Mme N̄ke 29;1-27
29 Owo eke ẹwakde ndisua nnọ+ edi emi osụk ọsọn̄de obotitọn̄,+ oyobụn̄ọ ke mbuari, inyụn̄ idụhe nte ẹkọkde.+
2 Ke ini ndinen owo ẹwakde, mbio obio ẹdat esịt;+ edi ke ini idiọkowo akarade, mbio obio ẹseme.+
3 Owo eke amade ọniọn̄ adat ete esie esịt,+ edi owo eke odụkde nsan̄a ye mme akpara abiat ọsọn̄urua inyene.+
4 Edidem ada unenikpe anam obio ọsọn̄ọ ada,+ edi owo eke adiade ubọkedem owụri enye.+
5 Owo eke enemde inua ye nsan̄a esie+ esịn iyịre ọnọ ikpat esiemmọ.+
6 Ubiatibet idiọkowo ọkọk afia,+ edi edinen owo osio n̄kpo idara onyụn̄ adat esịt.+
7 Edinen owo ọfiọk unen mme usụhọde owo.+ Edi idiọkowo ifiọkke oro.+
8 Mbon emi ẹtịn̄de ikọ mbụre ẹkịm ikan̄ ke obio,+ edi mbon ọniọn̄ ẹsụk iyatesịt.+
9 Ke ini owo ọniọn̄ enyenede ikpe ye ndisịme owo—enye ayat esịt onyụn̄ asak, ndien nduọkodudu idụhe.+
10 Mbon emi ọdọn̄de mmọ ndiduọk iyịp ẹsasua owo emi mînyeneke nduduọhọ;+ edi ndinen owo ẹyom ufọn ukpọn̄ mmọ kiet kiet.+
11 Ndisịme owo owụt ofụri iyatesịt esie, edi owo ọniọn̄ omụm idem akama tutu esịm akpatre.+
12 Ke ini andikara akpan̄de utọn̄ ọnọ ikọ nsu, kpukpru mbon oro ẹnamde n̄kpọ ẹnọ enye ẹdidi mme idiọkowo.+
13 Eyen ubuene ye owo ufịk ẹdi ukem;+ edi Jehovah an̄wan̄a mmọ mbiba enyịn.+
14 Ke ini edidem ekpede edinen ikpe ọnọ mme usụhọde owo,+ ebekpo esie ọyọsọn̄ọ owụhọ ke nsinsi.+
15 Eto ye nsuannọ ẹnọ owo ọniọn̄;+ edi eyen emi ẹyakde ẹnọ usụn̄ esie eyesuene eka esie.+
16 Ke ini mme idiọkowo ẹwakde, ubiatibet ọtọt; edi mbon emi ẹdide ndinen ẹyese nte mmọ ẹduọn̄ọde.+
17 Tụnọ eyen fo ndien enye ọyọnọ fi nduọkodudu, oyonyụn̄ ọnọ ukpọn̄ fo ekese inemesịt.+
18 Ke ini n̄kukụt mîdụhe mme owo ẹnam n̄kpọ nte ẹmama,+ edi mmọ eke ẹnịmde ibet ẹkop inemesịt.+
19 Ikọ kpọt idinen̄ekede asan̄autom,+ koro enye ọfiọkde edi inamke.+
20 Nte omokụt owo emi ọsọpde nditịn̄ ikọ?+ Ndisịme owo enyene idotenyịn akan enye.+
21 Edieke owo edekde-dek asan̄autom esie akama toto ke uyen, enye ayanana esịtekọm ke ukperedem uwem esie.
22 Owo iyatesịt edemede utọk,+ ndien owo ifụtesịt awak ndibiat ibet.+
23 Iseri owo oyosụhọde enye enịm,+ edi owo emi enyenede sụn̄sụn̄ edu ayada ubọn̄ enyene.+
24 Owo eke odụkde nsan̄a ye inọ asua ukpọn̄ esiemmọ.+ Enye ekeme ndikop nte ẹsịnde isụn̄i, edi itịn̄ke.+
25 Editen̄e owo enyịn ọkọk afia,+ edi ẹyekpeme owo eke ọbuọtde idem ye Jehovah.+
26 Mbon oro ẹyomde iso andikara ẹwawak,+ edi Jehovah ebiere ikpe owo.+
27 Ndinen owo ẹse owo emi ekpede ukwan̄ikpe ke mbubiam,+ idiọkowo onyụn̄ ese owo eke usụn̄ esie enende ke mbubiam.+
