Exodus 20;1-26
20 Ndien Abasi etịn̄ kpukpru ikọ emi ete:+
2 “Ami ndi Jehovah Abasi fo,+ emi n̄kosiode fi ke isọn̄ Egypt, ke ufọk ufụn.+
3 Kûnyene abasi efen+ ukọrọ ye ami.
4 “Kûnam edisọi mbiet unọ idemfo m̀mê mbiet n̄kpọ ekededi eke odude ke heaven ke enyọn̄ m̀mê eke odude ke isọn̄ ke idak m̀mê eke odude ke mmọn̄ ke idak isọn̄.+
5 Kûnụhọ unọ mmọ, kûnyụn̄ uyak ẹnam fi anam n̄kpọ mmọ,+ koro ami Jehovah Abasi fo ndi Abasi emi oyomde san̄asan̄a utuakibuot,+ nda ndudue mme ete ndori nditọ ke idem, nda ndori ọyọhọ emana ita ye ọyọhọ emana inan̄, eke ẹsuade mi;+
6 edi mfọn ido ye ediwak tọsịn emana mmọ eke ẹmade mi ẹnyụn̄ ẹnịmde mme ewụhọ mi.+
7 “Kûtomo enyịn̄ Jehovah Abasi fo ke usụn̄ eke mîdotke,+ koro Jehovah mîdiyakke anditomo enyịn̄ esie ke usụn̄ eke mîdotke ọbọhọ ufen.+
8 “Ti usen sabbath nyụn̄ nịm enye ke edisana,+
9 nam n̄kpọ nyụn̄ nam ofụri utom fo ke usen itiokiet.+
10 Edi ọyọhọ usen itiaba edi sabbath Jehovah Abasi fo.+ Kûnam baba utom kiet ke esịt, edide afo m̀mê eyeneren fo m̀mê eyenan̄wan fo, m̀mê ofụn eren fo m̀mê ofụn an̄wan fo m̀mê ufene fo m̀mê esenowo fo emi odude ke obio fo.+
11 Koro Jehovah akada usen itiokiet anam enyọn̄ ye isọn̄, ye inyan̄ ye kpukpru se idude mmọ ke esịt,+ ndien enye ọduọk odudu ke ọyọhọ usen itiaba.+ Ntak edi oro Jehovah ọkọdiọn̄de usen sabbath onyụn̄ anamde enye edi edisana.+
12 “Kpono usọ ye uka+ man usen fo ekpebịghi ke isọn̄ oro Jehovah Abasi fo ọnọde fi.+
13 “Kûwot owo.+
14 “Kûsịn efịbe.+
15 “Kûyịp inọ.+
16 “Kûtie ntiense nsu uban̄a ekemmọ owo.+
17 “Kûyom ufọk ekemmọ owo. Kûyom n̄wan ekemmọ owo,+ kûnyụn̄ uyom ofụn eren esie m̀mê ofụn an̄wan esie m̀mê enan̄ esie m̀mê ass esie m̀mê n̄kpọ ekededi eke enyenede ekemmọ owo.”+
18 Ndien kpukpru owo ẹkụt obuma ye emịnen̄mịnen̄ nte ẹsiahade ẹnyụn̄ ẹkop uyom nnụk ẹnyụn̄ ẹkụt nte nsụn̄ikan̄ ọwọrọde ke obot. Ke ini mmọ ẹkụtde n̄kpọ emi, idem enyek mmọ, mmọ ẹnyụn̄ ẹda nsannsan.+
19 Ndien mmọ ẹdọhọ Moses ẹte: “Afo kam tịn̄ ikọ ye nnyịn, ndien nnyịn iyakpan̄ utọn̄; edi yak Abasi okûtịn̄ ikọ ye nnyịn mbak nnyịn idikpan̄a.”+
20 Ntre Moses ọdọhọ mmọ ete: “Ẹkûfehe ndịk, koro ata Abasi edi ndidomo mbufo nse,+ man ndịk esie odu mbufo ke iso mbak mbufo ẹdinam idiọk.”+
21 Ndien mmọ ẹsụk ẹda nsannsan, edi Moses asan̄a ekpere obubịt enyọn̄ emi ata Abasi okodude.+
22 Ndien Jehovah ọdọhọ Moses ete:+ “Ntem ke afo edidọhọ nditọ Israel ete, ‘Mbufo ẹmekụt ẹte n̄ketie ke heaven ntịn̄ ikọ ye mbufo.+
23 Mbufo ẹkûda silver ẹnam abasi ẹkọrọ ye ami, ẹkûnyụn̄ ẹda gold ẹnam abasi ẹnọ idem mbufo.+
24 Da ntan nam itieuwa+ nọ mi, nyụn̄ wa edifọp uwa fo ye uwa ebuana fo ye erọn̄ fo ye enan̄ fo.+ Nyodu ye afo ke kpukpru ebiet eke ndinamde ẹti enyịn̄ mi nyonyụn̄ ndiọn̄ fi.+
25 Ndien edieke afo edidade itiat anam itieuwa ọnọ mi, kûda itiat eke ẹsọide-sọi unam. Ama ada n̄kpọ usọi itiat ọsọi, ayasabade enye.+
26 Kûnyụn̄ usan̄a ke udịghiukot udọk itieuwa mi, mbak ndido idan̄ fo ẹdifụhọde ke esịt.’
