep.
21 Idịghe ntre, edi owo kiet emi otode obot obot ikpehe Ephraim+ onyụn̄ ekerede Sheba,+ eyen Bichri, emenede ubọk esie an̄wana ye Edidem David.+ Mbufo ẹsio enye ẹnọ mi,+ ndien ami nyọwọrọ ke obio emi.”+ Ntem n̄wan oro ọdọhọ Joab ete: “Sese, ẹmọn̄ ẹtop ibuot+ esie ẹsio ke ibibene ẹnọ fi!”
22 Inikiet inikiet, n̄wan emi ada ọniọn̄+ esie etiene kpukpru mbio obio, ndien mmọ ẹsịbe Sheba eyen Bichri ibuot ẹtop ẹnọ Joab. Ndien enye efri nnụk,+ mmọ ẹnyụn̄ ẹsuana ẹwọrọ ẹkpọn̄ obio oro, mmọ kiet kiet ẹnyụn̄ ẹnyọn̄ ufọk mmọ; ndien Joab afiak ọnyọn̄ Jerusalem etiene edidem.
23 Ndien Joab edi etubom ofụri udịmekọn̄+ Israel; Benaiah+ eyen Jehoiada+ onyụn̄ edi etubom mme Cherethite+ ye mme Pelethite.+
24 Ndien Adoram+ ese aban̄a mbon oro ẹnyịkde ẹnam ọkpọsọn̄ utom; Jehoshaphat+ eyen Ahilud onyụn̄ edi andiwet n̄kpọ nnịm.
25 Ndien Sheva+ edi ewetn̄wed,+ Zadok+ ye Abiathar+ ẹnyụn̄ ẹdi mme oku.
26 Ndien Ira owo Jairite onyụn̄ edi oku+ David.
