Matthew 28;1-20
28 Ke sabbath ama ekebe, ke ini eyo ọtọn̄ọde ndisiere ke akpa usen urua, Mary Magdalene ye Mary enye eken ẹdi ndise udi.+
2 Ndien, sese! akwa unyekisọn̄ ama etịbe; koro angel Jehovah okotode ke heaven osụhọde edi, asan̄a ekpere onyụn̄ edikpat itiat oro osio, onyụn̄ osụhọde etie ke itiat oro.+
3 Enye ekebiet emịnen̄mịnen̄,+ edisịnen̄kpọ esie onyụn̄ afia nte snow.+
4 Ih, ke ntak ndịk oro mbon ukpeme ẹkopde ẹban̄a enye, mmọ ẹnyek ẹnyụn̄ ẹkabade ẹtie nte mme akpan̄kpa.
5 Edi angel+ oro ọdọhọ iban oro ete: “Ẹkûfehe ndịk, koro mmọfiọk nte mbufo ẹyom Jesus+ emi ẹkekọn̄de ke eto.
6 Enye idụhe mi, koro ẹma ẹnam enye eset,+ kpa nte enye ọkọdọhọde. Ẹdi, ẹdise ebiet emi enye akanade.
7 Ndien ẹwara ẹka ẹketịn̄ ẹnọ mme mbet esie ẹte ke ẹma ẹnam enye eset+ ke n̄kpa, ndien, sese! enye ke ebem mbufo iso aka Galilee;+ mbufo ẹdikụt enye do. Sese! Mmetịn̄ nnọ mbufo do.”+
8 Ntre, mmọ ẹsọsọp ẹkpọn̄ udi, ke ndịk ye akwa idatesịt, ẹnyụn̄ ẹfen̄e ẹka ndibụk nnọ mme mbet esie.+
9 Ndien, sese! Jesus osobo ye mmọ onyụn̄ ọdọhọ ete: “Mmọkọm-o!” Mmọ ẹsan̄a ẹkpere ẹnyụn̄ ẹmụm enye ukot ẹnyụn̄ ẹnụhọ ẹnọ enye.
10 Ndien Jesus ọdọhọ mmọ ete: “Ẹkûfehe ndịk! Ẹka, ẹketịn̄ ẹnọ nditọete mi,+ ẹte mmọ ẹka Galilee; ndien mmọ ẹdikụt mi do.”
11 Ke adan̄aemi mmọ ẹsụk ẹkade ke usụn̄, sese! ndusụk mbon ukpeme+ ẹdụk obio ẹketịn̄ kpukpru se iketịbede ẹnọ mbọn̄ oku.
12 Ekem ke mmọ ẹma ẹkesop idem ọtọkiet ye mbiowo ẹnyụn̄ ẹdụk ediomi, mmọ ẹnọ mbonekọn̄ oro ediwak okụk silver+
13 ẹte mmọ: “Ẹdọhọ ẹte, ‘Mme mbet+ esie ẹkedi ke okoneyo ẹdiyịp enye ke adan̄aemi nnyịn idede idap.’
14 Ndien edieke emi odụkde andikara utọn̄, nnyịn iyekpe ye enye inyụn̄ isio mbufo ifep ke mfịna.”
15 Ntre mmọ ẹbọ okụk silver oro ẹnyụn̄ ẹnam kpa nte ẹketemede mmọ; ikọ emi onyụn̄ asuana ke otu mme Jew tutu esịm mfịn emi.
16 Edi, mbet duopekiet ẹka Galilee+ ke obot emi Jesus ekemekde enịm ọnọ mmọ,
17 ndien ke ini mmọ ẹkụtde enye mmọ ẹnụhọ ẹnọ enye, edi ndusụk mmọ ẹnyene eyịghe.+
18 Edi Jesus asan̄a ekpere onyụn̄ ọdọhọ mmọ ete: “Ẹnọ mi ofụri odudu+ ke heaven ye ke isọn̄.
19 Mmọdo ẹka ẹkenam mme owo ke kpukpru idụt+ ẹdi mbet mi,+ ẹnịm mmọ baptism+ ke enyịn̄ Ete+ ye Eyen+ ye edisana spirit,+
20 ẹkpep+ mmọ ẹnam+ kpukpru n̄kpọ eke n̄ketemede mbufo.+ Ndien, sese! Ami ndodu ye mbufo+ kpukpru usen tutu esịm akpatre ini editịm n̄kpọ emi.”+
