Isaiah 33;1-24
33 Mbọm fo emi obụmede n̄kpọ owo, edi owo ibụmeke okwommọ, ye afo emi abian̄ade abian̄a, edi mbon efen ibian̄ake fi!+ Ke ndondo oro obụmede mbụme okụre, ẹyebụme fi.+ Ke ndondo oro okụrede ndibian̄a abian̄a, mmọ ẹyebian̄a fi.+
2 O Jehovah, tua nnyịn mbọm.+ Nnyịn idori enyịn ke afo.+ Kabade di ubọk nnyịn+ kpukpru usenubọk,+ ih, di edinyan̄a nnyịn ke ini nnanenyịn.+
3 Uyom ndutịme esịn mme owo ẹfen̄e.+ Ke ini afo adahade ke enyọn̄ mme idụt ẹsuana.+
4 Ndien ẹyetan̄ n̄kpọ mbụme+ mbufo ẹbon nte emi mfem atan̄de n̄kpọ obon, ye nte emi n̄kukun̄kpọyọriyọ ẹbụn̄ọde udịm udịm ẹbịne owo.+
5 Ẹyemenede Jehovah ke enyọn̄,+ koro enye odụn̄de ke edikon̄ ebiet.+ Enye ayada unenikpe ye edinen ido ọyọhọ Zion.+
6 Mme ini fo emi ẹkemede ndiberi edem ẹyedi inyene edinyan̄a+—ọniọn̄ ye ifiọk,+ uten̄e Jehovah,+ emi edide n̄kpọuto esie.
7 Sese! Mbon uko mmọ ẹmefiori ke efak; mme isụn̄utom emem+ ẹyetua ndotndot eyet.
8 Ẹmenam mme ọkpọusụn̄ ẹna ndon;+ idụhe owo eke asan̄ade ke afan̄usụn̄ ebe.+ Enye amabiat ediomi;+ enye emesịn mme obio ke ndek;+ enye inyụn̄ ibatke owo ke n̄kpọ.+
9 Isọn̄ omofụhọ onyụn̄ eyemede.+ Bụt amanam Lebanon;+ enye emeyemede. Sharon+ amakabade etie nte unaisọn̄ desat; Bashan ye Carmel ke ẹken̄e ikọn̄ mmọ.+
10 Jehovah ọdọhọ ete: “Ami nyadaha ke enyọn̄ ke emi,+ ami nyọnọ idemmi ubọn̄ ke emi;+ nyemenede idemmi ke enyọn̄ ke emi.+
11 Mbufo ẹyomo nsat mbiet;+ mbufo ẹdiman nnyanyan̄a. Spirit mbufo, oro etiede nte ikan̄,+ ayata mbufo.+
12 Ndien mme owo ẹyekabade ẹtie nte ndom eke ẹfọpde. Nte n̄kukịm oro ẹsịbede ẹduọn̄ọ, ẹyefọp mmọ ke ikan̄.+
13 Mbufo emi ẹdude anyan usụn̄, ẹkop se nyomde ndinam!+ Mbufo emi ẹnyụn̄ ẹdude ẹkpere, ẹfiọk odudu mi.+
14 Mme anamidiọk ke Zion ẹkop ndịk;+ idem emenyek mbon mfiakedem:+ ‘Anie ke otu nnyịn ekeme ndidụn̄ ini kiet ekededi ye ikan̄ eke atade?+ Anie ke otu nnyịn ekeme ndidụn̄ ini kiet ekededi ye akwa ikan̄ eke asakde ebịghi?’+
15 “Odu enye emi asan̄ade ke edinen ido+ kpukpru ini onyụn̄ etịn̄de se inende,+ emi esịnde idiọk udori abian̄a,+ emi eduepde ubọk esie etre ndibọ ubọkedem,+ emi esịride utọn̄ esie mbak edikop aban̄a uduọkiyịp, onyụn̄ ọbọpde enyịn esie mbak edikụt se idiọkde.+
16 Edi enye edidụn̄ ke mme edikon̄ ebiet;+ edikon̄ ebiet ubọhọ esie edidi mme ebiet ikpọ itiat emi ọsọn̄de ndisịm.+ Ẹyenọ enye uyo;+ mmọn̄ esie idikụreke.”+
17 Enyịn fo ẹyetịm ẹse edidem ke uyai esie;+ mmọ ẹyekụt idụt oro odude anyan ebiet.+
18 Esịt fo eyetịn̄ aban̄a n̄kpọndịk ke sụn̄sụn̄ uyo+ ete: “Ewetn̄wed odu m̀mọ̀n̄? Owo emi esikpede owo okụk odu m̀mọ̀n̄?+ Owo emi esibatde mme tọwa odu m̀mọ̀n̄?”+
19 Afo udukwe mbon emiom, mbon oro usem mmọ ọsọn̄de ndifiọk, kpa edeme ekek emi afo mûfiọkke.+
20 Sese Zion,+ obio usọrọ nnyịn!+ Enyịn fo ẹyekụt Jerusalem, ebietidụn̄ emi anade sụn̄, tent oro owo mîdiwụhọkede.+ Owo idiwụhọkede mme ọkpọhọ tent esie tutu amama, urụk esie baba kiet idinyụn̄ ikịbeke.+
21 Edi do ke Andikpon ke Ubọn̄,+ kpa Jehovah, edidi ebiet akpa mmọn̄+ ye ikpọ edịk ọnọ nnyịn. Ubom uden̄ ididụkke do, akamba nsụn̄ikan̄ idinyụn̄ iwatke ibe ke esịt.
22 Koro Jehovah edi Ebiereikpe nnyịn,+ Jehovah edi Owụk-ewụhọ nnyịn,+ Jehovah edi Edidem nnyịn;+ enye ayanyan̄a nnyịn.+
23 Mme urụk fo ẹyetara; mmọ idisọn̄ọke iwụk eto afara mmọ nnennen nnennen; mmọ itatke afara.
Ke ini oro ẹyedeme ediwak n̄kpọ mbụme; mme mbụn̄ọ ẹyeda ediwak n̄kpọ mbụme.+
24 Ndien baba andidụn̄ kiet ididọhọke ite: “Ndọdọn̄ọ.”+ Ẹyedahado ẹnọ mme andidụn̄ isọn̄ ke ndudue mmọ.+
