Jeremiah 29;1-32
29 Ndien mmọ emi ẹdi ikọ leta oro prọfet Jeremiah ọkọnọde ke Jerusalem ẹsọk mbiowo ke otu mbon ntan̄mfep emi ẹkesụhọde okonyụn̄ ọnọde ẹsọk mme oku ye mme prọfet ye kpukpru owo, emi Nebuchadnezzar akadade ke Jerusalem aka ntan̄mfep ke Babylon,+
2 ke Jeconiah+ edidem ye ọbọn̄ an̄wan+ ye mme adaidaha ke okụre, ye mbọn̄ Judah ye Jerusalem,+ ye mme anamutom usọ ye mme andibọp ibibene ukpeme+ ẹma ẹkewọn̄ọ ke Jerusalem.
3 Ẹkeyak leta emi ẹsịn ke ubọk Elasah eyen Shaphan+ ye ke ubọk Gemariah eyen Hilkiah, emi Zedekiah+ edidem Judah ọkọdọn̄de ẹka Babylon ẹbịne Nebuchadnezzar edidem Babylon, ẹkedọhọ ẹte:
4 “Ntem ke Jehovah mme udịm, Abasi Israel, ọdọhọ kpukpru mbon ntan̄mfep,+ oro ami nnamde ẹkpọn̄ Jerusalem ẹka ntan̄mfep ke Babylon ete,
5 ‘Ẹbọp ufọk ẹnyụn̄ ẹdụn̄ ke esịt, ẹtọ in̄wan̄ ẹnyụn̄ ẹdia mbun̄wụm mmọ.+
6 Ẹdọ iban ẹnyụn̄ ẹbon nditọiren ye nditọiban;+ ẹdọ iban ẹnọ nditọiren mbufo ẹnyụn̄ ẹda nditọiban mbufo ẹnọ mme ebe, man mmọ ẹkpeman nditọiren ye nditọiban; ẹnyụn̄ ẹwak do, ẹkûnyụn̄ ẹkpri ke ibat.
7 N̄ko, ẹyom emem obio emi ami nnamde mbufo ẹka ntan̄mfep, ẹnyụn̄ ẹbọn̄ akam ke ibuot esie ẹnọ Jehovah, koro enye ama enyene emem mbufo ẹyenyene emem.+
8 Koro ntem ke Jehovah mme udịm, Abasi Israel, ọdọhọ ete: “Ẹkûyak mme prọfet mbufo emi ẹdude ke otu mbufo ye mbiaidiọn̄ mbufo ẹbian̄a mbufo,+ mbufo ẹkûnyụn̄ ẹkpan̄ utọn̄ ke ndap mmọ oro mmọ ẹdabade.+
9 Koro ‘mmọ ẹtịn̄de nsunsu ntịn̄nnịm ikọ ke enyịn̄ mi ẹnọ mbufo. Ami n̄kọdọn̄ke mmọ,’+ uyo Jehovah edi emi.”’”
10 “Koro ntem ke Jehovah ọdọhọ ete, ‘Ke ini esịmde isua ata ye duop ke Babylon, ami nyọwọn̄ọde ntịn̄enyịn mi nnọ mbufo,+ nyonyụn̄ nnam eti ikọ mi kaban̄a mbufo osu ke ndida mbufo mfiak ndi ebiet emi.’+
11 “‘Koro ami mmọfiọk ekikere oro ami n̄kerede mban̄a mbufo,’+ uyo Jehovah edi emi, ‘ekikere emem, idịghe eke afanikọn̄,+ man nnọ mbufo ini iso ye idotenyịn.+
12 Ndien mbufo ẹyekot mi ẹnyụn̄ ẹdi ẹdibọn̄ akam ẹnọ mi, ami nyonyụn̄ n̄kpan̄ utọn̄ nnọ mbufo.’+
13 “‘Ndien mbufo ẹyeyom mi ẹnyụn̄ ẹkụt mi,+ koro mbufo ẹdiyomde mi ke ofụri esịt+ mbufo.
14 Ndien ami nyayak mbufo ẹkụt mi,’+ uyo Jehovah edi emi. ‘Ndien ami nyatan̄ mbuotekọn̄ mbufo nnyụn̄ ntan̄ mbufo ke kpukpru mme idụt ye ke kpukpru ebiet oro n̄kebịnde mbufo ndọn̄, mbon ọtọkiet,’+ uyo Jehovah edi emi. ‘Ndien ami nyada mbufo mfiak ndi ebiet emi n̄kanamde mbufo ẹwọrọ ẹka ntan̄mfep.’+
15 “Edi mbufo ẹdọhọ ẹte, ‘Jehovah amanam mme prọfet ẹdaha ẹda ẹnọ nnyịn ke Babylon.’
16 “Koro ntem ke Jehovah ọdọhọ edidem oro etiede ke ebekpo David+ ye kpukpru owo oro ẹdụn̄de ke obio emi, nditọete mbufo oro mîtieneke mbufo ika ntan̄mfep,+ ete,
17 ‘Ntem ke Jehovah mme udịm ọdọhọ ete: “Sese ami mmọn̄ ndọn̄ akan̄kan̄,+ akan̄+ ye idiọk udọn̄ọ+ ẹtiene mmọ, nyonyụn̄ nnam mmọ ẹtie nte fig emi adatde abiara oro owo mîkemeke ndidia ke ntak emi mmọ ẹdiọkde.”’+
18 “‘Ndien ami nyada akan̄kan̄, ye akan̄ ye idiọk udọn̄ọ mbịne mmọ, nyonyụn̄ nnam mmọ ẹdi n̄kpọ nnyekidem ke kpukpru mme obio ubọn̄ isọn̄,+ nnam ẹdi n̄kpọ isụn̄i ye n̄kpọ n̄kpaidem ye n̄kpọ oro ẹfride inụk ẹban̄a ye n̄kpọ esuene ke otu kpukpru mme idụt oro ndibịnde mmọ ndọn̄,+
19 ke ntak emi mmọ mîkopke ikọ mi,’ uyo Jehovah edi emi, ‘oro ndọn̄de mme asan̄autom mi kpa mme prọfet ẹdisian mmọ, mbabak ndemede ndọn̄ mmọ.’+
“‘Edi mbufo ikopke,’+ uyo Jehovah edi emi.
20 “Ndien amaedi mbufo, ẹkop ikọ Jehovah, kpukpru mbufo mbon ntan̄mfep,+ emi n̄kebịnde mfep ke Jerusalem ndọn̄ ke Babylon.+
21 Ntem ke Jehovah mme udịm, Abasi Israel, ọdọhọ aban̄a Ahab eyen Kolaiah ye Zedekiah eyen Maaseiah, emi ẹtịn̄de nsunsu ntịn̄nnịm ikọ ẹnọ mbufo ke enyịn̄ mi ẹte,+ ‘Sese ami mmọn̄ nyak mmọ nsịn ke ubọk Nebuchadrezzar edidem Babylon, ndien enye oyowot mmọ ke iso mbufo.+
22 Ndien ofụri otu mbon ntan̄mfep Judah oro ẹdude ke Babylon ẹyeda mmọ ẹtan̄a isụn̄i, ẹte: “Jehovah akpakam anam fi etie nte Zedekiah ye Ahab,+ emi edidem Babylon ọkọfọpde ke ikan̄!”+
23 ke ntak emi mmọ ẹnamde ndisịme ke Israel,+ mmọ ẹnyụn̄ ẹka iso ẹsịn efịbe ye iban nsan̄a+ mmọ ẹnyụn̄ ẹda enyịn̄ mi ẹtịn̄ nsunsu ikọ oro mmen̄kowụkke mmọ.+
“‘“Ndien ami ndi Enye emi ọfiọkde, ami nnyụn̄ ndi ntiense,”+ uyo Jehovah edi emi.’”
24 “Ndien afo ọyọdọhọ Shemaiah+ owo Nehelam ete,
25 ‘Ntem ke Jehovah mme udịm, Abasi Israel, ọdọhọ ete: “Ke ntak emi afo ọnọde mme leta+ ke enyịn̄ fo ẹsọk kpukpru owo emi ẹdude ke Jerusalem, onyụn̄ ọnọde ẹsọk Zephaniah+ eyen Maaseiah, oku, onyụn̄ ọnọde ẹsọk kpukpru mme oku, ete,
26 ‘Jehovah amanam fi edi oku utu ke Jehoiada oku, man akabade edi akwa esenyịn ufọk Jehovah+ ọnọ owo ekededi oro adamade idat+ onyụn̄ anamde n̄kpọ nte prọfet, ndien afo enyene ndisịn enye ke ebuka;*+
27 ntak, ndien, afo mûsuaha unọ Jeremiah owo Anathoth,+ emi anamde n̄kpọ nte prọfet mbufo?+
28 Koro ntak edi oro enye ọdọn̄de ẹbịne nnyịn ke Babylon, ẹdidọhọ ẹte: “Enye eyebịghi! Ẹbọp ufọk ẹnyụn̄ ẹdụn̄ ke esịt, ẹtọ in̄wan̄ ẹnyụn̄ ẹdia mbun̄wụm mmọ,+ —”’”’”
29 Ndien Zephaniah+ oku okot leta emi ke utọn̄ prọfet Jeremiah.
30 Ekem uyo Jehovah esịm Jeremiah, ete:
31 “Dọn̄ ẹkedọhọ kpukpru mbon ntan̄mfep,+ ẹte, ‘Ntem ke Jehovah ọdọhọ aban̄a Shemaiah owo Nehelam ete: “Ke ntak emi Shemaiah etịn̄de ntịn̄nnịm ikọ ọnọ mbufo, edi ami n̄kọdọn̄ke enye, enye onyụn̄ odomode ndinam mbufo ẹbuọt idem ke nsu,+
32 mmọdo ntem ke Jehovah ọdọhọ ete, ‘Sese ami mmọn̄ n̄wọn̄ọde enyịn mi nse Shemaiah+ owo Nehelam ye nditọ esie.’+
“‘“‘Enye idinyeneke owo eke edidụn̄de ke otu mbon emi;+ ndien enye idikwe eti n̄kpọ oro ndinamde nnọ ikọt mi,’+ uyo Jehovah edi emi, ‘koro enye etịn̄de ata ikọ nsọn̄ibuot ye Jehovah.’”’”+
Mme Ikọ Idakisọn̄
^ Ẹda ikọ iba ke akpasarade uwetn̄kpọ, kiet etịn̄ aban̄a “ebuka ukot” enye eken aban̄a “ebuka ubọk ye ibuot.”
