Abasi oyom mme owo ẹsibọn̄ akam ẹnọ enye ẹnyụn̄ ẹtịn̄ nte etiede mmọ ke idem. Edidem David ọkọbọn̄ akam ọdọhọ Abasi ete: “O Andikop akam, kpukpru obụkidem ẹyedi ẹbịne fi.” (Psalm 65:2) Edi, didie ke ikpọbọn̄ akam yak Abasi okop onyụn̄ ọdiọn̄ nnyịn?

Akam emi ọbọn̄de ke idemfo ọnọ Abasi ayanam ekeme ‘ndin̄wan̄a esịt fo nnọ enye.’ (Psalm 62:8) Abasi oyom ibọn̄ akam ke ofụri esịt inọ imọ.

Abasi enyene ediwak udorienyịn̄, utọ nte, Ọbọn̄, Andibot, ye Andinyan̄a. Edi enyịn̄ kiet kpọt ke enye enyene. Enye ọdọhọ ete: “Ami ndi Jehovah. Enyịn̄ mi edi oro.” (Isaiah 42:8) Enyịn̄ Jehovah odu n̄kpọ nte itie 7,000 ke Bible. Ediwak prọfet ẹma ẹsikot Abasi ke enyịn̄. Abraham ọkọdọhọ ete: “Mbọk, yak Jehovah okûyat esịt, yak nsụk mbụp.” (Genesis 18:30) Ana nnyịn n̄ko isikot Abasi ke enyịn̄ ke ini ibọn̄de akam.

Abasi esikop se etịn̄de onyụn̄ ọdiọn̄ọ nte etiede fi ke idem, inamke n̄kpọ m̀mê ewe usem ke ada ọbọn̄ akam ọnọ enye. Ikọ esie ọdọhọ ete: “Abasi inamke asari, edi ke kpukpru idụt enye enyenyịme owo eke abakde enye onyụn̄ anamde edinen ido.”—Utom 10:34, 35.

Edi edieke iyomde Abasi ọdiọn̄ nnyịn, idịghe akam akam ke idibọn̄. Iyeneme se ikpanamde ke ibuotikọ oro etienede.