Matthew 21;1-46
21 Edi, ke ini mmọ ẹsan̄ade ẹkpere Jerusalem ẹnyụn̄ ẹsịmde Bethphage ke Obot Olive, Jesus osio mbet iba ọdọn̄,+
2 ọdọhọ mmọ ete: “Ẹka ẹkedụk obio-in̄wan̄ emi mbufo ẹdade ẹkụt ko, ndien kpa idaha oro mbufo ẹyekụt ass emi ẹyịride ye eyen esie; ẹtat mmọ ẹda ẹsọk mi.+
3 Ndien edieke owo ekededi etịn̄de n̄kpọ ye mbufo, mbufo ẹdọhọ ẹte, ‘Ọbọn̄ oyom mmọ.’ Ntem enye ọyọsọsọp ọnọ mmọ ẹdi.”
4 Emi akada itie man okposu se ẹkedade prọfet ẹtịn̄, ẹte:
5 “Ẹsian eyenan̄wan Zion ẹte, ‘Sese! Edidem fo ke edi ke ọtọ fo,+ enyene ifụre ifụre ido,+ onyụn̄ odoro ke enyọn̄ ass, ih, ke enyọn̄ abak ass, eyen unam mbiomo.”+
6 Ntre mme mbet ẹdaha ẹka ẹnyụn̄ ẹkenam kpa nte Jesus eketemede mmọ.
7 Ndien mmọ ẹda ass oro ye eyen esie ẹdi, ẹnyụn̄ ẹda ewụra mmọ ẹbri mmọ ke edem, enye onyụn̄ ọdọk mmọ* odoro.+
8 Ata ediwak owo ẹbri ewụra+ mmọ ke usụn̄, ke adan̄aemi mmọ eken ẹkpide n̄kọk eto ẹbri ke usụn̄.+
9 Ndien otuowo emi ẹbemde enye iso ye mmọ emi ẹtienede enye ke edem ẹka iso ndifiori ẹte: “Mbọk, nyan̄a+ Eyen David!+ Itoro enyene enye emi edide ke enyịn̄ Jehovah!+ Mbọk, tie ke ata enyọn̄ nyan̄a enye!”+
10 Ndien ke ini enye odụkde Jerusalem,+ ofụri obio ẹdu ke ndutịme, ẹdọhọ ẹte: “Anie edi emi?”
11 Otuowo ẹka iso ndidọhọ ẹte: “Emi edi Jesus,+ kpa prọfet emi otode Nazareth ke Galilee!”
12 Ndien Jesus odụk temple onyụn̄ ebịn kpukpru mmọ eke ẹnyamde ẹnyụn̄ ẹdepde n̄kpọ ke temple osion̄o, onyụn̄ onụk okpokoro mme okpụhọ okụk ye nnyan n̄kpọitie mme anyam ibiom ọduọn̄ọ.+
13 Enye onyụn̄ ọdọhọ mmọ ete: “Ẹwet ẹte, ‘Ẹdikot ufọk mi ufọk akam,’+ edi mbufo ẹmenam enye edi itie udịbe mbon n̄wo.”+
14 N̄ko, nnan ye mbụn̄ọ ẹdi ẹbịne enye ke temple, ndien enye ọkọk mmọ udọn̄ọ.
15 Ke ini mbọn̄ oku ye mme scribe* ẹkụtde mme utịben̄kpọ emi enye anamde+ ye nte nditọwọn̄ oro ẹfioride ke temple ẹnyụn̄ ẹdọhọde ẹte: “Mbọk, nyan̄a+ Eyen David!”+ mmọ ẹfụt esịt
16 ẹnyụn̄ ẹbụp enye ẹte: “Nte omokop se mmọ emi ẹdọhọde?” Jesus ọbọrọ mmọ ete: “Ih. Nte akanam mbufo ikotke+ emi ite, ‘Afo amanam inua nseknditọ ye mmọ eke ẹwapde eba ẹtoro fi’?”+
17 Ndien enye ọkpọn̄ mmọ ọwọrọ aka obio Bethany onyụn̄ akadan̄ do.+
18 Ke adan̄aemi enye afiakde edi obio oro ke tụhi-tụhi usenubọk, biọn̄ ọdọn̄ enye.+
19 Enye onyụn̄ okụt eto fig adade ke mben ọkpọusụn̄ ndien asan̄a ekesịm do, edi ikwe n̄kpọ ndomokiet+ ibọhọke ikọn̄ kpọt, enye onyụn̄ ọdọhọ eto oro ete: “Kûn̄wụm mfri aba tutu amama.”+ Ndien eto fig oro eyemede kpa idaha oro.
20 Edi ke ini mme mbet ẹkụtde emi, idem akpa mmọ ndien mmọ ẹdọhọ ẹte: “Eto fig asan̄a didie eyemede kpa idaha oro?”+
21 Jesus ọbọrọ mmọ ete: “Ke akpanikọ ke ndọhọ mbufo nte, Edieke mbufo ẹkam ẹnyenede mbuọtidem mînyụn̄ iyịkke,+ mbufo idinamke se ami n̄kanamde ye eto fig oro kpọt, edi n̄ko edieke mbufo ẹdọhọde obot emi ẹte, ‘Wụhọde kọduọ dụk inyan̄,’ eyetịbe kpa ntre.+
22 Ndien kpukpru n̄kpọ eke mbufo ẹben̄ede ke akam, ẹma ẹnyene mbuọtidem, mbufo ẹyebọ.”+
23 Ndien ke enye ama okodụk temple, mbọn̄ oku ye mbiowo obio ẹdi ẹbịne enye ke adan̄aemi enye osụk ekpepde n̄kpọ ẹnyụn̄ ẹdibụp enye ẹte:+ “Ewe odudu ke afo ada anam mme n̄kpọ emi? Anie okonyụn̄ ọnọ fi odudu emi?”+
24 Jesus ọbọrọ mmọ ete: “Ami, n̄ko, nyobụp mbufo n̄kpọ kiet. Edieke mbufo ẹtịn̄de ẹnọ mi, ami nyasian mbufo odudu eke ndade nnam mme n̄kpọ emi:+
25 Baptism John okoto m̀mọ̀n̄? Ndi okoto heaven m̀mê okoto owo?”+ Edi mmọ ẹtọn̄ọ ndikere ke otu idemmọ, ẹte: “Edieke nnyịn idọhọde, ‘Okoto heaven,’ enye ọyọdọhọ nnyịn, ‘Ntak, ndien, mbufo mîkenịmke enye ke akpanikọ?’+
26 Edieke nnyịn inyụn̄ idọhọde, ‘Okoto owo,’ nnyịn ifefehe otuowo,+ koro kpukpru mmọ ẹdade John nte prọfet.”+
27 Ntre mmọ ẹbọrọ Jesus ẹte: “Nnyịn ifiọkke.” Enye, ndien, ọdọhọ mmọ ete: “Ami nde ndisianke mbufo odudu eke ndade nnam mme n̄kpọ emi.+
28 “Mbufo ẹkere didie? Owo kiet ekenyene nditọ iba.+ Enye aka ebịne akpa onyụn̄ ọkọdọhọ enye ete, ‘Eyen, ka kanam utom mfịn ke in̄wan̄ vine.’
29 Enye ọbọrọ ete, ‘Ete, nyaka,’+ edi enye ikaha.
30 Enye aka ebịne ọyọhọ iba, ọkọdọhọ kpa ntre. Enye ọbọrọ ete, ‘Ndikaha.’ Ekem enye atua n̄kpọfiọk+ onyụn̄ ọwọrọ aka.
31 Ewe ke otu mbiba emi akanam uduak ete mmọ?”+ Mmọ ẹbọrọ ẹte: “Ekperedem.” Jesus ọdọhọ mmọ ete: “Ke akpanikọ ke ndọhọ mbufo nte mme ọbọ a-tax ye mme akpara ẹmọn̄ ẹbem mbufo iso ẹdụk obio ubọn̄ Abasi.
32 Koro John akasan̄a ke usụn̄ edinen ido etiene mbufo,+ edi mbufo ikenịmke enye ke akpanikọ.+ Edi, mme ọbọ a-tax ye mme akpara ẹma ẹnịm enye ke akpanikọ,+ okposụkedi mbufo ẹkekụtde emi, mbufo ituaha n̄kpọfiọk ke ukperedem man ẹnịm enye ke akpanikọ.
33 “Ẹkop uwụtn̄kpọ efen: Owo kiet okodu, enyeneufọk,+ emi ọkọtọde in̄wan̄ vine onyụn̄ esịn ọkọ akanade enye okụk onyụn̄ etịbi obube unyịmi wine ke esịt onyụn̄ ọbọp tọwa,+ onyụn̄ ayak enye esịn mme ọtọin̄wan̄ ke ubọk, ndien adaha aka esenidụt.+
34 Ke ekemde ini mfri, enye osio ifịn esie ọdọn̄ ete ẹka ẹbịne mme ọtọin̄wan̄ ẹkebọ mfri imọ ẹda ẹdi.
35 Edi, mme ọtọin̄wan̄ oro ẹmụm ifịn esie, ẹmia kiet, ẹwot en̄wen, ẹnyụn̄ ẹtọn̄ọ enye eken ke itiat.+
36 Enye ọtọn̄ọ ntak osio ifịn efen ọdọn̄, ẹwak ẹkan eke akpa, edi mmọ ẹnam kpasụk ntre ye mmọ emi.+
37 Ke akpatre enye osio eyen esie ọdọn̄ aka ebịne mmọ, ete, ‘Mmọ ẹyekpono eyen mi.’
38 Ke ini ẹkụtde eyen emi, mme ọtọin̄wan̄ oro ẹdọhọ ke otu idemmọ ẹte, ‘Emi edi adiakpa;+ ẹdi, ẹyak iwot enye inyụn̄ ida mme n̄kpọ-akpa esie inyene!’+
39 Ntre mmọ ẹmụm enye ẹnyụn̄ ẹsio enye ke in̄wan̄ vine oro ẹnyụn̄ ẹwot enye.+
40 Ntem, ke ini enyene in̄wan̄ vine edide, nso ke enye edinam mme ọtọin̄wan̄ oro?”
41 Mmọ ẹdọhọ enye ẹte: “Koro mmọ ẹdiọkde, enye ayada idiọk nsobo+ etiene mmọ onyụn̄ ayak in̄wan̄ vine oro esịn ke ubọk mme ọtọin̄wan̄ en̄wen, emi ẹdinọde enye mfri ke ini ama ekem.”+
42 Jesus ọdọhọ mmọ ete: “Nte akanam mbufo ikotke ke N̄wed Abasi ite, ‘Itiat emi mme ọbọpufọk ẹkesịnde+ kpa enye amakabade edi etubom itiat inụk.+ Emi oto Jehovah, enye onyụn̄ edi utịben̄kpọ ke enyịn nnyịn’?
43 Ntak edi oro ndọhọde mbufo nte, Ẹyebọ mbufo obio ubọn̄ Abasi ẹnyụn̄ ẹyak enye ẹnọ idụt oro on̄wụmde mfri esie.+
44 N̄ko, owo eke ọduọde ke itiat emi ayanuaha. Edi owo ekededi eke itiat emi ediduọde ọtọ, ayanuak enye.”+
45 Ndien ke adan̄aemi mbọn̄ oku ye mme Pharisee ẹkopde mme uwụtn̄kpọ esie, mmọ ẹfiọk ẹte enye etịn̄ aban̄a mmimọ.+
46 Edi, okposụkedi mmọ ẹkeyomde ndimụm enye, mmọ ẹfehe otuowo, koro mmọ emi ẹdade enye nte prọfet.+
